ILYO abantu batendeke ukufula pe sonde, abengi balecita ifyabipa kwati fye ni Kaini. Lelo kwali umwaume umo uushalecitako ifyabipa. E uyu ali apa. Ishina lyakwe ni Enoke. Enoke ali uwashipa. Nangu ca kuti abantu pali ilya nshita balecita ifyabipa, Enoke ena alitwalilile ukubombela Lesa.

Bushe nawishiba ico balya bantu balecitila ifyabipa ifingi? Bushe uleibukisha uwalengele Adamu na Efa ukukanaumfwila Lesa no kulya ku cisabo ico Lesa abakeenye ukulyako? Ni ulya malaika wabipa. Baibolo imwita ati Satana. Kabili afwaya ukuti bonse balecita ifyabipa.

Bushiku bumo Yehova Lesa aebele Enoke ukweba abantu fimo ifyo bashatemenwe. Abebele ati: ‘Lesa ali no konaula abantu bonse abacita ifyabipa.’ Abantu nalimo balikalipe nga nshi pa kumfwa aya mashiwi. Aba bantu napamo baeseshe fye no kwipaya Enoke. Kanshi Enoke alingile ukushipa pa kweba abantu ifyo Lesa ali no kucita.

Lesa talekele Enoke ukwikala imyaka iingi na balya bantu babipa. Enoke aikele fye imyaka 365. Ninshi twalandila ati ‘imyaka fye 365’? Pantu abantu pali ilya nshita bali abakosa sana ukucila aba pali ino nshita kabili baleikala imyaka iingi. Nga ni Metusela umwana wa kwa Enoke, ena aikele imyaka 969!

Ilyo Enoke afwile, abantu e lyo babipileko. Baibolo itila, ‘fyonse ifyo baletontonkanya fyaleba fye ifibi inshita yonse,’ kabili ‘pe sonde palifulile ubunkalwe.’

Bushe kuti waishiba icalengele ukuti pe sonde pabipe sana muli shilya nshiku? Ni co Satana alitontonkenye pa nshila imbi iya kulengelamo abantu ukulacita ifyabipa. Tukasambililapo mu cipandwa cikonkelepo.