An mga Naggradwar ha Gilead Nagkalakat Sugad nga Madasigon nga mga Magbabari!

“AN BABRION banos, kondi an magbabari talagsa. Busa mag-ampo kamo ha Ginoo han babrion, basi hiya magsugo hin mga magbabari ha iya babrion.” (Mateo 9:37, 38) Ito nga mga pulong may-ada espesyal nga kahulogan para ha naggradwar nga mga estudyante han ika-116 nga klase han Watchtower Bible School of Gilead samtang nag-aandam hira pagkadto ha ira mga toka sugad nga mga misyonero.

Han Sabado, Marso 13, 2004, an kabug-osan nga kadamu nga 6,684 ka tawo nagkatirok ha Watchtower Educational Center ha Patterson, New York, ngan ha dugang pa nga mga lokasyon han Bethel diin iginpasalida ha telebisyon an programa han gradwasyon, nga hito nga panahon an klase kinarawat hin mga tugon ngan pagdasig. Kita ngatanan makakapahimulos ha sagdon nga iginhatag, samtang madasigon nga nagbubuhat kita han espirituwal nga pagbari.

An pagtikang nga pakigpulong ha programa ni Theodore Jaracz, usa nga membro han Nagmamando nga Lawas ngan naggradwar ha ikapito nga klase han Gilead, nagpabug-at han mga pulong ni Jesus: “Lakat . . . ngan manhimo kamo hin mga tinon-an ha ngatanan nga mga nasud.” (Mateo 28:19, 20) Angayan gud ito, tungod kay an mga naggradwar ipapadara basi mag-alagad ha 20 nga magkalainlain nga nasud! Iya ginpahinumdoman an mga estudyante nga an instruksyon tikang ha Pulong han Dios nagsasangkap gud ha ira nga magin madasigon nga mga magburuhat ha pinakaimportante nga espirituwal nga pagbari.—Mateo 5:16.

Kon Paonan-o Magin Mabungahon nga mga Magbabari

An siyahan nga mamumulong ha programa amo hi Robert Wallen, nga duok nga nagtatrabaho ha Gilead School ha sulod hin mga tuig na. Ha pagpahayag mahitungod han tema nga “An Maopay Hinduro nga Kalidad nga Pagpaid,” hiya nagsiring ha mga estudyante: “An pagpaid amo an lingguwahe nga nababatian bisan han mga bungol ngan nakikita bisan han mga buta.” Maaram gud hi Jesus han kasakit han iba ngan nangalimbasog ha pagkuha hito. (Mateo 9:36) Makakabiling an mga estudyante hin damu nga higayon basi mabuhat liwat hito—ha pagsangyaw nga buruhaton, ha kongregasyon, ha urukyan han mga misyonero, ngan ha ira mismo pag-asawa. Nag-aghat ha ira an mamumulong: “Hinaot an maopay hinduro nga kalidad nga pagpaid makita mismo ha iyo kinabuhi samtang nagsiserbi kamo ha iba. An iyo la gimaopayi nga paggawi an angayan ha adlaw-adlaw nga pagkinabuhi ha urukyan han mga misyonero. Salit, magin determinado ha pagsul-ot han pagpaid.”—Kolosas 3:12.

Sunod, nagpahayag hi Gerrit Lösch, usa nga membro han Nagmamando nga Lawas ngan naggradwar ha ika-41 nga klase han Gilead, mahitungod han ulohan nga “Mga Magwarali han Kaluwasan.” (Isaias 52:7) Basi pisikal nga maluwas an mga tawo kon bungkagon na an presente nga sistema han mga butang, kinahanglan hira magkaada husto nga kahibaro tikang ha Pulong han Dios, magpahayag ha publiko han ira pagtoo, ngan magpabawtismo. (Roma 10:10; 2 Timoteo 3:15; 1 Pedro 3:21) Kondi, an siyahan nga hinungdan ha pagpahayag han kaluwasan, diri an pagluwas ha mga tawo, kondi an pagdayaw ha Dios. Salit, ginsagda  ni Bugto Lösch an magigin mga misyonero: “Dad-a an mensahe han Ginhadian ngadto ha kasisidsiran han tuna, ngan magin madasigon nga mga magwarali han kaluwasan, an ngatanan para ha kadayawan ni Jehova.”—Roma 10:18.

