Roma 12:1-21
12 Salit ginhahangyo ko kamo mga kabugtoan, pinaagi han kalooy han Dios, nga ipresentar an iyo mga lawas sugad nga halad nga buhi, baraan, ngan kinakarawat han Dios. Hito nga paagi maghahatag kamo hin sagrado nga pag-alagad nga ginagamit an iyo abilidad ha paghunahuna.
2 Ngan ayaw na kamo pagsubad han mga paagi hini nga sistema, kondi magbag-o kamo pinaagi ha pagbag-o han iyo panhunahuna, basi mapamatud-an niyo ha iyo kalugaringon an kaburut-on han Dios nga maopay, hingpit, ngan nakakalipay ha iya.
3 Kay pinaagi han diri-matupngan nga pagkabuotan nga iginhatag ha akon ginsusumatan ko an tagsa ha iyo nga diri maghunahuna mahitungod ha iya kalugaringon hin labaw kay ha angay niya hunahunaon, lugod ipakita niyo nga may maopay nga panhunahuna kamo uyon ha pagtoo nga iginhatag han Dios ha tagsa ha iyo.
4 Kay sugad la nga an aton lawas may damu nga bahin pero diri parapriho an buruhaton,
5 sugad man kita, bisan kon damu, mga bahin kita han uusa la nga lawas nga kahiusa han Kristo, ngan nakadepende ha usa kag usa.
6 Salit, tungod kay may mga regalo kita nga nagkakaiba-iba uyon ha diri-matupngan nga pagkabuotan nga iginhatag ha aton, kon regalo ito ha panagna, managna kita uyon ha pagtoo nga iginhatag ha aton.
7 Kon regalo ito ha sagrado nga buruhaton, sadang naton buhaton ini nga sagrado nga buruhaton, o an may regalo ha pagtutdo, manutdo hiya.
8 An may regalo ha pagsagdon, magsagdon hiya; an naghahatag, kinaburut-on nga maghatag; an nangunguna, maduruto nga buhaton niya ito; an nagpapakita hin kalooy, buhaton niya ito nga may kalipay.
9 An iyo gugma sadang magin sinsero.* Kangalasi an maraot, kupkop ha maopay.
10 Ha minagburugto nga gugma palanggaon niyo an usa kag usa. Manguna kamo ha pagpasidungog ha usa kag usa.
11 Magin aktibo kamo, diri maghinubya. Mapuno kamo hin kadasig pinaagi han baraan nga espiritu. Magpauripon kamo kan Jehova.
12 Magkalipay kamo tungod han iyo paglaom. Magpailob ha kasakitan. Magpadayon ha pag-ampo.
13 Maghatag kamo ha mga baraan uyon ha ira panginahanglan. Magin maabiabihon pirme.
14 Padayon nga maghangyo kamo ha Dios nga bendisyonan an mga nagtitimaraot ha iyo. Paghangyo han bendisyon ngan ayaw panhimaraot.
15 Paglipay kamo upod han mga nalilipay; pagtangis upod han mga nagtatangis.
16 Hunahunaa an iba sugad han paghunahuna niyo ha iyo kalugaringon; ayaw pagkultibar hin mapahitas-on nga panhunahuna, lugod magin mapainubsanon kamo. Ayaw kamo pagpakamaaram ha iyo kalugaringon.
17 Ayaw pagbulos hin maraot ha maraot. Buhata an maopay ha paghunahuna* han ngatanan nga tawo.
18 Kon posible, buhata an iyo gimaopayi ha pakigmurayaw ha ngatanan nga tawo.
19 Mga hinigugma, ayaw kamo pagbulos, lugod pabay-i nga an Dios an magpahayag han kangalas ha maraot nga buhat, kay nahisurat: “Akon an pagbulos, ako an mabulos, nasiring hi Jehova.”
20 Pero “kon ginugutom an imo kaaway, pakaona hiya; kon nauuhaw, painoma hiya, kay kon buhaton mo ini sugad hin tatambakan mo hin mga baga an iya ulo.”*
21 Ayaw padaog ha maraot, lugod daoga pirme an maraot pinaagi han maopay.
Mga footnote
^ Ha literal, “diri hipokrito.”
^ O “ha pagkita han.”
^ Karuyag sidngon, pahumukon an kasingkasing ngan wad-on an kasina han tawo.
