Roma 10:1-21
10 Mga kabugtoan, an katalwasan han mga Israelita amo gud an ginhihingyap han akon kasingkasing ngan an ginpapangamuyo ko ha Dios.
2 Mapapamatud-an ko nga aktibo* gud hira ha pag-alagad ha Dios, pero diri uyon ha husto nga kahibaro,
3 kay diri hira maaram han basihan han Dios ha katadongan, lugod nangangalimbasog hira pag-establisar han ira kalugaringon nga paagi, salit waray hira magpasakop ha suruklan han Dios ha katadongan.
4 Kay ha Kristo natapos an Balaud, basi an ngatanan nga nagpapakita hin pagtoo magin matadong.
5 Hi Moises nagsurat nga an tawo nga nagbubuhat han matadong uyon ha Balaud mabubuhi pinaagi hito.
6 Pero mahitungod han katadongan nga resulta han pagtoo, ini an iginsurat: “Ha imo kasingkasing ayaw pagsiring, ‘Hin-o an masaka ha langit?’ karuyag sidngon, basi ilusad an Kristo,
7 o ‘Hin-o an malusad ha kahiladman?’ karuyag sidngon, basi kuhaon an Kristo tikang ha mga patay.”
8 Pero ano an ginsisiring han Kasuratan? “An pulong hirani ha imo, aada ha imo baba ngan ha imo kasingkasing,” karuyag sidngon, an “pulong” mahitungod han pagtoo nga aton iginsasangyaw.
9 Kon dayag nga ipasamwak mo ito nga ‘pulong ha imo baba’ nga hi Jesus an Ginoo, ngan magpakita ka hin kinasingkasing nga pagtoo nga ginbanhaw hiya han Dios, matatalwas ka.
10 Kay pinaagi han kasingkasing an usa nagpapakita hin pagtoo para ha katadongan, kondi pinaagi han baba an usa dayag nga nagpapahayag para ha katalwasan.
11 An Kasuratan nasiring: “Waray bisan usa nga natoo ha iya an mapapakyas.”
12 Kay waray ginpapaurog ha Judio ngan Griego, kay usa la an Ginoo han ngatanan, nga nahatag hin damu nga bendisyon ha ngatanan nga natawag ha iya.
13 Kay “an kada tagsa nga natawag ha ngaran ni Jehova matatalwas.”
14 Pero paonan-o hira matawag ha iya kon diri nira hiya gintotoohan? Ngan paonan-o hira matoo ha iya kon waray hira makabati mahitungod ha iya? Paonan-o liwat nira mababatian kon waray magsasangyaw?
15 Ngan paonan-o hira magsasangyaw kon waray hira sugoa? Sugad la han nahisurat: “Kaopay han mga tiil* han mga nagpapasamwak han maopay nga sumat mahitungod han mag-opay nga butang!”
16 Kondi, hira ngatanan waray sumugot ha maopay nga sumat. Kay hi Isaias nagsiring: “Jehova, hin-o an tinoo ha hinbatian tikang ha amon?”
17 Ngan nagkakaada la hin pagtoo katapos mabatian an pulong. Sugad man nababatian la an pulong kon may nagsasangyaw mahitungod han Kristo.
18 Kondi mapakiana ako, Nakabati hira, diri ba? Ha pagkamatuod, “hinbatian an ira tingog ha bug-os nga tuna, ngan an ira mensahe tubtob ha mga sidsid han inuukyan nga tuna.”
19 Mapakiana liwat ako, Maaram an Israel, diri ba? Hadto, hi Moises nagsiring: “Pinaagi han mga tawo han iba nga mga nasud, aaghaton ko kamo nga mangabugho. Pinaagi han lurong nga nasud, aaghaton ko kamo nga masina gud.”
20 Ngan waray kahadlok nga nagsiring hi Isaias: “Hin-agian ako han mga diri namimiling ha akon. Nagpakilala ako ha mga diri nagpapakiana mahitungod ha akon.”
21 Pero mahitungod han Israel, nagsiring hiya: “Ha bug-os nga adlaw gin-unat ko an akon mga butkon ngadto ha katawohan nga diri-masinugtanon ngan nagyayakan kontra ha akon.”
