“An Pagsugot Maoroopay kay han Paghalad”
HI Saul an siyahan nga hadi han kadaan nga Israel. Bisan kon an tinuod nga Dios an nagpili ha iya, ha urhi nagin diri masinugtanon hiya.
Ano an mga sayop nga nabuhat ni Saul? Puydi ba adto niya malikyan? Ano an kapulsanan han pag-usisa han iya kinabuhi?
Iginpahibaro ni Jehova an Iya Ginpili nga Hadi
Antes hi Saul magin hadi, hi propeta Samuel an representante han Dios ha Israel. Yana lagas na hi Samuel, ngan diri matinumanon an iya mga anak. Sugad man, an Israel gintatarhog han ira mga kaaway. Han an mga tigurang hito nga nasud naghangyo kan Samuel nga magpili hin hadi nga maghuhukom ngan mangunguna ha ira ha girra, ginsugo hiya ni Jehova nga dihogan hi Saul sugad nga ira lider ngan nagsiring: “Hiya magluluwas han akon katawohan tikang ha kamot han mga Pilisteohanon.”—1 Sam. 8:4-7, 20; 9:16.
Hi Saul “gwapo ngan batan-on.” Pero diri la ito an hinungdan nga ginpili hiya. Mapainubsanon liwat hiya. Pananglitan, hi Saul nagpakiana kan Samuel: “Diri ba ako usa nga Benjamitanhon, han gigugutiayi han mga tulin ha Israel? Ngan an akon panimalay an gigugutiayi han mga panimalay han tulin ni Benjamin? Busa kay ano nga nagyakan ka hin sugad hini nga kahimtang?” Waray ighambog ni Saul an iya kalugaringon ngan an iya pamilya, bisan kon an iya tatay nga hi Kis “riko ngan harangdon gud.”—1 Sam. 9:1, 2, 21; Maopay nga Sumat.
Tagda liwat an reaksyon ni Saul han iginpahibaro ni Samuel ha publiko an ginpili ni Jehova nga hadi ha Israel. Antes hito, gindihogan ni Samuel hi Saul ha pribado ngan ginsidngan: “Ikaw magbubuhat sugad nga an higayon mag-aalagad ha imo; kay an Dios upod ha imo.” Katapos, gintirok ni Samuel an mga tawo basi ipahibaro ha ira an ginpili ni Jehova nga hadi. Kondi han iginpahibaro na ito, hi Saul waray hiagii. Tinago hiya kay naawod. Igintutdo ni Jehova kon nakain hi Saul, ngan iginproklamar hiya nga hadi.—1 Sam. 10:7, 20-24.
Durante han Girra
Waray pag-iha ginpamatud-an ni Saul nga sayop an bisan hin-o nga bangin nagruruhaduha han iya kwalipikasyon sugad nga hadi. Han gintarhog han mga Amonitanhon an usa nga bungto ha Israel, ‘an espiritu han Dios kinada ha makusganon kan Saul.’ May awtoridad nga nagsugo hiya nga tirukon an kasundalohan han nasud, gin-organisa hira, ngan ginpangunahan nga magin madaugon ha girra. Kondi iginhatag ni Saul ha Dios an kadayawan han ira pagdaog. Hiya nagsiring: “Niyan nga adlaw hi Jehova nagbuhat hin pagluwas han Israel.”—1 Sam. 11:1-13.
Hi Saul may mag-opay nga kalidad ngan ginbendisyonan hiya han Dios. Ginkilala liwat niya an gahum ni Jehova. Kondi, an padayon nga kalamposan han mga Israelita ngan han ira hadi nadepende ha usa nga importante gud nga butang. Hi Samuel nagsiring ha mga Israelita: “Kon kamo mahadlok kan Jehova, ngan mag-alagad ha iya, ngan mamati han iya tingog, ngan diri kamo sumuki han sugo ni Jehova, ngan kamo ngan an hadi man nga naghahadi ha iyo magmasumurunod ni Jehova nga iyo Dios, maopay.” Ano an iginpasarig ha mga Israelita kon magmatinumanon hira ha Dios? “Hi Jehova diri mabaya han iya katawohan tungod la han iya harangdon nga ngaran,” siring ni Samuel, “tungod kay nakalipay kan Jehova an paghimo ha iyo nga iya katawohan.”—1 Sam. 12:14, 22.
