1 Corinto 6:1-20
6 An bisan hin-o ba ha iyo nga may reklamo ha iba diri nag-aalang pagkadto ha korte ha atubangan han mga tawo nga diri matadong, ngan diri ha atubangan han mga baraan?
2 Diri ba kamo maaram nga an mga baraan maghuhukom han kalibotan? Ngan kon kamo an maghuhukom han kalibotan, diri ba may abilidad kamo ha pagsulbad han gudtiay nga butang?
3 Diri ba kamo maaram nga huhukman naton an mga anghel? Kon sugad, kay ano nga diri naton masusulbad an mga butang hini nga kinabuhi?
4 Kon may mga butang hini nga kinabuhi nga sadang gud niyo sulbaron, kay ano nga iyo ginpipili nga magin mga hukom niyo an mga lalaki nga diri ginkakarawat han kongregasyon?
5 Nagyayakan ako ha iyo basi maawod kamo. Waray ba bisan usa ha iyo nga may kinaadman nga makakahukom ha iya kabugtoan?
6 Lugod, gindadara han usa nga bugto ngadto ha korte an iya bugto, ha atubangan han mga diri-tumuroo!
7 Ha pagkamatuod, pirdi na kamo kon nagkikihaay kamo. Kay ano nga diri na la niyo pabay-an nga buhatan kamo hin sayop? Kay ano nga diri na la kamo magpalimbong?
8 Kondi nagbubuhat lugod kamo hin sayop ngan nanlilimbong, ngan ha iyo pa gud kabugtoan.
9 Diri ba kamo maaram nga an mga diri-matadong diri makakapanunod han Ginhadian han Dios? Ayaw pagpasimang.* An mga imoral, parasingba ha mga dios-dios, nag-aadulteryo,* kalalakin-an nga nagpapakababaye, mga lalaki nga nakikigrelasyon ha igkasi-lalaki,
10 mga kawatan, hakog, parahubog, parapakaraot, o mga tikasan diri makakapanunod han Ginhadian han Dios.
11 Sugad hito an iba ha iyo hadto. Pero ginlimpyohan na kamo, ginpakabaraan na kamo, iginpahayag na kamo nga matadong ha ngaran han aton Ginoo nga hi Jesu-Kristo ngan pinaagi han espiritu han aton Dios.
12 Para ha akon, an ngatanan nga butang igintutugot han balaud, pero diri ngatanan nga butang mapulsanon. Para ha akon, an ngatanan nga butang igintutugot han balaud, pero diri ako magpapauripon ha bisan ano.
13 An mga pagkaon para ha tiyan, ngan an tiyan para ha mga pagkaon, pero wawad-on ito han Dios. An lawas diri para ha imoralidad* kondi para ha Ginoo, ngan an Ginoo para ha lawas.
14 Pero ginbanhaw han Dios an Ginoo ngan babanhawon liwat kita pinaagi han iya gahum.
15 Diri ba kamo maaram nga an iyo lawas mga bahin han lawas han Kristo? Kukuhaon ko ba an mga bahin han lawas han Kristo ngan iuupod hira ha mga bahin han lawas han usa nga puta? Diri gud!
16 Diri ba kamo maaram nga hiya nga nakikigrelasyon ha puta nagigin usa nga lawas? Kay an Dios nasiring, “Hira nga duha magigin usa nga unod.”
17 Pero an kaupod han Ginoo kahiusa niya ha espiritu.
18 Palagiw ha imoralidad. An iba nga sala nga nabubuhat han usa nga tawo gawas na han iya lawas, pero an nagbubuhat hin imoralidad nakakasala ha iya kalugaringon nga lawas.
19 Diri ba kamo maaram nga an iyo lawas amo an templo han baraan nga espiritu nga aada ha iyo, nga nakarawat niyo tikang ha Dios? Salit diri na kamo an tag-iya han iyo kalugaringon,
20 kay ginpalit na kamo. Gamita gud an iyo lawas ha pagdayaw ha Dios.
Mga footnote
^ O “pagpalimbong.”
^ Kitaa an “Adulteryo” ha Glossary.
^ Kitaa an footnote ha Mat 5:32.
