Roma 2:1-29
2 Salit bisan hin-o ka pa, may baratunon ka kon ikaw naghuhukom, kay kon ginhuhukman mo an iba ginhuhukman mo liwat an imo kalugaringon, kay ikaw nga naghuhukom nagbubuhat liwat hin sugad hito.
2 Maaram kita nga uyon ha kamatuoran an paghukom han Dios kontra ha mga nagbubuhat hito.
3 Pero ikaw nga naghuhukom ha mga nagbubuhat hito, nga amo liwat an imo ginbubuhat, naghuhunahuna ka ba nga makakalikay ka ha paghukom han Dios?
4 O gintatamay mo ba an iya hura nga pagkabuotan, pagkamainantuson, ngan hilawig nga pagpailob,* kay diri ka maaram nga tungod han pagkabuotan han Dios ginigiyahan ka niya nga magbasol?
5 Pero tungod han imo katig-a ngan pagkaada diri-mabinasulon nga kasingkasing, gin-aaghat mo an Dios nga mangalas ha imo ha adlaw han iya kangalas ngan pagpahayag han matadong nga paghukom.
6 Babalosan niya an kada tagsa sumala ha iya mga buhat:
7 kinabuhi nga waray kataposan para ha mga nagtitinguha han himaya, dungog, ngan pagkadiri-nadudunot pinaagi han padayon nga pagbuhat han maopay.
8 Pero para ha mga makiawayon ngan diri nagkikinabuhi uyon ha kamatuoran kondi nagbubuhat han diri matadong, maabot ha ira an iya kangalas ngan kasina.
9 Maabot an kasakitan ngan kasub-anan ha kinabuhi* han tagsa nga tawo nga nagbubuhat hin maraot, una ha mga Judio ngan ha mga Griego liwat.
10 Pero magkakaada himaya, dungog, ngan kamurayawan an ngatanan nga nagbubuhat hin maopay, una ha mga Judio ngan ha mga Griego liwat.
11 Kay waray ginpapaurog an Dios.
12 An ngatanan nga nakasala nga diri sakop han balaud mamamatay liwat bisan diri sakop han balaud, pero an ngatanan nga nakasala nga sakop han balaud huhukman pinaagi han balaud.
13 An matadong ha pagkita han Dios diri an mga namamati han balaud, kondi adton nagkikinabuhi uyon ha balaud amo an igpapahayag nga matadong.
14 Kay kon an mga tawo han mga nasud kinaiya nga nagbubuhat uyon ha balaud han Dios, bisan kon waray hira balaud, may balaud hira ha ira kalugaringon.
15 Iginpapakita nira mismo an kahulogan han balaud nga nahisurat ha ira kasingkasing, ngan an ira konsensya nagtitestigo liwat, ngan samtang ginhuhunahuna nira ito, gin-aakusaran o gin-aabswelto hira.
16 Mahitatabo ini kon hukman na han Dios pinaagi kan Kristo Jesus an sekreto nga mga binuhatan han katawohan. Sumala ini ha maopay nga sumat nga akon iginpapasamwak.
17 Kon Judio ka ha ngaran ngan nasarig ha balaud ngan iginrarakudaku mo an Dios,
18 ngan maaram ka han iya kaburut-on ngan nahibabaroan mo an importante nga mga butang kay gintututdoan ka tikang ha Balaud,
19 ngan kombinsido ka nga giya ka han mga buta, kalamrag han mga aada ha kasisidman,
20 magsaragdon han mga waray sarabotan, magturutdo han kabataan, ngan may pagsabot han importante nga kahibaro ngan kamatuoran nga aada ha Balaud,
21 pero ikaw nga nagtututdo ha iba, gintututdoan mo ba an imo kalugaringon? Ikaw nga nagsasangyaw nga “Diri ka mangawat,” nangangawat ka ba?
22 Ikaw nga nasiring “Diri ka mag-adulteryo,”* nag-aadulteryo ka ba? Ikaw nga nangingil-ad ha mga dios-dios, nangangawat ka ba ha mga templo?
23 Ikaw nga nagrarakudaku han balaud, gintatamay mo ba an Dios pinaagi han imo pagtalapas han Balaud?
24 Kay sugad la han nahisurat, “an ngaran han Dios ginpapasiparahan han mga nasud tungod ha iyo.”
25 Ha pagkamatuod, an pagturi mapulsanon la kon nasunod ka ha balaud, pero kon paratalapas ka han balaud, bisan kon tinuri ka, sugad hin diri ka tinuri.
26 Salit kon an diri-turi nga tawo nagtutuman han matadong nga iginpapatuman han Balaud, magigin sugad hiya hin turi bisan kon diri hiya tinuri, diri ba?
27 Bisan kon tinuri ka ngan may sinurat nga balaud, huhukman ka han tawo nga diri-turi ha pisikal nga nagtutuman han Balaud, kay paratalapas ka han balaud.
28 Kay an iya pagin totoo nga Judio diri basado ha nakikita nga hitsura, ngan an totoo nga pagin turi diri ha pisikal.
29 Pero nagigin totoo hiya nga Judio tungod han aada ha iya kasingkasing, ngan an totoo nga pagturi ginhihimo ha kasingkasing pinaagi han espiritu ngan diri pinaagi han sinurat nga balaud. Nakakarawat niya an pagdayaw, diri tikang ha mga tawo kondi tikang ha Dios.
