Yobo 21:1-34
21 E lyo Yobo ayaswike no kutila:
2 “Umfweni amashiwi yandi,No kuleka yamusansamushe.
3 Ndoleleni, na ine nalalanda;Kabili ilyo napwa ukulanda e lyo na imwe umo umo musuushe.+
4 Bushe ine ni ku muntunse ndeilishanya?Nga cinshi umutima wandi utekanishishe?
5 Losheni ifinso fyenu kuli ine, no kupapa,Kabili ikateni iminwe pa kanwa.+
6 Kabili ilyo naibukisha e lyo nsakamana,Kabili ukututuma kwaikata umubili wandi.
7 Nga kanshi cinshi ico ababifi babela no mweo,+Cinshi bakotela no kuba abakankaala?+
8 Abana babo baikalilila ku cinso cabo,Na beshikulu babo bali pa menso yabo.
9 Mu mayanda yabo mutende weka weka, tamwaba umwenso,+Ne nkonto ya kwa Lesa tayaba pali bena.
10 Ing’ombe yabo iilume ilalenga iikota ukwimita, kabili tayonaula amenshi ya bufyashi;Ing’ombe yabo iikota ilafyala+ no kupulumuna nakalya.
11 Baleka abana babo ukufuma ngo mukuni wa mpaanga,Awe abana babo balatolauka.
12 Balasansula amashiwi yabo ilyo balelisha akaoma na nsango,+No kusamwa ku kulila kwa mutolilo.
13 Bapwishisha inshiku shabo mu kusangalala,+Kabili mu kashita akanono baya ku Nshiishi.
14 Kabili batila kuli Lesa wa cine, ‘Fumeniko kuli ifwe!+Kabili tatulefwaya ukwishiba imibele yenu.+
15 Uwa Maka Yonse nani, pa kuti tulemubombela,+Cinshi tukasangamo pa kupalamina kuli ena?’+
16 Moneni! Tabakwata amaka pa busambashi bwabo.+Ukupanda amano kwa babifi kwataluka kuli ine.+
17 Bushe miku inga inyali ya babifi ikashima,+Kabili miku inga ububi bukabeshila?Miku inga Lesa atuma ubonaushi pa mulandu wa bukali bwakwe?+
18 Miku inga baba nge mpimbili ishululuka ku mwela,+Kabili nge misungu iisendwa ku nkuuka?
19 Lesa akabikila abana ba mubifi ubucushi bwakwe;+Akamulambula pa kuti eshibe.+
20 Amenso yakwe yakamona ukubotelela kwakwe,Kabili akanwena ku bukali bwa Wa Maka Yonse.+
21 Pantu pa numa busuma nshi akasangamo mu ng’anda yakwe,Apo impendwa ya myeshi yakwe ikacefiwamo imiku ibili?+
22 Bushe akasambilisha Lesa amano,+Apo Ena e upingula aba pa muulu?+
23 Uyu akafwa ninshi acili na maka yakwe yonse,+Ilyo ali umutende kabili ukwabula amasakamika;
24 Ilyo amatanta yakwe yaba fye amafuta yeka yekaNo bufyompo bwa mu mafupa yakwe tabulauma.
25 No yu umbi akafwa no mutima uwasashilaIlyo ashilalyapo ifisuma nakalya.+
26 Bakasendama pamo mu lukungu+Ne mititi ikabafimba bonse.+
27 Moneni! Ninjishiba bwino amatontonkanyo yenuNa mapange yabi ayo mufwaya ukumfyengelako.+
28 Pantu mwipusha amuti, ‘Ili kwi ing’anda ya mukankaala,Kabili amatenti yaba kwi, umwaikala ababifi?’+
29 Bushe tamwaipusha abapitanshila?Ne fishibilo fyabo bushe tamufibebeta,
30 Pa kuti pa bushiku bwa bubi umubifi alapusuka,+Pa bushiku bwa kububuka mu bukali bushe akapokololwa?
31 Nani uukamwebelapo imibele yakwe?+Ne co ena acita nani akamukandilapo?+
32 Awe bakamutwala ku nshiishi,+Na pa luputa lwakwe bakabikapo bamalonda.
33 Ifibungulubwe fya ku mumana fikamuwamina,+Kabili pa numa yakwe pakakonka abantu bonse,+Kabili abamutangilile bena te ba kupenda.
34 Kanshi ukunsansamusha mulensansamusha kwa fye,+Na mu kwasuka kwenu tamuli icishinka nangu panono!
