Roma 4:1-25
4 Kon sugad, ano an masisiring naton mahitungod han aton kaapoy-apoyan nga hi Abraham?
2 Pananglitan, kon hi Abraham iginpahayag nga matadong tungod han mga buhat, may hinungdan unta hiya ha paghambog, pero diri ha Dios.
3 Ano an ginsisiring han kasuratan? “Hi Abraham nagpakita hin pagtoo kan Jehova, ngan tungod hito iginpahayag hiya nga matadong.”
4 An bayad ha tawo nga nagtatrabaho ginhuhunahuna sugad nga utang ha iya, diri sugad nga diri-matupngan nga pagkabuotan.
5 Kondi an tawo nga diri nagbubuhat pero may pagtoo ha Iya nga nagpapahayag nga matadong ha usa nga diri diosnon, tungod han iya pagtoo iginpapahayag hiya nga matadong.
6 Mahitungod han kalipay han tawo nga iginpapahayag nga matadong han Dios bisan kon waray hiya mga buhat, nagsiring liwat hi David:
7 “Malipayon an mga ginpasaylo ha mga pagtalapas ngan adton gintabonan an mga sala.
8 Malipayon an tawo nga an sala diri na dudumdumon ni Jehova.”
9 Kon sugad, ini ba nga kalipay para la ha mga tawo nga turi o ha mga diri-turi liwat? Kay nasiring kita: “Tungod han pagtoo ni Abraham iginpahayag hiya nga matadong.”
10 Ha ano nga mga kahimtang hiya iginpahayag nga matadong? Han turi na hiya o han diri pa turi? Han diri pa hiya turi.
11 Nakakarawat hiya hin tigaman, nga amo an pagturi, sugad nga selyo* han pagkamatadong pinaagi han iya pagtoo han diri pa hiya turi, basi magin amay hiya han ngatanan nga may pagtoo samtang diri pa turi, basi tagdon hira nga matadong,
12 ngan basi magin amay hiya han tinuri nga katulinan, diri la han mga nasunod han pisikal nga pagturi, kondi han mga nasunod liwat ha dalan han pagtoo pariho han aton amay nga hi Abraham han diri pa hiya turi.
13 Diri pinaagi han balaud nakarawat ni Abraham o han iya tulin an saad nga magigin manurunod hiya hin kalibotan, kondi pinaagi han pagkamatadong tungod ha pagtoo.
14 Kay kon adton nasunod ha balaud mga manurunod, an pagtoo nagigin waray pulos ngan an saad nawawara.
15 Ha pagkamatuod, an Balaud nagriresulta hin kangalas, pero kon waray balaud, waray liwat pagtalapas.
16 Salit ito nga saad nakarawat pinaagi han pagtoo, basi magin uyon ito han diri-matupngan nga pagkabuotan, basi matuman an saad ha ngatanan nga iya tulin, diri la ha mga nasunod han Balaud kondi ha mga nasubad liwat han pagtoo ni Abraham nga amay naton ngatanan.
17 (Sugad la han nahisurat: “Akon ka ginpili nga magin amay han damu nga nasud.”) Nahitabo ini ha atubangan han Dios nga iya gintotoohan, nga nagbabanhaw han mga patay ngan nagyayakan hin mga butang nga waray pa matuman nga sugad hin natuman na.
18 Bisan kon waray hiya rason nga maglaom, may pagtoo hiya nga iginbasar ha paglaom nga magigin amay hiya han damu nga nasud, sumala ha ginsiring: “Magigin sugad kadamu an imo tulin.”
19 Ngan bisan kon waray magluya an iya pagtoo, ginhunahuna niya nga sugad hin patay na an iya lawas hito nga panahon kay mga 100 ka tuig na an iya edad, sugad man ginhunahuna niya an pagin baog ni Sarah.
20 Pero tungod han saad han Dios, waray hiya magruhaduha tungod ha kawaray pagtoo, lugod nagin makusog hiya pinaagi han iya pagtoo, ngan gindayaw an Dios
21 ngan kombinsido gud hiya nga matutuman liwat han Dios an iya iginsaad.
22 Salit “tungod hito iginpahayag hiya nga matadong.”
23 Pero an mga pulong nga “iginpahayag hiya nga matadong” iginsurat diri la para ha iya,
24 kondi para liwat ha aton nga igpapahayag nga matadong kay natoo kita ha iya nga nagbanhaw kan Jesus nga aton Ginoo.
25 Igintubyan hiya ha kamatayon tungod han aton mga pagtalapas ngan ginbanhaw basi maipahayag kita nga matadong.
Mga footnote
^ O “garantiya; kompirmasyon.”
