Roma 15:1-33
15 Kondi kita nga magkusog sadang magpailob ha mga kaluyahan han magluya, ngan diri lipayon an aton kalugaringon.
2 Sadang lipayon han tagsa ha aton an iya igkasi-tawo para ha kaopayan ngan ha pagparig-on ha iya.
3 Kay bisan an Kristo waray magpalipay ha iya kalugaringon, kondi sugad la han ginsisiring ha Kasuratan: “Gin-ilob ko an mga pag-insulto han mga nag-iinsulto ha akon.”
4 Kay an ngatanan nga iginsurat hadto iginsurat ha pagtutdo ha aton, basi pinaagi han aton pagpailob ngan pinaagi han pagliaw tikang ha Kasuratan magkaada kita paglaom.
5 An Dios nga nagliliaw ngan nabulig ha aton basi makailob, maghatag unta ha iyo ngatanan hin disposisyon nga pariho han kan Kristo Jesus,
6 basi ha uusa nga tingog magkaurosa kamo ha pagdayaw ha Dios ngan Amay han aton Ginoo nga hi Jesu-Kristo.
7 Salit karawata niyo an usa kag usa, sugad la han pagkarawat han Kristo ha aton, basi paghimayaon an Dios.
8 Ginsusumatan ko kamo nga bisan an Kristo nagserbi ha mga tinuri basi ipakita nga an Dios pirme nagsusumat han kamatuoran, ngan totoo gud an iya mga saad ha ira kaapoy-apoyan,
9 basi paghimayaon han mga nasud an Dios tungod han iya kalooy. Sugad la han ginsisiring han Kasuratan: “Salit dayag nga dadayawon ko ikaw ha butnga han mga nasud ngan magkakanta ako hin pagdayaw ha imo ngaran.”
10 Ngan ginsiring liwat: “Magkalipay kamo mga nasud, upod han iya katawohan.”
11 An Kasuratan nasiring liwat: “Dayawa niyo hi Jehova, kamo ngatanan nga nasud, ngan papagdayawa ha iya an ngatanan nga katawohan.”
12 Ngan hi Isaias nagsiring liwat: “May usa nga maabot nga tulin* ni Jesse, ngan magmamando hiya ha mga nasud. Ha iya maglalaom an mga nasud.”
13 Hinaot an Dios nga naghahatag hin paglaom maghatag ha iyo hin daku nga kalipay ngan kamurayawan pinaagi han iyo pagsarig ha iya, basi magrig-on pa gud an iyo paglaom pinaagi han gahum han baraan nga espiritu.
14 Kombinsido ako mahitungod ha iyo, mga kabugtoan ko, nga puno liwat kamo hin pagkamaopay, sugad la nga puno kamo hin kahibaro, ngan nakakasagdon kamo ha usa kag usa.
15 Kondi prangka nga nagsusurat ako ha iyo mahitungod han pipira nga punto, basi pahinumdumon kamo utro, tungod han diri-matupngan nga pagkabuotan nga iginhatag ha akon han Dios
16 nga magin surugoon ako ni Kristo Jesus ngadto ha mga nasud. Nakikigbahin ako ha baraan nga buruhaton nga pagsangyaw han maopay nga sumat han Dios, basi an halad hini nga mga nasud karawaton ngan pagbaraanon pinaagi han baraan nga espiritu.
17 Salit may hinungdan ako nga malipay kan Kristo Jesus tungod han mga butang may kalabotan han Dios.
18 Kay diri ako magbubuot-buot ha pagsumat hin bisan ano gawas la han mga ginbuhat han Kristo pinaagi ha akon basi an mga nasud magin masinugtanon, pinaagi han akon pulong ngan buhat,
19 pinaagi han gahum han mga tigaman ngan urusahon nga mga butang, pinaagi han gahum han baraan nga espiritu, salit naisangyaw ko gud an maopay nga sumat mahitungod han Kristo tikang ha Jerusalem ngan ha palibot tubtob ha Iliricum.
20 Ha sugad hini nga paagi, nangalimbasog gud ako ha pagsangyaw han maopay nga sumat ha mga lugar nga waray pa makabati han ngaran han Kristo, basi diri ako magtindog ha pundasyon han iba nga tawo,
21 kondi sugad la han ginsisiring han Kasuratan: “An mga waray masumati mahitungod ha iya makakakita ha iya, ngan an mga waray makabati mahitungod ha iya makakasabot.”
22 Amo nga bisan kon damu ka beses nga nagplano ako, waray gud ako makakada ha iyo.
23 Pero yana waray na teritoryo hini nga mga lugar nga waray ko pa masangyawi, ngan maiha na nga naghihingyap gud ako pagkada ha iyo.
24 Salit kon magbiyahe ako ngadto ha Espanya, naglalaom ako nga makigkita ha iyo ngan maupdan niyo ako hin pipira ka distansya katapos nga makontento ako ha pakig-upod ha iyo hin madaliay.
25 Pero yana mabiyahe ako ngadto ha Jerusalem basi magserbi ha mga baraan.
26 Kay an mga aadto ha Macedonia ngan Acaya nalipay ha paghatag hin kontribusyon ha mga pobre nga kaupod han mga baraan ha Jerusalem.
27 Oo, nalipay hira ha pagbuhat hito. Ha pagkamatuod, sugad hin may utang hira ha mga baraan ha Jerusalem. Kay kon an mga nasud nakikiangbit han espirituwal nga mga butang hini nga mga baraan, obligado liwat hira nga bumulig pinaagi han ira materyal nga mga butang.
28 Salit katapos ko hito, ngan kon madara na ini nga kontribusyon* ngadto ha ira, mabisita ako ha iyo pagtikadto ko ha Espanya.
29 Maaram ako nga pagkada ko ha iyo, dara ko an damu nga bendisyon tikang ha Kristo.
30 Yana, gin-aaghat ko kamo mga kabugtoan, pinaagi han aton Ginoo nga hi Jesu-Kristo ngan pinaagi han gugma han espiritu, nga sinsero nga mag-ampo kamo ha Dios para ha akon, sugad han akon ginbubuhat,
31 nga talwason unta ako tikang ha mga diri-tumuroo ha Judea ngan malipay unta an mga baraan ha Jerusalem ha pagkarawat han akon bulig,
32 basi pinaagi han kaburut-on han Dios, malipayon nga makakada ako ha iyo ngan maparig-on kaupod niyo.
33 Makaupod unta niyo ngatanan an Dios nga naghahatag hin kamurayawan. Amen.
