Roma 1:1-32
1 Ako hi Pablo nga uripon ni Jesu-Kristo. Gintawag ako basi magin apostol ngan ginpili ako basi magpasamwak han maopay nga sumat han Dios.
2 Ito nga maopay nga sumat nga aada ha baraan nga Kasuratan, iginsaad han Dios hadto pinaagi han iya mga propeta,
3 mahitungod han iya Anak nga natawo tikang ha binhi* ni David.
4 Pinaagi han gahum han baraan nga espiritu, iginpakilala hiya sugad nga Anak han Dios han ginbanhaw hiya. Oo, hiya hi Jesu-Kristo nga aton Ginoo,
5 nga pinaagi ha iya nakarawat ko an diri-matupngan nga pagkabuotan* ngan pagkaapostol basi maipakita han ngatanan nga nasud an pagtoo ngan pagkamasinugtanon ha iya basi pasidunggan an iya ngaran.
6 Kaupod liwat kamo hito nga mga nasud ngan gintawag liwat kamo han Dios basi magin panag-iya ni Jesu-Kristo.
7 Ha ngatanan nga aada ha Roma nga mga hinigugma han Dios nga gintawag basi magin mga baraan, nagsusurat ako:
Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan tikang ha Ginoo nga hi Jesu-Kristo.
8 Una ha ngatanan, nagpapasalamat ako ha akon Dios pinaagi kan Jesu-Kristo tungod ha iyo ngatanan, kay an iyo pagtoo gin-iiristoryahan ha bug-os nga kalibotan.
9 An Dios, nga akon gintatagan hin bug-os-kasingkasing nga sagrado nga pag-alagad pinaagi ha pagpasamwak han maopay nga sumat mahitungod han iya Anak, testigo ko nga pirme ko kamo igin-uupod ha akon mga pag-ampo.
10 Nakikimalooy ako nga kon kaburut-on han Dios, makakada na ako yana ha iyo kon posible,
11 kay naghihingyap gud ako nga makita kamo basi maipaangbit ko ha iyo an espirituwal nga regalo basi maparig-on kamo;
12 o basi magdinasigay kita pinaagi han iyo pagtoo ngan han akon pagtoo.
13 Pero karuyag ko nga hibaroan niyo, mga kabugtoan, nga damu ka beses nga nagplano ako pagkada ha iyo basi makita ko an mag-opay nga resulta han akon pagsangyaw kaupod niyo sugad man ha iba nga nasud, kondi tubtob yana may nakakaulang ha akon.
14 May utang ako ha mga Griego ngan ha mga taga-iba nga nasud, ha mga maaramon ngan ha mga diri-maaramon,
15 salit karuyag ko gud liwat ipasamwak an maopay nga sumat dida ha iyo ha Roma.
16 Diri ko iginkakaawod an maopay nga sumat. Ha pagkamatuod, ito an gamhanan nga paagi han Dios ha paghatag hin katalwasan ha ngatanan nga may pagtoo. Una ha mga Judio ngan ha mga Griego liwat,
17 kay nasasabtan han mga may pagtoo nga pinaagi han maopay nga sumat iginpapahayag han Dios an iya katadongan, ngan nagpaparig-on ini han ira pagtoo, sugad la han nahisurat: “Kondi an matadong padayon nga mabubuhi tungod han iya pagtoo.”
18 An kangalas han Dios iginpapahayag tikang ha langit kontra ha ngatanan nga pagkadiri-diosnon ngan pagkadiri-matadong han mga tawo nga nag-uulang han kamatuoran ha diri-matadong nga paagi,
19 kay gintagan hira han Dios hin supisyente nga ebidensya basi mahibaro hira mahitungod ha iya.
20 Kay an iya diri-nakikita nga mga kalidad, nga amo an iya waray kataposan nga gahum ngan pagka-Dios, klaro nga nakikita tikang pa ha paghimoa han kalibotan, kay nasasabtan ito pinaagi han mga butang nga ginhimo, salit diri hira makakagnigar.
21 Bisan kon nakilala hira ha Dios, waray nira hiya pasidunggi sugad nga Dios ngan waray nira hiya pasalamati, lugod nagin waray pulos an ira mga pangatadongan ngan nagin diri masinabuton an ira kasingkasing.
22 Bisan kon nainsister nga maaramon hira, nagin lurong hira
23 ngan imbes nga pasidunggan an waray kamatayon nga Dios, ginpasidunggan nira an imahen han namamatay nga tawo, mga tamsi, mga hayop nga upat an tiil, ngan mga nagkakamang.
24 Salit igintubyan hira han Dios ha pagbuhat uyon ha mahugaw nga hingyap han ira kasingkasing, basi diri nira pasidunggan an ira lawas.
25 Ginpili nira nga tumoo ha buwa imbes nga ha kamatuoran mahitungod ha Dios. Nagsingba hira ngan naghalad hin sagrado nga pag-alagad ha mga butang nga hinimo han Dios imbes nga ha Iya nga naghimo, nga angay dayawon ha kadayonan. Amen.*
26 Salit igintubyan hira han Dios ha maglaw-ay nga hingyap ha pakighilawas, kay ginbayaan han kababayin-an an normal nga paggamit han ira kalugaringon ngan ginbuhat an kontra ha kinaiya.
27 Sugad man ginbayaan han kalalakin-an an normal nga paggamit ha babaye ngan naglarab hira ha malaw-ay nga hingyap ha usa kag usa, an mga lalaki ha igkasi-lalaki, nagbubuhat hin mangil-ad ngan nakakarawat nira an bug-os nga sirot tungod han ira sala.
28 Tungod kay diri nira karuyag nga magkaada husto nga kahibaro mahitungod ha Dios, ginpabay-an hira han Dios nga magkaada panhunahuna nga diri niya inuuyonan, basi magbuhat han diri angay.
29 Puno hira han ngatanan nga pagkadiri-matadong, pagkamakasasala, kahakog, karaotan, kaawa, pagpatay, araway, panlimbong, pagsuspetsa; mga tsismoso hira,
30 maglibak, nangangalas ha Dios, diri-matinalahuron, mapahitas-on, hambog, nag-iimbento hin nakakadaot nga mga butang, diri-masinugtanon ha mga kag-anak,
31 waray pagsabot, diri nagtutuman han mga ginkasabotan, waray gugma ha kapamilya, ngan waray kalooy.
32 Diri la kay padayon nga ginbubuhat nira ito kondi ginkukonsinter liwat an mga nagbubuhat hito, bisan kon maaram gud hira han matadong nga sugo han Dios nga an mga nagbubuhat hito angay han kamatayon.
Mga footnote
^ O “mga anak; katulinan,” dinhi ngan ha iba nga teksto diin gin-gamit ini.
^ O “pag-uyon han Dios.”
^ Kitaa an “Amen” ha Glossary.
