Roma 14:1-23
14 Karawata an tawo nga maluya an pagtoo, ngan ayaw paghukom basado ha kalugaringon nga mga opinyon.
2 An usa nga tawo may pagtoo nga makakaon niya an ngatanan, pero an tawo nga maluya mga utan la an kinakaon.
3 An nakaon diri magminos ha diri nakaon, ngan an diri nakaon diri maghukom ha nakaon, kay ginkarawat hiya han Dios.
4 Hin-o ka nga maghuhukom ha surugoon han iba? An iya pagtindog o katumba nadepende ha pagbuot han iya agaron. Oo, patitindugon hiya, kay hi Jehova makakapatindog ha iya.
5 May tawo nga naghuhunahuna nga may adlaw nga mas importante kay ha iba; may naghuhunahuna liwat nga parapriho la an ngatanan nga adlaw; an tagsa nga tawo magin kombinsido gud nga husto an iya gintotoohan.
6 An nagsiselebrar han adlaw nagsiselebrar hito para kan Jehova. Ngan an nakaon, nakaon para kan Jehova, kay nagpapasalamat hiya ha Dios; ngan an diri nakaon, diri nakaon para kan Jehova, pero nagpapasalamat hiya ha Dios.
7 Oo, nabubuhi kita diri para ha kalugaringon la, ngan mamamatay kita diri para ha kalugaringon la,
8 kay kon nabubuhi kita, nabubuhi kita para kan Jehova, ngan kon mamatay kita, mamamatay kita para kan Jehova. Salit buhi man kita o mamatay, kan Jehova kita.
9 Kay tungod hini namatay an Kristo ngan nabuhi utro basi magin Ginoo han mga patay ngan han mga buhi.
10 Pero kay ano nga ginhuhukman mo an imo bugto? O kay ano nga ginmiminos mo an imo bugto? Kay kita ngatanan matindog ha atubangan han Dios ha lingkoran ha paghukom.
11 Kay nahisurat: “ ‘Sugad la nga buhi ako,’ nasiring hi Jehova, ‘an tagsa nga tuhod maluhod, ngan an tagsa nga dila magpapahayag hin pagkilala ha Dios.’ ”
12 Salit, an tagsa ha aton may baratunon ha Dios.
13 Kon sugad, diri na kita maghukom ha kada tagsa, lugod magin disidido kamo nga diri magbutang hin hiparakdolan* o ulang ha atubangan han usa nga bugto.
14 Sugad nga sumurunod han Ginoo nga hi Jesus, maaram ako ngan kombinsido nga waray butang nga mahugaw nga daan; nagigin mahugaw la ito kon huhunahunaon han usa nga tawo nga mahugaw ito.
15 Kon napasubo mo an imo bugto tungod ha pagkaon, diri ka na nagios uyon ha gugma. Ayaw hiya daota tungod han imo pagkaon, kay namatay an Kristo para ha iya.
16 Salit, ayaw niyo pabay-i nga pakarauton an iyo maopay nga ginbubuhat.
17 Kay an Ginhadian han Dios diri nangangahulogan hin pagkinaon ngan pag-ininom, lugod nangangahulogan ito hin katadongan, kamurayawan, ngan kalipay pinaagi han baraan nga espiritu.
18 An nagpapauripon ha Kristo hini nga paagi nalilipayan han Dios ngan ginrirespeto han mga tawo.
19 Salit pangalimbasogan naton an mga butang nga nag-aaghat hin kamurayawan ngan nagpaparig-on ha kada tagsa.
20 Ayaw na niyo pagrub-a an buhat han Dios tungod la han pagkaon. Oo, an ngatanan nga butang limpyo, pero nakakaraot ito ha tawo nga nakaon kon may napapakdol.
21 Mas maopay na la nga diri kumaon hin karne, uminom hin bino, o magbuhat hin bisan ano nga nakakapakdol ha imo bugto.
22 Tipigi an imo pagtoo ha atubangan han Dios. Malipayon an tawo nga diri ginhuhukman an iya kalugaringon pinaagi han iya personal nga opinyon.
23 Pero kon nagruruhaduha hiya, ginhukman na hiya kon kumaon hiya, kay nakaon hiya diri tungod ha pagtoo. Oo, sala an ngatanan nga diri iginbabasar ha pagtoo.
Mga footnote
^ O “hinungdan ha pagluya han pagtoo.” Kitaa an “Kahipakdol” ha Glossary.
