MONA amaluba ne fisabo ifyapya ifyo beta ati ama-alumonde ifili ku nkonto ya kwa Aarone. Aya amaluba ne fisabo ifyapya fyamenene ku nkonto ya kwa Aarone mu nshita ya bushiku! Natumone icalengele ici cintu ukucitika.

Abena Israele balyendele inshita iikalamba mu matololo. Abantu bamo batendeke ukutontonkanya ati Mose te walingile ukubatungulula no kuti Aarone na o talingile ukuba shimapepo mukalamba. Kora, Datani na Abiramu, e lyo ne ntungulushi 250 isha bantu e batampile ukuilishanya. Aba bonse baile kuli Mose no kumweba ati: ‘Cinshi waipeelela ubutungulushi pali ifwe?’

Mose aebele Kora na balekonka ifyo alecita ati: ‘Mailo ulucelo mukabuule ififutumwino no kubikamo ifyanunkila e lyo mukese mu cikuulwa ca kupepelamo Yehova. Tukamona uo Yehova akasala.’

Ubushiku bwakonkelepo, Kora na bantu bakwe 250 baile umwa kupepela Yehova. Kwali na bambi abengi abalebatungilila. Yehova alikalipe sana. Mose atile: “Talukeni ku matenti ya aba bantu imbifi kabili mwikumya ku cintu cabo nangu cimo.” Abantu balikonkele ifyo Mose alandile, kabili balitalwike ku matenti ya kwa Kora, Datani na Abiramu.

Lyena Mose atile: ‘Kuli ici e ko mwalaishibila uo Yehova asalile. Umushili walalepuka no kumina aba bantu imbifi.’

Ilyo Mose alekele fye ukulanda, umushili walilepwike no kumina itenti lya kwa Kora ne fintu fyakwe fyonse, e lyo na Datani na Abiramu na bantu babo. Ilyo abantu baumfwile imisowa ya bantu abo umushili walemina, bapundile ati: ‘Natubutuke! E pali umushili watumina na ifwe!’

Kora na bantu bakwe 250 bali mupepi no mwa kupepela. E ico Yehova atumine umulilo uwaocele bonse fye. Lyena Yehova aebele Eleasari, umwana wa kwa Aarone ukubuula ififutumwino fya baume abafwile no kupangamo ifyela ifyapaapaatala ifya kubika pa ciipailo. Ifi ifyela fyali no kwafwa abena Israele ukulaibukisha ukuti ni Aarone fye na bana bakwe abaume, e bo Yehova asalile ukuba bashimapepo.

Lelo Yehova alefwaya abantu ukwishiba ukuti Aarone na bana bakwe, e bo asalile ukuba bashimapepo. E ico aebele Mose ati: ‘Eba intungulushi imo na imo iya mu mikowa ya bena Israele ukuleta inkonto. Mu mukowa wa kwa Lebi, webe Aarone e o alete inkonto yakwe. Ubike ishi inkonto mu cikuulwa ca kukumaninamo pa ntanshi ya cipao ca cipangano. Inkonto ya mwaume uo nasala ukuba shimapepo ikabalula.’

Ilyo Mose aile mu kumona inkonto ulucelo, asangile ku nkonto ya kwa Aarone kuli aya amaluba ne fisabo ifyapya! Bushe nomba waishiba ico Yehova alengeele inkonto ya kwa Aarone ukubalula?