Roma 9:1-33
9 Nagsusumat ako han kamatuoran mahitungod han Kristo. Diri ako nagbubuwa, kay pinaagi han baraan nga espiritu nagpapamatuod an akon konsensya
2 nga daku gud an akon kasubo ngan pirme may kasakit ha akon kasingkasing.
3 Karuyag ko nga ako na la an mahibulag ha Kristo ngan mabungkag imbes nga an akon kabugtoan, an akon mga paryente
4 nga mga Israelita. Hira an gin-ampon sugad nga mga anak ngan gintagan hin himaya, mga kasabotan, Balaud, sagrado nga pag-alagad, ngan mga saad.
5 Hira an gintikangan han kaapoy-apoyan ngan ha ira katulinan natawo an Kristo. An Dios nga gihitaasi ha ngatanan, pagdayawon unta ha kadayonan. Amen.
6 Pero diri ito nangangahulogan nga napakyas an pulong han Dios, kay diri ngatanan nga nagtikang kan Israel totoo nga “Israel.”
7 Diri liwat nangangahulogan nga tungod kay binhi hira ni Abraham, mga anak hira ngatanan, pero ini an iginsurat: “An tatawagon nga ‘imo binhi’ magtitikang kan Isaac.”
8 Karuyag sidngon nga an mga anak han katulinan ni Abraham diri amo an totoo nga mga anak han Dios, kondi an mga anak han Dios pinaagi han saad amo an gintatagad nga binhi.
9 Kay ini an iginsaad: “Ha itinanda nga panahon maabot ako ngan hi Sarah magkakaada anak nga lalaki.”
10 Pero natuman ito diri la hito nga panahon, kondi han nagburod liwat hi Rebeca hin kambal nga an amay hi Isaac nga aton kaapoy-apoyan.
11 Kay han waray pa hira matawo o magbuhat hin bisan ano nga maopay o maraot, basi an katuyoan han Dios mahitungod han pagpili magpadayon nga nadepende, diri ha mga buhat, kondi ha Iya nga nagtatawag,
12 iginsiring ini kan Rebeca: “An magurang magigin uripon han manghod.”
13 Sugad han iginsurat: “Hinigugma ko hi Jacob, pero nasisina ako kan Esau.”
14 Salit ano an masisiring naton? An Dios ba waray hustisya? Imposible gud ito!
15 Kay nagsiring hiya kan Moises: “Malolooy ako ha bisan hin-o nga karuyag ko kalooyan, ngan magpapakita ako hin pagpaid ha bisan hin-o nga karuyag ko pakitaan hin pagpaid.”
16 Salit ito nga pagpili nadepende, diri ha naghihingyap o ha nangangalimbasog,* kondi ha Dios nga may kalooy.
17 Kay mahitungod han Paraon, an Kasuratan nasiring: “Tungod hini gintugotan ko ikaw nga magpadayon nga buhi, basi gamiton ko ikaw ha pagpakita han akon gahum, ngan an akon ngaran maipasamwak ha bug-os nga tuna.”
18 Kon sugad, nalolooy hiya ha karuyag niya kalooyan, pero gintutugotan niya an iba nga magmatig-a an kasingkasing.
19 Salit masiring ka ha akon: “Kay ano nga makuri gud lipayon an Dios? Hin-o ba an makakakontra han iya kaburut-on?”
20 Pero hin-o ka ba nga nagyayakan kontra ha Dios? An butang nga ginmolde makakasiring ba ha nagmolde ha iya, “Kay ano nga sugad hini an imo paghimo ha akon?”
21 Diri ba an parahimo hin daba* an may awtoridad ha paghimo hin mga surudlan tikang ha usa la nga minasa nga lapok, an usa para ha dungganon nga paggamit ngan an usa pa para ha diri dungganon nga paggamit?
22 Salit ano man kon kaburut-on han Dios nga ipakita an iya kangalas ngan ipahayag an iya gahum ngan magpakita hin hilawig nga pagpailob ha mga surudlan nga angay kumarawat han kangalas ngan kabungkagan?
23 Ngan ano man kon ginbuhat ini basi maipahayag an iya daku nga himaya ha mga surudlan nga angay kumarawat han kalooy, nga abanse nga igin-andam niya basi magkaada hin himaya,
24 karuyag sidngon, kita, nga gintawag niya diri la tikang ha mga Judio kondi tikang liwat ha mga nasud?
25 Sugad liwat hito an ginsiring ni propeta Hosea: “An diri ko katawohan tatawagon ko nga ‘akon katawohan,’ ngan an babaye nga waray higugmaa tatawagon nga ‘hinigugma.’
26 Ngan didto ha lugar diin ginsidngan hira, ‘Diri kamo an akon katawohan,’ tatawagon hira nga ‘mga anak han buhi nga Dios.’ ”
27 Hi propeta Isaias liwat nagsinggit mahitungod han Israel: “Bisan pa magin sugad kadamu han baras han dagat an mga anak ni Israel, an nanhibilin la an matatalwas.
28 Kay hi Jehova makikigtuhay ha mga naukoy ha tuna, iya ito tatapuson ngan diri paiihaon.”
29 Sugad liwat han igintagna ni Isaias: “Kon hi Jehova nga magmarando han langitnon nga kasundalohan waray magbilin ha aton hin binhi, magigin sugad la unta kita han Sodoma ngan Gomorra.”
30 Salit ano an aton masisiring? Nga an mga tawo han mga nasud, bisan kon diri nangangalimbasog nga magin matadong, nagin matadong tungod han pagtoo.
31 Pero an Israel, bisan kon nangangalimbasog nga magin matadong pinaagi han balaud, waray nira matuman an balaud.
32 Kay ano? Tungod kay ginpangalimbasogan nira nga magin matadong pinaagi han ira mga buhat, diri pinaagi han pagtoo. Nahipakdol hira ha “bato nga hiparakdolan,”
33 sugad han nahisurat: “Nagbubutang ako ha Sion hin bato nga hiparakdolan ngan daku nga bato nga nakakatumba, kondi an natoo hito* diri mapapakyas.”
Mga footnote
^ Ha literal, “nadalagan.”
^ “Kuron” an ginagamit han iba para hini nga pulong.
^ O “ha iya.”
