Ɛɛn, mɛn wunmuan’n nun’n, Zoova i Lalofuɛ bla miliɔn kpanngban be kle sran’m be like. Bla kpanngban sɔ’m be bo Ɲanmiɛn Sielɛ’n i jasin fɛ’n. Jue Mun 68:11 kannin bla sɔ’m be ndɛ seli kɛ: “Zoova kan ndɛ, bla nga be bo jasin fɛ’n be ti sonja kpanngban kpa.”

Sanngɛ junman nga Zoova i Lalofuɛ bla sɔ’m be di’n ɔ nin junman nga bla nga be kan Ɲanmiɛn ndɛ asɔnun onga’m be nun’n be di’n timan kun. Ngbaciɛ dan kpa o be afiɛn. ?Ngbaciɛ sɔ’n yɛle benin?

Sran nga be kan Ɲanmiɛn ndɛ kle be’n be timan kun. Asɔnun onga’m be nun’n, bla’m be dun sran’m be ɲrun mmua asɔnun’n nun. Kpɛkun be nga be kle be like’n be dan lika be ti be asɔnun’n i nunfuɛ. Sanngɛ Zoova i Lalofuɛ’m be liɛ’n, be nga bla’m be kan Ɲanmiɛn ndɛ kle be’n, be dan lika be timan be asɔnun’n i nunfuɛ. Kɛ bé kán Ɲanmiɛn ndɛ awloawlo’m be nun’n nin lika uflɛ’m be nun’n, yɛ be wun sran sɔ mun-ɔn.

Sa kun ekun nga ti yɛ junman nga Zoova i Lalofuɛ bla’m be di’n ɔ nin junman nga asɔnun onga’m be nun bla’m be di’n timan kun’n, yɛle junman nga be di i asɔnun’n nun’n. Asɔnun onga’m be nun’n, bla nga be kan Ɲanmiɛn ndɛ’n be kle sran’m be like asɔnun’n nun yɛ be man be afɔtuɛ. Sanngɛ Zoova i Lalofuɛ’m be liɛ’n, sɛ yasua nga be yoli be batɛmun be o lɛ’n, bla’m be kleman like asɔnun’n nun. Saan yasua nga be sieli be like klefuɛ’n yɛ be di i sɔ junman’n niɔn.—1 Timote 3:2; Zaki 3:1.

Biblu’n kle kɛ yasua’m be ngunmin yɛ ɔ fata kɛ be yo asɔnun’n i sunianfuɛ-ɔ. Maan e nian ajalɛ nga kɛ akoto Pɔlu klɛ́ i niaan Titi i fluwa’n ɔ kleli i’n. Ɔ seli kɛ: “N yacili wɔ Klɛti lɔ naan […] a sie asɔnun kpɛnngbɛn klɔ’m be su.” Pɔlu seli ekun kɛ sran nga bé síe asɔnun’n kpɛnngbɛn’n ɔ fata kɛ “ɔ yo sran mɔ be kwlá sacimɛn i wun’n, mɔ i yi’n ti kunngba’n.” (Titi 1:5, 6) Kɛ ɔ́ klɛ́ Timote i fluwa’n ɔ kannin ndɛ kunngba’n wie. Ɔ seli kɛ: “Sɛ sran kun kunndɛ kɛ ɔ́ dí asɔnun sunianfuɛ junman’n, nn junman kpa yɛ ɔ kunndɛ kɛ ɔ́ dí-ɔ. I sɔ’n ti’n, maan asɔnun sunianfuɛ’n ɔ yo sran mɔ be kwlá sacimɛn i wun kaan sa’n. Maan ɔ yo sran mɔ i yi’n ti kunngba’n, […] yɛ maan ɔ si like kle.”—1 Timote 3:1, 2.

?Ngue ti yɛ yasua mun ngunmin yɛ be dun asɔnun’n i ɲrun mmua-ɔ? Pɔlu seli kɛ: “N kplinman su kɛ bla kle like annzɛ ɔ sie yasua. Sanngɛ maan ɔ tran diin titi. Afin Adan yɛ Ɲanmiɛn dun mmua yili i-ɔ. I sin yɛ ɔ yili Ɛvu-ɔ.” (1 Timote 2:12, 13) Kɛ mɔ Ɲanmiɛn dun mmua yili yasua’n ka naan w’a yi bla’n ti yɛ ɔ seli kɛ yasua mun yɛ ɔ fata kɛ be kle like yɛ be nian asɔnun’n su’n niɔn.

Zoova i Lalofuɛ’m be nian Zezi Klisi m’ɔ ti be Ɲrun Dinfuɛ’n i ajalɛ’n su. Liki klɛli junman nga Zezi dili’n i su ndɛ kɛ: “Ɔ ɔli klɔ dandan nin klɔ kanngan’m be su, ɔ kannin Ɲanmiɛn Sielɛ’n i ndɛ, kpɛkun ɔ boli i jasin fɛ’n.” I sin’n Zezi sunmɛnnin i sɔnnzɔnfuɛ mun kɛ be ko di junman kunngba’n. Ɔ maan “be ɔli klɔ kanngan’m be su. Lika kwlaa nun’n, be bo jasin fɛ’n.”—Liki 8:1; 9:2-6.

Andɛ’n Zoova i Lalofuɛ’m be lɔ’n, i yasua-o, i bla-o be wla be wun ase kpa be di junman nga Zezi kɛnnin i ndɛ’n. Ɔ seli kɛ: “Bé wá bó Ɲanmiɛn Sielɛ’n i jasin fɛ nga asiɛ wunmuan’n su, naan be ti i nvlenvle’m be kwlaa be nun. I sin yɛ mɛn’n wíe-ɔ.”—Matie 24:14.