Tikang hadto tubtob yana, an pagkamasinugtanon importante gud basi uyonan han Dios. Kon ginsusunod han mga alagad ni Jehova an iya mga sugo, ginbibendisyonan niya hira. Kondi ano man kon diri hira sumugot kan Jehova?
“Nagbuhat Ka hin Linurong”
An sunod nga ginbuhat ni Saul kontra ha mga Pilisteohanon nakaaghat ha ira nga masina hinduro. An ira kasundalohan nga “sugad hin baras nga aada ha baybayon hin kadamu” nakig-away kan Saul. ‘Nakita han kalalakin-an ha Israel nga hira nakada ha kapigitan kay an mga tawo mabidoon, dida hito an katawohan nanago ha mga lungib, ngan ha kakayawan, ngan ha mga bato, ngan ha mga habohabon, ngan ha mga atabay.’ (1 Sam. 13:5, 6) Ano an bubuhaton ni Saul?
Ginsidngan ni Samuel hi Saul nga magkita hira ha Gilgal, kay didto maghahalad hi Samuel. Naghulat hi Saul, kondi maiha umabot hi Samuel, ngan an kasundalohan ni Saul nagpapatlaag na. Salit naglugaring hi Saul paghalad. Katapos gud niya buhaton ito, inabot hi Samuel. Pakasabot ni Samuel han ginbuhat ni Saul, hiya nagsiring: “Nagbuhat ka hin linurong; waray ka pagbantay han sugo ni Jehova nga imo Dios, nga iya iginsugo ha imo: kay yana hi Jehova nagtutukod unta han imo ginhadian dinhi ha Israel ha waray kataposan. Kondi yana an imo ginhadian diri magpapadayon: hi Jehova nangita hin iya tawo nga masunod han iya kalugaringon nga kasingkasing, ngan hi Jehova nagtanda ha iya ha pagkaprinsipe ha iya katawohan, tungod kay waray ka magbantay han kan Jehova iginsugo ha imo.”—1 Sam. 10:8; 13:8, 13, 14.
Tungod han kakulang hin pagtoo, nagparagbuot hi Saul ngan gintalapas an sugo han Dios nga hulaton hi Samuel basi hiya an maghalad. Kabaliktaran gud an ginbuhat ni Saul ha ginbuhat ni Gideon, an usa nga lider hadto han kasundalohan han Israel! Hi Jehova nagsugo kan Gideon nga ibanan an iya 32,000 nga kasundalohan tubtob nga magin 300 na la, ngan iya ito ginsunod. Kay ano? Tungod han iya pagtoo kan Jehova. Ha bulig han Dios, napirde niya an 135,000 nga kaaway. (Huk. 7:1-7, 17-22; 8:10) Bubuligan liwat unta ni Jehova hi Saul. Kondi, tungod kay diri masinugtanon hi Saul, gintikasan han mga Pilisteohanon an Israel.—1 Sam. 13:17, 18.
Kon nakakaeksperyensya hin mga kakurian, paonan-o kita nagdidesisyon? Ha mga waray pagtoo ha Dios, baga hin mas maopay an diri pagsunod ha iya mga prinsipyo. Han waray pa aabot hi Samuel, posible nga nahunahuna ni Saul nga husto an iya ginbuhat. Kondi ha mga nangangalimbasog nga uyonan han Dios, an pagsunod ha Kasuratanhon nga mga prinsipyo nga aplikado ha kahimtang amo gud an husto buhaton.
Ginsalikway ni Jehova hi Saul
Durante han usa nga pakiggirra ha mga Amalekanhon, nakasala na liwat hin seryoso hi Saul. An mga Amalekanhon ginkondenar han Dios tungod kay ira ginsulong an mga Israelita hin waray hinungdan katapos han pagbaya han mga Israelita ha Ehipto. (Eks. 17:8; Deut. 25:17, 18) Dugang pa, an mga Amalekanhon binulig ha iba ha pag-atake utro ha pinili nga katawohan han Dios ha panahon han mga Hukom. (Huk. 3:12, 13; 6:1-3, 33) Salit ginhukman ni Jehova an mga Amalekanhon ngan ginsugo hi Saul nga bungkagon hira.—1 Sam. 15:1-3.
