Roma 13:1-14
13 An ngatanan nga tawo* magpasakop ha higtaas nga awtoridad, kay waray awtoridad labot la kon igintugot ito han Dios. An mga awtoridad nga aada yana iginbutang han Dios ha ira relatibo nga posisyon.
2 Salit an nakontra ha awtoridad naato ha kahikayan han Dios; an mga naato hito huhukman.
3 Kay an mga nagmamando ginkakahadlokan, diri han mga nagbubuhat hin maopay, kondi han mga nagbubuhat hin maraot. Karuyag mo ba nga diri mahadlok ha awtoridad? Padayon nga buhata an maopay ngan dadayawon ka tungod hito,
4 kay an awtoridad surugoon han Dios para ha imo kaopayan. Pero kon nagbubuhat ka hin maraot, mahadlok ka, kay may katuyoan an pagdara hito hin espada. Surugoon ito han Dios, usa nga paragbulos basi ipahayag an kangalas ha nagbubuhat hin maraot.
5 Salit kinahanglan gud nga magpasakop kamo, diri la tungod hito nga kangalas kondi tungod liwat han iyo konsensya.
6 Tungod hito nagbabayad liwat kamo hin buhis, kay mga surugoon hira han Dios basi padayon nga magserbi ha publiko para gud hini nga katuyoan.
7 Ihatag ha ngatanan an angay ha ira, an nagkikinahanglan han buhis, tagi han buhis; an nagkikinahanglan han bayad, bayari; an kinahanglan kahadlokan, kahadluki; an kinahanglan pasidunggan, pasidunggi.
8 Ayaw kamo pangutang hin bisan ano ha bisan hin-o, gawas la han paghigugma ha usa kag usa, kay an nahigugma ha igkasi-tawo nakakatuman na han balaud.
9 Kay an Balaud nga “Diri ka mag-adulteryo, Diri ka magpatay, Diri ka mangawat, Diri ka maipa,” ngan an anoman nga iba pa nga sugo ginsumaryo ha sugad hini: “Higugmaa an imo igkasi-tawo sugad ha imo kalugaringon.”
10 An tawo nga may gugma diri nagbubuhat hin maraot ha igkasi-tawo; salit an gugma an katumanan han balaud.
11 Buhata liwat ini, kay maaram kamo han panahon, nga oras na yana nga magmata kamo tikang ha pagkaturog, kay an aton katalwasan mas hirani na yana kay han panahon nga nagin mga tumuroo kita.
12 Hilarom na an kagab-ihon, ngan an adlaw hirani na. Salit bayaan naton an mga buhat nga kanan kasisidman ngan gamiton naton an mga armas han kalamrag.
13 Gumawi kita hin desente sugad han ha adlaw, diri ha karisyohan nga waray-kontrol ngan paghubog, diri ha seksuwal nga imoralidad ngan mangil-ad nga paggawi,* diri ha pag-araway ngan pangabugho.
14 Lugod, subara* an Ginoo nga hi Jesu-Kristo, ngan ayaw pagplinano para ha mga hingyap han unod.
Mga footnote
^ Ha literal, “kalag.”
^ Kitaa an “Mangil-ad nga paggawi” ha Glossary.
^ Ha literal, “isul-ot.”
