Yobo 30:1-31
30 “Nomba balanseka+—Abaice pali ine,Abo nalemona ukuti bashiboTabaalingile ukuba pamo ne mbwa ishalelonda impaanga shandi.
2 Bushe balibomfeshe amaka yabo ku kungafwa?
Amaka yabo yalipwa.
3 Balyonda bashala fye amafupa yeka yeka pa mulandu wa kubulisha ne nsala;Basheta fyonse ifyo basanga mu mpanga iyaumaIyo baonaula kale kabili iyashala icibolya.
4 Baswa amabula ayakwata umucele ku fimpuusa;Balya imishila ya fimuti fya cipyango.
5 Balabatamfya mu misumba;+Uku ninshi abantu balebapundilila nga filya bapundilila kabolala.
6 Bekala mu mikonko,Mu mendo na mu mabwe.
7 Mu fimpuusa e mo balililaKabili balalongana pamo pa mulandu no mwenso.
8 Nga filya batamfya abana ba bashakwata amano kabili ifinangwa,E fyo nabo babatamfya mu calo.
9 Lelo nomba balampumya na mu nyimbo shabo;+Kabili balanseka.*+
10 Balimpata kabili balantaluka;+Tabatiina no kumfwishila amate pa menso.+
11 Apo Lesa alimpoka ifya kuncingilila* kabili alinasha,Takuba nangu cimo icibalesha ukunjimina.*
12 Ku kulyo kwandi balanjimina nga filya ibumba liimina umuntu;BalampepekaKabili balacilika inshila mpitamo pa kuti bandofye.
13 Nabonaula inshila shandiKabili nabalenga amacushi yandi yafulilako,+Takwaba no wa kubakaanya.*
14 Besa kwati bapita pa cipunda icikalamba ice linga;Besa mu kuncusha ilyo ndi na macushi ayengi.
15 Ifya kuntiinya nafimfulila;Ubucindami bwandi balabulula nga filya umwela ululula ifintu,Kabili ipusukilo lyandi lyapashika nga filya ikumbi lipashika.
16 Nomba ubumi* bwandi bwile bulecepa;+Inshiku sha bucushi+ shalinsanga.
17 Mu nshita ya bushiku+ ubukali bulatulaula amafupa yandi;Kabili tabuleka.+
18 Ica kufwala candi ca-aluka pa mulandu wa kuti bacitiinta na maka;*Cankama pa mukoshi nga filya umukoshi wa ca kufwala ukama.
19 Lesa ampoosa mu matipa;Kabili ninshonaika ndi fye ngo lukungu kabili nge mito.
20 Ndilila kuli imwe ukuti mungafwe, lelo tamunjasuka;+Nangu naiminina pa cinso cenu mundolesha fye.
21 Mwalinjalukila kabili mwaliba umunkalwe kuli ine;+Mwalincena no kuboko kwenu ukwa maka sana.
22 Mulanjimya, e lyo mwangulula no mwela;Lyena mulampoosa konse konse mu cikuuku ca mwela.*
23 Pantu ninjishiba ukuti mukantwala ku mfwa,Ku ng’anda uko bonse aba mweo bakakumanina.
24 Lelo takuli nangu umo uwingoma umuntu uushakwata wa kumwafwa*+Ilyo alepunda mutuule mu nshita ya macushi.
25 Bushe nshalelilila ubulanda abalecula?
Bushe nshalelangulukilako* abapiina?+
26 Nangu ca kuti nalesubila ukuti ifisuma fikacitika, ifyabipa e fyacitike;Nale-enekela ulubuuto, lelo imfifi e yaishile.
27 Mu mala mwalepota ukwabula ukuleka;Inshiku sha bucushi shalinsangile.
28 Nyenda ninshi ndi no bulanda+ kabili nshimona ulubuuto.
Ndeminina mu lukuta, ndepunda mutuule.
29 Nimba munyina wa bamumbweKabili umunabo wa bana ba kwa mwakatala.+
30 Inkanda yandi yalifiita kabili ilobuka;+Amafupa yandi yalapya ku cikabilila.*
31 Insango yandi ilila fye nga baleloosha,No mutolilo wandi ulila fye nga balelila.
Amafutunoti
^ Mu ciHebere, “balanda pali ine mu manshoko.”
^ Mu ciHebere, “alitompola intambo ya buta bwandi.”
^ Nelyo “Balipoosa umukobelo wabo.”
^ Nelyo kuti yapilibula no kuti, “Takwaba no wa kubafwa.”
^ Nelyo “umweo.”
^ Nelyo kuti yapilibula no kuti, “ninjaluka pa mulandu wa kuti amacushi yalimfulila.”
^ Nelyo kuti yapilibula no kuti, “mulansungulula ne cibulukutu ca nkuba.”
^ Mu ciHebere, “icitantaala.”
^ Nelyo “Bushe umweo wandi tawalelangulukilako?”
^ Nelyo kuti yapilibula no kuti, “ukukaba kwa mubili.”