Imbes nga sundon an sugo ni Jehova nga poohon an mga kaaway nga Amalekanhon ngan bungkagon an ira mga panag-iya, ginbihag ni Saul an ira hadi ngan waray pataya an pinakamag-opay nga hayop. Ano an nahitabo han ginkompronta hiya ni Samuel mahitungod hito? Ginbasol niya an mga tawo pinaagi ha pagsiring: “Kay isinalin han katawohan an gimamaopayi han mga karnero ngan han kabakahan nga mga lalaki, ha paghalad ngadto kan Jehova.” Katuyoan man ni Saul nga ihalad an mga hayop o diri, nagtalapas la gihapon hiya. Diri na hiya ‘gutiay ha iya kalugaringon nga mga mata.’ Salit an propeta han Dios prangka nga nagsiring nga hi Saul nagin diri masinugtanon ha Dios. Hi Samuel nagsiring: “Ikinalilipay ba ni Jehova hin sugad ka daku an mga halad nga sinunog ngan an mga halad, kay ha pagsugot han tingog ni Jehova? Kitaa, an pagsugot maoroopay kay han paghalad. . . . Tungod kay imo diniri an pulong ni Jehova, iya ka man isinikway tikang ha pagkahadi.”—1 Sam. 15:15, 17, 22, 23.
Han ginkuha ni Jehova an iya baraan nga espiritu ngan bendisyon kan Saul, usa nga “maraot nga espiritu” an nagtikang magsamok ha siyahan nga hadi han Israel. Pirme na hiya nagtatahap ngan nangangabugho kan David—an ginpili ni Jehova nga isasaliwan nga hadi ha Israel. Damu ka beses nga karuyag patayon ni Saul hi David. Han nakita niya nga “hi Jehova nag-upod kan David,” an Biblia nasiring, “hi Saul amo an kan David kaaway ha dayoday.” Ginlinanat ni Saul hi David ngan iginpapatay pa ngani an 85 nga saserdote ngan an iba pa. Salit diri urusahon nga ginsalikway hiya ni Jehova!—1 Sam. 16:14; 18:11, 25, 28, 29; 19:10, 11; 20:32, 33; 22:16-19.
Han ginsulong na liwat han mga Pilisteohanon an Israel, nangaro hin bulig hi Saul ha usa nga espiritista, pero waray ito makabulig ha iya. Kinabuwasan, grabe nga nasamad hiya ha girra ngan nag-unay. (1 Sam. 28:4-8; 31:3, 4) Mahitungod ha diri masinugtanon nga siyahan nga hadi han Israel, an Kasuratan nasiring: “Hi Saul namatay tungod han iya pagtalapas nga iya nabuhat patok kan Jehova, tungod han pulong ni Jehova, nga waray niya pagbantayi; ngan tungod liwat kay hiya nangaro hin sagdon han usa nga may tamyaw, ha pagpakiana hini, ngan waray pakiana kan Jehova.”—1 Kron. 10:13, 14.
Matin-aw nga iginpapakita han diri maopay nga ginbuhat ni Saul nga an pagsugot kan Jehova mas maopay kay han bisan ano nga halad. Hi apostol Juan nagsiring: “Amo ini an gugma han Dios, nga pagtumanon ta an iya mga sugo; ngan an iya mga sugo diri magbug-at.” (1 Juan 5:3) Hinaot diri gud naton igbalewaray inin importante nga kamatuoran: An aton nagpapadayon nga pakigsangkay ha Dios nadepende ha aton pagin masinugtanon ha iya.
[Retrato ha pahina 21]
Ha siyahan hi Saul mapainubsanon nga lider
[Retrato ha pahina 23]
Kay ano nga hi Samuel nagsiring kan Saul nga “an pagsugot maoroopay kay han paghalad”?