“Mationan-o Ka Kalamrag?” an pakiana nga iginbangon han instruktor han Gilead nga hi Lawrence Bowen. Iya gin-unabi an mga pulong ni Jesus nga nakarekord ha Mateo 6:22 ngan gindasig an nagradwar nga mga estudyante nga tipigan nga “simple” an ira mga mata basi “maipasanag an espirituwal nga kahayag nga nagdadayaw kan Jehova ngan nakakahatag hin kapulsanan ha mga igkasi-tawo.” Tikang ha tinikangan han ministeryo ni Jesus, nagpakita hiya hin hingpit nga susbaranan may kalabotan hini pinaagi ha pagpabilin nga nakasentro ha pagbuhat han kaburut-on han Dios. An pagpamalandong ha mag-opay hinduro nga mga igintutdo han iya Amay ha iya han nakadto pa hiya ha langit nakabulig kan Jesus nga mailob an mga pagsari ni Satanas ha kamingawan. (Mateo 3:16; 4:1-11) Nagpakita hi Jesus hin bug-os nga pagsarig kan Jehova ha pagtuman han iginpabuhat han Dios ha iya. Ha sugad man nga paagi, basi malamposan an mga kakurian ha unhan, an mga misyonero kinahanglan magpadayon nga may maopay nga mga rutina han pag-aram ha Biblia ngan bug-os nga sumarig kan Jehova.

Gintapos ni Mark Noumair, usa nga instruktor han Gilead ngan naggradwar ha ika-77 nga klase han Gilead, ini nga serye han mga pahayag, nga naghihisgot mahitungod han tema nga “Hahani Kami  ha Imo Kamot.” (Josue 9:25) Iya gindasig an mga estudyante nga subaron an disposisyon han kadaan nga mga Gibeonitanhon. Bisan kon an Gibeon “daku nga bungto . . . ngan an ngatanan nga mga tawo didto magkusog,” an mga Gibeonitanhon waray mag-ungara hin kabantogan o maglaom nga an ira karuyag an masunod. (Josue 10:2) Disidido hira nga nagtrabaho sugad nga “paratiak hin kahoy ngan parakuha hin tubig” ilarom han pagdumara han mga Lebita ha pagsuporta han pagsingba kan Jehova. (Josue 9:27) Ha iba nga pagkayakan, an mga membro han naggradwar nga klase nagsiring ha Mas Daku nga Josue, hi Jesu-Kristo, “Hahani kami ha imo kamot.” Yana, samtang ira titikangan an ira mga toka ha langyaw nga mga nasud, kinahanglan karawaton nira an bisan ano nga buruhaton nga iginpapabuhat ha ira han Mas Daku nga Josue.

Mga Eksperyensya Ngan mga Interbyu

“Bug-os nga Buklara an Kasuratan” an tema han pakighisgot ni Wallace Liverance, nga naggradwar ha ika-61 nga klase han Gilead ngan usa han mga instruktor, ha usa nga grupo han mga estudyante. Ira iginsumat ngan iginpasundayag an mga eksperyensya nga ira napahimulsan ha ministeryo ha kanataran durante han ira pag-eskwela. Matin-aw nga an ira detalyado nga pag-aram han Kasuratan ha sobra lima ka bulan han pagbansay ha ira nakatugkad han ira kasingkasing ngan nakapagios ha ira nga isumat ha iba an ira hinbaroan. (Lukas 24:32) Durante han ira lima-ka-bulan nga pag-aram, naipaangbit han usa nga estudyante ha iya manghod nga lalaki an iya hinbabaroan. Nakadasig ini ha iya manghod nga pamilngon an kongregasyon ha iya lugar ngan tikangan an iya pag-aram ha Biblia. Kuwalipikado na hiya yana ha pagin diri-bawtismado nga magwarali.

