Roma 5:1-21
5 Salit yana nga iginpahayag kita nga matadong tungod han pagtoo, pahimulosan naton an pakigmurayaw ha Dios pinaagi han aton Ginoo nga hi Jesu-Kristo,
2 nga pinaagi liwat han pagtoo ha iya naabrihan an dalan basi makarawat naton an diri-matupngan nga pagkabuotan nga naieksperyensyahan naton yana, ngan maglipay kita tungod han paglaom nga makarawat an himaya han Dios.
3 Labot hito, maglipay kita samtang aada ha kasakitan, kay maaram kita nga an kasakitan nagriresulta hin pagpailob,
4 an pagpailob nagriresulta hin pagin inuyonan, an pagin inuyonan nagriresulta hin paglaom,
5 ngan an paglaom diri nagriresulta hin kapakyasan, kay an aton kasingkasing napupuno han gugma han Dios pinaagi han baraan nga espiritu nga iginhatag ha aton.
6 Ha pagkamatuod, samtang magluya pa kita, an Kristo namatay ha itinanda nga panahon para ha diri-diosnon nga mga tawo.
7 Kay talagsa gud la an maruruyag nga mamatay para ha matadong nga tawo, ha pagkamatuod, posible pa nga may maruyag mamatay para ha maopay nga tawo.
8 Pero iginpakita ha aton han Dios an iya gugma hini nga paagi: An Kristo namatay para ha aton samtang makasasala pa kita.
9 Salit tungod kay iginpahayag na kita nga matadong pinaagi ha dugo han Kristo, mas matatalwas kita tikang ha kangalas pinaagi ha iya.
10 Kay kon han mga kaaway pa kita, iginpahiuli kita ha Dios pinaagi han kamatayon han iya Anak, labi na gud yana nga iginpahiuli na kita, matatalwas kita pinaagi ha kinabuhi han Kristo.
11 Labot hito, naglilipay liwat kita ha Dios pinaagi han aton Ginoo nga hi Jesu-Kristo, nga pinaagi ha iya kita yana iginpahiuli ha Dios.
12 Sugad la nga pinaagi han usa nga tawo an sala sinulod ha kalibotan ngan an kamatayon pinaagi han sala, tungod hito an kamatayon inabot ha ngatanan nga tawo kay hira ngatanan nakasala.
13 Kay han waray pa an Balaud an sala nakada na ha kalibotan, pero waray gin-aakusaran nga may sala kon waray balaud.
14 Pero an kamatayon nagmando sugad nga hadi tikang kan Adan tubtob kan Moises, bisan ha mga waray pakasala pariho han pagtalapas ni Adan, nga katugbang niya nga tiarabot.
15 Pero an regalo diri pariho han pagtalapas. Kay kon damu an namatay tungod ha pagtalapas han usa nga tawo, mas dinugang pa an diri-matupngan nga pagkabuotan han Dios ngan an iya regalo nga waray bayad nga iginhahatag ha damu nga tawo pinaagi han diri-matupngan nga pagkabuotan han usa nga tawo nga hi Jesu-Kristo.
16 An resulta han regalo nga waray bayad diri pariho han resulta han pagtalapas pinaagi han usa nga tawo. Kay an paghukom katapos han usa nga pagtalapas amo an pagpahayag nga salaan an ngatanan nga tawo, pero an regalo katapos han damu nga pagtalapas amo an pagpahayag han pagkamatadong.
17 Kon tungod ha pagtalapas han usa nga tawo an kamatayon nagmando sugad nga hadi pinaagi hito nga tawo, labi na nga mabubuhi ngan magmamando sugad nga mga hadi adton nakakarawat han diri-matupngan nga pagkabuotan ngan han waray bayad nga regalo nga pagkamatadong pinaagi han usa nga tawo nga hi Jesu-Kristo.
18 Salit sugad la nga an usa nga pagtalapas nagresulta ha pagpahayag nga salaan an ngatanan nga klase hin tawo, sugad man an usa nga buhat han pagkamatadong nagresulta ha pagpahayag nga matadong an ngatanan nga klase hin tawo para ha kinabuhi.
19 Kay sugad la nga pinaagi han pagkadiri-masinugtanon han usa nga tawo, damu an nagin makasasala, sugad man pinaagi han pagkamasinugtanon han usa nga tawo, damu an magigin matadong.
20 Ngan pag-abot han Balaud, nakita nga damu an pagtalapas. Pero han pagdugang han sala, mas dinugang pa an diri-matupngan nga pagkabuotan.
21 Para ha ano nga katuyoan? Sugad la nga an sala ngan kamatayon nagmamando sugad nga hadi, sugad man an diri-matupngan nga pagkabuotan nagmamando sugad nga hadi pinaagi han katadongan nga magriresulta hin kinabuhi nga waray kataposan pinaagi han aton Ginoo nga hi Jesu-Kristo.
