Esaya 57:1-21
57 Uwalungama naloba,Lelo takuli nangu umo uubikileko amano.
Abaume ba cishinka nababasenda,*+Lelo takuli nangu umo uuleiluka ukuti uwalungama nabamusendaPa mulandu wa bucushi.*
2 Aingila umwaba umutende.
Bonse abacita ifyalungama balatuusha pa busanshi bwabo.*
3 “Lelo imwe palameni kuno, mwe bana ba mwanakashi umuloshi.Mwe bana ba mwaume umucende,Kabili mwe bana ba mwanakashi cilende:
4 Nani muleseka?
Nani muleasamwina akanwa kenu, no kufumisha ululimi?
Bushe tamuli bana ba lubembu,Abana ba bufi,+
5 Ababa no lunkumbwa lwa kucita ubulalelale mu fimuti+ ifikalamba,Mwi samba lya cimuti conse icalelema,+Abepaila abana babo mu mipokapoka,+Pa kati ka mabwe ayakalamba yabili?
6 Amabwe ayatelela aya mu mupokapoka e yo wasala.+
E bupyani bobe.
Na kuli yena uletulwilako umutuulo wa mwangashi kabili ulayapeela ubupe.+
Bushe ifi ucita kuti fyalenga nalasekelela?*
7 Pa muulu wa lupili ulutali e po wayanshike ubusanshi bobe,+Kabili palya e po waile mu kutuula ilambo.+
8 Ku numa ya ciibi no luceshi e ko wabikile ica ku kwibukishishako.
Walinshile kabili wali-ifulile;Walininine ulupili no kuyakusha ubusanshi bobe.
Kabili wapangene nabo icipangano
Kabili walitemenwe ukulaala nabo pa busanshi,+Kabili wamwene ubwamba bwa mwaume.*
9 Waile kuli Meleke* ninshi nausenda amafutaKabili walisendele amafuta ayengi ayanunkila.
Watumine inkombe shobe ukutali,Pa kuti wingile mu Nshiishi.*
10 Naufunshika pa mulandu wa kuti ulenda mu nshila shobe ishingi,Lelo tawalandile auti, ‘Tamwaba icisuma nangu cimo!’
Naukwata amaka na kabili.
E co ushinenukila.*
11 Nani watiininePa kuti utendeke ukubepa?+
Tawanjibukishe.+
Tawabikileko umutima.+
Bushe nshaikala tondolo no kulabako ku fyo wacita?*+
E ico tawantiinine.
12 Nkalenga ubulungami+ bobe ubwa bumbimunda ne fyo ucita+ fikeshibikwe,Kabili tafyakakwafwe.+
13 Nga wapunda mutuule,Ifilubi fyobe ifyo walonganika tafyakakupusushe.+
Umwela ukafisenda fyonse,No mupu fye ukafyululula,Lelo uuba muli ine akekala mu caloKabili akekala mu lupili lwandi ulwa mushilo.+
14 Kukaba uukalanda ati, ‘Pangeni, pangeni umusebo! Wamyeni inshila!+
Mu nshila ya bantu bandi, fumyenimo ifyo bengaipununako.’”
15 Pantu Uwapulishamo uwabako umuyayaya,+Kabili uwakwata ishina lya mushilo+ alanda ati:
“Njikala ukwasansuka kabili ukwa mushilo,+Njikala pamo na bacula na baicefya,Pa kuti nsansamushe ababa no bulandaKabili nsansamushe imitima ya bacula.+
16 Pantu nshakatwalilile ukubalwishaKabili nshakatwalilile ukubafulilwa;+Pantu umupashi wa muntu kuti wanaka pa mulandu wandi,+Ne fya mweo ifyo napanga na fyo kuti fyanaka.
17 Nalikalipe pa membu isho alecita pa kuti anonke ifyuma mu bucenjeshi,+E ico nalimumine, nalifishile icinso candi, kabili nalikalipe.
Lelo atwalilile fye ukucita ifya bucipondoka,+ alekonkelela umutima wakwe.
18 Nalimona ifyo acita,Lelo nkamundapa+ kabili nkamutungulula+Nkalenga akasansamuke+ na kabili pamo na bo aloosha nabo.”+
19 “Ndepanga icisabo ca milomo.
Nkalenga uwaba ukutali no waba apepi+ bakatwalilile ukuba no mutende,” e fyo Yehova alanda.“Kabili nkamundapa.”
20 “Lelo ababifi baba nga bemba iitwalilila fye ukululunkana,Iishingaba tondolo, kabili amenshi ya iko yatwalilila fye ukwimya ifimenwa fya muli bemba na matipa.
21 Ababifi+ tabali no mutende,” e fyo Lesa wandi alanda.
Amafutunoti
^ Nelyo kuti yapilibula no kuti, “Nabamusenda ukumufumya ku bucushi.”
^ E kutila, nababasenda mu mfwa.
^ E kutila, balatuusha mu nshiishi.
^ Nelyo “Bushe ifi ucita kuti fyansansamusha.”
^ Nalimo ico balelandapo cimpashanya ca bwamba bwa mwaume ico balebomfya mu kupepa kwa bufi.
^ Nelyo kuti yapilibula no kuti, “imfumu.”
^ Nelyo “Sheol,” e kutila, inshiishi ya bantu bonse. Moneni Amashiwi ya mu Baibo ne fyo Yapilibula.
^ Mu ciHebere, “E co ushinakila.”
^ Nelyo “no kufisa ifyo wacita?”