Katapos hini nga mga eksperyensya, hira Richard Ashe ngan John Gibbard nag-interbyu hin pipira nga mag-iha na nga matinumanon nga mga surugoon ni Jehova, upod na an nagbibiyahe nga mga paramangno nga nakarawat hin espesyal nga pagbansay ha Watchtower Educational Center. Naggradwar hira ha nauna nga mga klase han Gilead School. An usa nahinumdom nga hi Bugto Knorr nagsiring hini durante han klase: “Ha Gilead mag-iinaram ka hinduro. Kondi kon dumaku an imo ulo, karuyag sidngon nga napakyas kami. Karuyag namon nga magtapos kamo nga may daku nga kasingkasing.” Ginsagdonan han nagbibiyahe nga kabugtoan ini nga klase nga magin makitawo, nga makibagay ha iba sugad han pakibagay ni Kristo, ngan mapainubsanon nga karawaton an bisan ano nga toka nga ihatag ha ira. An pag-aplikar hini nga sagdon waray ruhaduha nga mabulig ha bag-o nga mga misyonero nga magin mabungahon ha ira mga toka.

Lakat Sugad nga Madasigon nga mga Magbabari!

Nakahigayon an mga mamarati nga makapamati kan Stephen Lett, usa pa nga membro han Nagmamando nga Lawas. Iya iginpahayag an nangunguna nga pahayag han programa, nga may ulohan nga “Lakat Sugad nga Madasigon nga mga Magbabari!” (Mateo 9:38) Ha literal nga pagbari, limitado an panahon han pagbari. Kinahanglan nga maduruto nga magtrabaho an mga magbabari. Labaw nga importante gud ito durante han kataposan hini nga sistema han mga butang! Ha daku nga pagbari ha espirituwal, namimeligro an mga kinabuhi. (Mateo 13:39) Gindasig ni Bugto Lett an mga naggradwar, nga diri ‘maghubya ha ira buruhaton,’ kondi ‘magmaabtik ha espiritu’ ngan ‘mag-alagad ha Ginoo’ dida hinin diri na gud mauutro nga pagbari. (Roma 12:11) Ginkotar han mamumulong an mga pulong ni Jesus: “Ipaigbaw niyo an iyo mga mata, ngan tan-awa an mga kapatagan, kay magbusag na nga daan ha papagbari.” (Juan 4:35) Katapos iya ginsagda an mga naggradwar nga ipakita an ira kadasig ha pagbari pinaagi han putli nga pangalimbasog nga abuton an mga tawo ha panahon ngan ha lugar nga mabibilngan hira ngan pinaagi han pagsalingabot han ngatanan nga mga higayon ha pagsangyaw ha diri-pormal nga paagi. An pagin alerto ha paghimo hin mga higayon makakapasayon han paghatag hin epektibo nga pagpamatuod. Hi Jehova madasigon nga Dios, ngan iya ginlalaoman nga kita ngatanan masubad ha iya ngan magmamaduruto ha pagbuhat ha espirituwal nga pagbari.—2 Hadi 19:31; Juan 5:17.

Ha pagtapos han programa, ginbasa han tsirman, hi Bugto Jaracz, an mga pangumusta tikang ha damu nga sanga nga mga opisina ngan iginhatag ha mga estudyante an ira mga diploma. Ginbasa han usa han mga naggradwar an surat tikang ha klase, nga nagpapahayag hin hilarom nga apresasyon para ha pagbansay nga ira nakarawat. Matin-aw, an programa han gradwasyon han ika-116 nga klase nakaaghat ha ngatanan nga tinambong nga magin mas determinado nga magkalakat sugad nga madasigon nga mga magbabari.

[Kahon ha pahina 25]

ESTADISTIKA HAN KLASE

Kadamu han nasud nga ginrepresentaran: 6

Kadamu han nasud nga gintokahan: 20

Kadamu han estudyante: 46

Aberids nga edad: 34.2

Aberids nga mga tuig ha kamatuoran: 17.2

Aberids nga mga tuig ha bug-os-panahon nga ministeryo: 13.9

[Retrato ha pahina 26]

Ika-116 nga Naggradwar nga Klase han Watchtower Bible School of Gilead

Ha lista ha ubos, an mga rumbay may numero tikang ha unahan tipaluyo, ngan an mga ngaran iginlista tikang ha wala tipatoo ha kada rumbay.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.