Roma 16:1-27
16 Iginpapakilala* ko ha iyo hi Febe nga aton bugto nga babaye, nga usa nga ministro ha kongregasyon ha Cencrea,
2 basi maabiabi niyo hiya sugad nga igkasi-tumuroo ha Ginoo ha paagi nga angay ha mga baraan, ngan basi maihatag niyo ha iya an anoman nga bulig nga iya kinahanglan, kay hiya liwat parapanalipod han damu nga kabugtoan pati na ha akon.
3 Ipaabot an akon pangumusta kanda Prisca ngan Aquila nga akon mga igkasi-magburuhat ha buruhaton ni Kristo Jesus.
4 Nameligro an ira kinabuhi tungod ha akon.* Diri la ako an nagpapasalamat ha ira kondi pati liwat an ngatanan nga kongregasyon han mga nasud.
5 Kumustaha liwat an kongregasyon nga nagkakatirok ha ira balay, ngan an akon hinigugma nga hi Epeneto, nga usa han una nga mga bunga ha Asia nga nagin disipulo han Kristo.
6 Kumustaha hi Maria, nga nagbubuhat hin damu nga buruhaton para ha iyo.
7 Kumustaha an akon mga paryente ngan igkasi-priso nga hira Andronico ngan Junias, nga kilala gud han mga apostol ngan mas maiha na nga kahiusa han Kristo kay ha akon.
8 Ipaabot an akon pangumusta kan Ampliato nga hinigugma ko nga bugto ha Ginoo.
9 Kumustaha hi Urbano nga aton igkasi-magburuhat ha buruhaton han Kristo, ngan an akon hinigugma nga hi Estakis.
10 Kumustaha hi Apeles, nga nalilipayan han Kristo, pati an panimalay ni Aristobulo.
11 Kumustaha hi Herodion nga akon paryente, pati an panimalay ni Narciso nga mga sumurunod han Ginoo.
12 Kumustaha hira Trifena ngan Trifosa, mga babaye nga maduruto nga nagbubuhat han buruhaton han Ginoo. Kumustaha liwat an aton hinigugma nga hi Persis, kay damu an iya ginbubuhat ha buruhaton han Ginoo.
13 Kumustaha hi Rufo nga pinili han Ginoo, pati an iya nanay nga sugad hin nanay ko liwat.
14 Kumustaha hira Asincrito, Flegonte, Hermes, Patrobas, Hermas, ngan an kabugtoan nga kaupod nira.
15 Kumustaha hira Filologo ngan Julia, hi Nereo ngan an iya bugto nga babaye, ngan hi Olimpas, ngan an ngatanan nga baraan nga kaupod nira.
16 Pagkumustahay kamo pinaagi han minagburugto nga harok. Ginkukumusta kamo han ngatanan nga kongregasyon han Kristo.
17 Ginsasagdonan ko kamo mga kabugtoan, nga mag-ikmat kamo ha mga naghihimo hin pagkabahin-bahin ngan mga hinungdan han kahipakdol nga diri uyon ha katutdoan nga iyo hinbaroan, ngan maglikay kamo ha ira.
18 Kay an sugad hito nga klase hin mga tawo mga uripon, diri han Kristo nga aton Ginoo, kondi han ira mga hingyap;* ngan ginlilimbongan nira an kasingkasing han mga inosente pinaagi han mga pag-ulog-ulog ngan pagdayaw.
19 An iyo pagkamasinugtanon nakikita han ngatanan, salit nalilipay ako tungod ha iyo. Pero karuyag ko nga magin maaramon kamo han maopay, kondi inosente han karaotan.
20 An Dios nga naghahatag hin kamurayawan hirani na magbungkag kan Satanas ha ilarom han iyo mga tiil. Makarawat unta niyo an diri-matupngan nga pagkabuotan han Ginoo nga hi Jesus.
21 Nangungumusta ha iyo hi Timoteo nga akon igkasi-magburuhat, sugad man hira Lucio, Jason, ngan Sosipater nga akon mga paryente.
22 Ako, hi Tercio, nga ginpasurat hini, nangungumusta ha iyo nga akon mga igkasi-sumurunod ha Ginoo.
23 Nangungumusta ha iyo hi Gayo nga nag-abiabi ha akon ha iya balay, ngan an ngatanan ha kongregasyon. Nangungumusta liwat ha iyo hi Erasto, an tinaporan han syudad, pati an iya bugto nga hi Cuarto.
24 * ——
25 Paghimayaon unta an Dios nga makakaparig-on ha iyo uyon ha maopay nga sumat nga akon iginpapasamwak ngan ha pagsangyaw mahitungod kan Jesu-Kristo, uyon ha pagpahayag han sagrado nga tinago nga waray igpahayag ha sulod hin maiha nga panahon.
26 Pero iginpahayag na ini yana ngan iginpahibaro ha ngatanan nga nasud pinaagi han mga tagna ha kasuratan uyon ha sugo han waray kataposan nga Dios basi iaghat an pagkamasinugtanon pinaagi han pagtoo.
27 An Dios, nga makinaadmananon ha ngatanan, paghimayaon unta ha kadayonan pinaagi kan Jesu-Kristo. Amen.
Mga footnote
^ O “iginrirekomenda.”
^ Ha literal, “tungod ha akon kalag.”
^ O “mga tiyan.”
^ Kitaa an footnote ha Mat 17:21.
