Roma 7:1-25
7 Mga kabugtoan, posible ba nga diri kamo maaram (kay nagyayakan ako ha mga maaram han balaud,) nga an Balaud agaron han usa nga tawo samtang buhi hiya?
2 Pananglitan, an babaye nga inasaw-an sakop han balaud han iya bana samtang buhi an iya bana, pero kon mamatay an iya bana, diri na hiya sakop han balaud han iya bana.
3 Salit samtang buhi pa an iya bana, nag-aadulteryo hiya kon magin asawa hiya hin iba nga lalaki. Pero kon mamatay an iya bana, diri na hiya sakop han balaud han iya bana, salit diri hiya nag-aadulteryo kon magin asawa hiya hin iba nga lalaki.
4 Salit mga kabugtoan ko, kamo liwat namatay na ha Balaud pinaagi han lawas han Kristo, basi magin panag-iya kamo niya nga ginbanhaw, ngan makapamunga kita para ha Dios.
5 Tungod kay han nagkikinabuhi pa kita uyon ha mga hingyap han lawas, an makasasala nga mga hingyap nga naibuhayhag pinaagi han Balaud nagios ha aton lawas basi magkaada kita bunga nga magriresulta hin kamatayon.
6 Pero yana diri na kita sakop han Balaud, kay namatay na kita hito nga nagpugong ha aton, basi magin mga uripon kita ha bag-o nga paagi uyon ha espiritu, ngan diri ha daan nga paagi uyon ha sinurat nga balaud.
7 Salit ano an aton masisiring? Sala ba an Balaud? Diri! Ha pagkamatuod, diri ko unta hibabaroan an sala kon diri tungod han Balaud. Pananglitan, waray unta ako mahibaro mahitungod han kaipa kon an Balaud waray pagsiring: “Diri ka maipa.”
8 Pero tungod hito nga sugo, hinbaroan ko kon ano gud an sala, nga may-ada ngay-an ako han ngatanan nga klase hin kaipa, kay han waray pa balaud patay an sala.
9 Ha pagkamatuod, buhi ako hadto han waray pa an balaud, kondi pag-abot han sugo, nabuhi an sala, pero namatay ako.
10 Ngan an sugo nga naggigiya ngadto ha kinabuhi, nakita ko nga naggigiya ito ngadto ha kamatayon.
11 Kay tungod han sugo, hinbaroan ko kon ano an sala nga nagsulay ngan nagpatay ha akon pinaagi hito.
12 Salit an Balaud baraan, ngan an sugo baraan, matadong, ngan maopay.
13 Salit ito ba nga maopay nagresulta ha akon kamatayon? Waray! Kondi namatay ako tungod han sala, basi pinaagi han maopay maipakita nga an sala amo an hinungdan han akon kamatayon. Hito nga paagi, iginbuhayhag han sugo kon mationan-o karaot an sala.
14 Maaram kita nga an Balaud espirituwal, pero ako tawo la nga iginbaligya ha sala.
15 Diri ako maaram han akon ginbubuhat. Kay an akon karuyag diri ko ginbubuhat; kondi an akon nasisinahan amo an akon ginbubuhat.
16 Pero kon an diri ko karuyag amo an akon ginbubuhat, nagpapakita ito nga nauyon ako nga maopay an Balaud.
17 Kondi yana diri na ako an nagbubuhat hito, pero an sala nga aadi ha akon.
18 Maaram ako nga waray gud maopay ha akon, karuyag sidngon, ha akon lawas, kay may hingyap ako pero waray ako abilidad ha pagbuhat han maopay.
19 Kay an maopay nga karuyag ko buhaton diri ko ginbubuhat, pero an maraot nga diri ko karuyag amo an akon ginbubuhat.
20 Kon ginbubuhat ko yana an diri ko karuyag, diri na ako an nagbubuhat hito, kondi an sala nga aadi ha akon.
21 Salit nakikita ko ha akon kahimtang ini nga balaud: kon karuyag ko buhaton an husto, an maraot an aadi ha akon.
22 Ha akon kasingkasing nalilipay gud ako ha balaud han Dios,
23 pero nakikita ko ha akon lawas* nga may iba nga balaud nga nakikig-away ha balaud han akon hunahuna ngan naghihimo ha akon nga bihag han balaud han sala nga aadi ha akon mga bahin.
24 Kairo ko nga tawo! Hin-o an magtatalwas ha akon tikang hini nga lawas nga nagdadara ha akon ha kamatayon?
25 Nagpapasalamat ako ha Dios pinaagi kan Jesu-Kristo nga aton Ginoo! Salit ha akon hunahuna, ako mismo uripon han balaud han Dios, pero an akon lawas uripon han balaud han sala.
Mga footnote
^ Ha literal, “mga bahin.”
