Roma 3:1-31
3 Kon sugad, ano an bentaha han pagin Judio? O ano an kapulsanan han pagturi?
2 Daku gud. Labaw ha ngatanan, tungod kay gintaporan hira han sagrado nga mga kapahayagan han Dios.
3 Kumusta man kon an iba waray pagtoo? An ira ba kawaray pagtoo makakagwara han pagkamatinumanon han Dios?
4 Diri gud! An Dios pirme nagsusumat han kamatuoran, bisan kon an tagsa nga tawo buwaon, sugad la han nahisurat: “Basi mapamatud-an nga matadong ka ha imo mga pulong ngan magdaog kon ginhuhukman ka.”
5 Kondi kon tungod han aton pagkadiri-matadong naipapahayag an pagkamatadong han Dios, ano an masisiring naton? An Dios ba diri matadong kon nagpapahayag hiya han iya kangalas? (Nagyayakan ako ha paagi nga nasasabtan han tawo.)
6 Diri gud! Kon an Dios diri matadong, paonan-o niya huhukman an kalibotan?
7 Kon magbubuwa ako, ngan tungod hini magigin mas bantogan an kamatuoran han Dios para ha iya kadayawan, kay ano nga ginhuhukman pa ako sugad nga makasasala?
8 Kay ano nga diri kita sumiring, sugad la han pakaraot han iba nga nasiring kuno kita: “Buhaton naton an maraot basi umabot an mag-opay nga butang”? Huhukman ito nga mga tawo uyon ha hustisya.
9 Kon sugad, ano an aton mahuhunahuna? Mas maopay ba an aton kahimtang? Diri gud! Kay nag-akusar na kita nga an mga Judio ngan mga Griego uripon han sala,
10 sugad la han nahisurat: “Waray tawo nga matadong, waray bisan usa.
11 Waray bisan usa nga may pagsabot ngan waray bisan usa nga namimiling ha Dios.
12 An ngatanan nga tawo sinimang, hira ngatanan nagin waray kapulsanan. Waray bisan usa nga nagpapakita hin pagkabuotan, waray gud bisan usa.”
13 “An ira tutunlan sugad hin abrido nga lubnganan, naglilimbong hira pinaagi han ira mga dila.” “An lara han mga halas aada ha luyo han ira mga im-im.”
14 “Ngan an ira baba puno hin pamuyayaw ngan kapaitan.”
15 “An ira mga tiil nag-aapura ha pagpaagay hin dugo.”
16 “An kabungkagan ngan kasakitan aada ha ira mga dalan,
17 ngan diri hira maaram han dalan han kamurayawan.”
18 “Waray hira kahadlok ha Dios.”
19 Maaram kita nga an ngatanan nga ginsisiring han Balaud para ha mga sakop han Balaud, basi mapahilom an tagsa nga baba ngan an bug-os nga kalibotan magin angay han sirot han Dios.
20 Salit waray tawo nga igpapahayag nga matadong ha iya atubangan pinaagi ha pagsunod ha balaud, kay pinaagi han balaud nagkakaada kita husto nga kahibaro mahitungod han sala.
21 Pero yana nga diri gintutuman an balaud, an pagkamatadong han Dios naipapahayag, kay ginpapamatud-an ito han Balaud ngan han sinurat han mga Propeta.
22 Ngan an ngatanan nga may pagtoo nagigin matadong ha pagkita han Dios pinaagi han pagtoo kan Jesu-Kristo. Kay waray hiya ginpapaurog ha ngatanan nga tawo.
23 Bisan kon an ngatanan nakasala ngan diri nira naipapakita an himaya han Dios,
24 gintagan hira hin waray bayad nga regalo han iginpahayag hira nga matadong tungod han iya diri-matupngan nga pagkabuotan pinaagi han lukat nga iginbayad ni Kristo Jesus.
25 Iginhatag hiya han Dios sugad nga halad para ha pagpahiuli* pinaagi han pagtoo ha iya dugo. Ginhimo ini basi ipakita han Dios an iya pagkamatadong kay nagpailob ngan nagpasaylo hiya han mga sala nga nabuhat ha naglabay,
26 ngan basi ipakita liwat an iya pagkamatadong hini nga panahon, han iya iginpapahayag nga matadong an tawo nga natoo kan Jesus.
27 Salit, may hinungdan ba nga maghambog? Waray gud. Pinaagi han ano nga balaud? Han kanan mga buhat ba? Diri, lugod pinaagi han balaud han pagtoo.
28 Kay ginhuhunahuna naton nga an usa nga tawo iginpapahayag nga matadong pinaagi han pagtoo ngan diri pinaagi han mga buhat sugad nga pagsugot ha balaud.
29 Dios ba hiya han mga Judio la? Diri ba hiya liwat an Dios han mga tawo han mga nasud? Oo, hiya liwat an Dios han mga tawo han mga nasud.
30 Tungod kay usa la an Dios, iya igpapahayag nga matadong an mga tinuri pinaagi han pagtoo ngan igpapahayag nga matadong an diri tinuri pinaagi han ira pagtoo.
31 Salit, ginwawara ba naton an balaud pinaagi han aton pagtoo? Diri! Lugod, ginsusuportahan naton an balaud.
Mga footnote
^ O “pagbayad han sala,” an halad ha pakigmurayaw ha Dios.
