Esaya 53:1-12
53 Nani uwacetekela ifyo aumfwile kuli ifwe?*+
Kabili nani uo Yehova+ asokolwela+ ukuboko kwakwe?
2 Akesa nga kamusambo+ pa ntanshi yakwe,* ngo mushila mu mpanga iyauma.
Tamoneke nga shimucindikwa, nelyo umukankaala;+Nga twamulolesha ifyo amoneka tafilenga twamutemwa.*
3 Abantu+ balimusuulile kabili balemukankamba,Aleishiba ifyo umuntu aleumfwa nga alekalipwa kabili alishibe fyonse pa malwele.
Cali kwati icinso cakwe balicifishile pa kuti twimumona.*
Abantu balimusuulile kabili twalemumona ukuti tacindama.+
4 Cine cine alisendele amalwele+ yesu,Kabili asendele no kukalipwa.+
Lelo twalemumona ngo walwala, uo Lesa akanda kabili uwacula.
5 Lelo ico bamulashiile+ ni pa mulandu wa filubo fyesu;+Aliculile nga nshi pa mulandu wa membu shesu.+
Balimukandile pa kuti tube no mutende,+Kabili ifilonda fyakwe e fyalengele tupole.+
6 Bonse twalelulumba+ fye nge mpaanga,Cila muntu aleya mu nshila yakwe,Kabili Yehova alengele ulubembu lwesu lonse lube pali ena.+
7 Balemucusha,+ kabili aleleka balemucusha,+Lelo taleasamuna akanwa kakwe.
Bamutwele nge mpaanga iyo baleya mu kwipaya,+Ali nge mpaanga iikota iikala tondolo ilyo baleibeya amasako,Taleasamuna akanwa kakwe.+
8 Pa mulandu wa kuti balimucushishe no kumufyenga, balimusendele;Kabili nani ukabika amano ku kwishiba intuntuko yakwe?*
Pantu balimufumishe mu calo ca ba mweo;+Pa mulandu wa filubo fya bantu bandi, balimumine ifikoti.*+
9 Kabili bamupeele icifulo ca kumushiikamo* pamo na babifi,+Kabili ilyo afwile+ bamushikile pamo na bakankaala,*Nangu ca kuti tacitilepo ifyabipa*Kabili tatalile alandapo+ ifya bucenjeshi.
10 Lelo kwali kufwaya kwa kwa Yehova ukuti bamushonaule,* kabili alilekele alwala.
Nga mwatuula ubumi* bwakwe ngo mutuulo+ wa pa lubembu,Akamona abana* bakwe, akatantalisha inshiku shakwe,+Kabili Yehova akafikilisha+ ifyo afwaya ukupitila muli ena.
11 Pa numa ya kucula sana,* akatemwa ifyo akamona.
Umubomfi wandi+ uwalungama, akabomfya ifyo aishiba,Pa kulenga abantu abengi+ bakabe abalungama,Kabili akasenda+ imembu shabo nge cipe icafina.
12 Pa mulandu wa ifi nkamupeela icakaniko pamo na bengi,Kabili akaakana na ba maka ifyo bapokolwele abo bacimfishe,Pa mulandu wa kuti aitulwile ubumi* bwakwe ukufika fye na lintu afwile+Kabili bamupeendele pamo na babembu;+Asendele imembu sha bantu abengi,+Kabili apapatileko ababembu.+
Amafutunoti
^ Nelyo kuti yapilibula no kuti, “ifyo twaumfwile.”
^ Uyu afwile muntu onse uulemumona nelyo ni Lesa.
^ Nelyo “tamoneka bwino ica kuti tatumufwaya no kumufwaya.”
^ Nelyo kuti yapilibula no kuti, “Ali ngo muntu uo abantu bashalefwaya ukulolesha.”
^ Nelyo “balimumine imfwila.”
^ Nelyo “ku nkulilo yakwe.”
^ Nelyo “Kabili umo akamupeela icifulo ca kumushiikamo.”
^ Mu ciHebere, “umukankaala.”
^ Nelyo “tali no lukakaala.”
^ Nelyo “Lelo Yehova alitemenwe ukuti bamushonaule.”
^ Mu ciHebere, “ulubuto.”
^ Nelyo “umweo.”
^ Nelyo “pa numa umweo wakwe wacula sana.”
^ Nelyo “apongolwele umweo wakwe.”
