Esaya 49:1-26
49 Umfweni ifyo ndelanda mwe fishi,Kabili bikeniko amano ku fyo ndelanda mwe nko+ ishaba ukutali.
Yehova alinjitile ilyo nshilafyalwa.*+
Ilyo nali mwi fumo muli mayo alilumbwile ishina lyandi.
2 Alengele akanwa kandi kaba ngo lupanga ulwatwa;Alimfisa mu cintelelwe ca kuboko+ kwakwe.
Alengele naba umufwi uo banoona;Alimfishile mu cola cakwe ica mifwi.
3 Anjebele ati: “Uli mubomfi wandi, we Israele,+Muli iwe e mo nkalangila ubucindami+ bwandi.”
4 Lelo nalandile nati: “Nacucutikila apa fye.
Nabomfya amaka yandi ku fishaba kantu, naonawile fye amaka.
Lelo uumpingula ni Yehova,*Na malipilo yandi* yafuma kuli Lesa wandi.”+
5 E ico nomba Yehova, uwampangile mwi fumo pa kuti mbe umubomfi wakwe,Anjebele ukuti nkabweseshe Yakobo kuli ena,Pa kuti nkalonganike Israele kuli ena.+
Nkacindamikwa mu menso ya kwa Yehova,Kabili Lesa wandi akaba e maka yandi.
6 Kabili anjebele ati: “Taufwile fye ukuba umubomfi wandiUwakwimya imikowa ya kwa YakoboKabili uwakubwesha abena Israele abacingililwe.
Lelo nakulenga no kuti ube ulubuuto ulwa nko,+Pa kuti ukupususha kwandi kufike na ku mpela she sonde.”+
7 Yehova Kalubula wa kwa Israele, Uwa Mushilo+ wakwe, aeba uo basuula,*+ uo inko shapata, umubomfi wa bakateka ati:
“Imfumu shikamona no kwima,Ne ntungulushi shikakontamaPa mulandu wa kuti shikacindika Yehova uwaba ne cishinka,+Uwa Mushilo uwa kwa Israele, uwakusala.”+
8 Yehova alanda ati:
“Mu nshita nali ne cikuuku kuli iwe* nalikwaswike,+Kabili mu bushiku bwe pusukilo nalikwafwile;+Nalekucingilila pa kuti ube icipangano pa kati ka ine na bantu,+Pa kuti ukalenge icalo cikabe nge fyo cali kale,Pa kuti ukabalenge bakekale mu mpanga yabo iya bupyani iyashala icibolya,+
9 Pa kuti ukebe abafungwa auti, ‘Fumeni!’+
Kabili ukebe ababa mu mfifi auti, ‘Fumeni mu mfifi+ pa kuti bamumone!
Mu mbali ya misebo e mo bakalalya umulemfwe,Mu nshila shonse ishasebeka* mukaba umulemfwe uo bakalalya.
10 Tabakomfwe insala nangu ukumfwa icilaka,+Kabili icikabilila nelyo akasuba tafyakaboce.+
Pantu uwababelela uluse akabatungulula,+No kubatwala ku tumfukumfuku twa menshi.+
11 Nkalenga impili shandi shonse shikabe imisebo,Kabili imisebo yandi iikalamba bakaipisha apasansuka.+
12 Moneni! Aba balefuma ukutali sana,+Kabili moneni! aba balefuma ku kapinda ka ku kuso na ku masamba,Kabili aba balefuma ku calo ca Sinimu.”+
13 Sekeleleni mwe myulu, kabili sansamuka we sonde.+
Impili nashisansamuke.+
Pantu Yehova nasansamusha abantu+ bakwe,Kabili naumfwila uluse abantu bakwe abalecula.+
14 Lelo Sione alanda ati:
“Yehova nandekelesha,+ kabili Yehova nandaba.”+
15 Bushe umwanakashi kuti alaba umwana wakwe uonka?Nelyo bushe kuti afilwa ukumfwila uluse umwana wa mwi fumo lyakwe?
Nangu aba banakashi bengalaba abana babo, ine nshakakulabe.+
16 Mona! Nalikulemba mu ndupi shandi.
Ifibumba fyobe fiba lyonse pa ntanshi yandi.
17 Abana bobe ba-angufyanya ukubwela.
Aba kubongolola kabili abakonawile bakafuma kuli iwe.
18 Inuna amenso yobe no kulolesha konse konse.
Balelongana pamo.+
Baleisa kuli iwe.
“Na pali ne mwine,” e fyo Yehova alanda,“Ukabafwala bonse nge fibekobekoKabili ukabakobeka pa mubili obe nga filya nabwinga aikobeka ifya kuiyemfeshako.
19 Nangu ca kuti ififulo fyobe balifyonawile kabili fyashele ifibolya,+Kabili icalo cobe baliconawile, nomba cikacepela abekalamo,+Kabili abakuminine+ bakaba ukutali sana.+
20 Abana abafyelwe ilyo wafwililwe abana bakalanda ninshi uleumfwako abati,‘Cino cifulo nacitucepela.
Tukushisheniko pa kuti tuleikalamo.’+
21 Kabili ukalanda mu mutima obe auti,‘Mwaume nshi uwamfyalila aba bana?Apo nalifwilwa abana kabili nshikwata abana,Balinsenda mu kuyaba nkole kabili ndi mufungwa,
Nani uwakusha aba abana?+
Mona! Nashele neka,+Inga aba abana bafuma kwi?’”+
22 Shikulu Mulopwe Yehova alanda ati:
“Mona! Nkemisha inko ukuboko kwandi,Kabili nkemisha inko icishibilo candi.
Shikaleta abana bobe abaume ninshi bali mu minwe ya shiko*+Kabili shikasendela abana bobe abanakashi pa mabeya+ ya shiko.
23 Imfumu e shikalakubombela,+Kabili abana bashiko abanakashi e bakalasunga abana bobe.
Bakakukontamina, bakafishe ne mpumi shabo panshi+Kabili bakamyanga ulukungu ku makasa+ yobe,Kabili ukeshiba ukuti nine Yehova;Abancetekela tabakekatwe insoni.”+
24 Bushe abo umwaume wa maka aikata kale, kuti babapokolola,Nelyo bushe abo basenda bunkole ku munkalwe, kuti babapususha?
25 Lelo Yehova alanda ati:
“Na bo umwaume wa maka aikata nkabapokolola,+Kabili abo basenda mu kuba bankole ku munkalwe, nkabapususha.+
Nkalwisha abakulwisha,+Kabili nkapususha abana bobe.
26 Nkalenga abakucusha bakalye imibili yabo,Kabili bakakolwa umulopa wabo, kwati banwene umwangashi uwalowa.
Kabili abantu bonse* bakeshiba ukuti nine Yehova,+Uukupususha+ kabili Kalubula+ obe,Uwa Maka nga nshi uwa kwa Yakobo.”+
Amafutunoti
^ Mu ciHebere, “ilyo nali mwi fumo.”
^ Nelyo “Yehova akaba no mulinganya pa kumpingula.”
^ Nelyo “icilambu candi.”
^ Nelyo “uo basuula umweo wakwe.”
^ Nelyo “Mu nshita nalekucitila ifisuma.”
^ Nelyo kuti yapilibula no kuti, “pa tupili tonse apashaba ifimenwa.”
^ Mu ciHebere, “ninshi bali pa cifuba ca shiko.”
^ Mu ciHebere, “iminofu yonse.”
