1 Corinto 1:1-31
1 Tikang kan Pablo, nga gintawag nga magin apostol ni Jesu-Kristo pinaagi han kaburut-on han Dios, ngan kan Sostenes nga aton bugto,
2 para ha kongregasyon han Dios ha Corinto, ha iyo nga ginpakabaraan nga kahiusa ni Kristo Jesus, nga gintawag basi magin mga baraan, ngan ha ngatanan ha bisan diin nga natawag ha ngaran han aton Ginoo nga hi Jesu-Kristo:
3 Makarawat unta niyo an diri-matupngan nga pagkabuotan ngan kamurayawan tikang ha Dios nga aton Amay ngan ha Ginoo nga hi Jesu-Kristo.
4 Pirme ako nagpapasalamat ha Dios mahitungod ha iyo tungod han diri-matupngan nga pagkabuotan han Dios nga iginhatag ha iyo pinaagi kan Kristo Jesus,
5 kay tungod han iyo pakighiusa kan Jesus ginbendisyonan kamo han Dios han ngatanan nga butang, upod na an abilidad ha pagyakan ngan bug-os nga kahibaro.
6 Iginpapatin-aw hini nga an pamatuod mahitungod han Kristo nagpaparig-on ha iyo,
7 basi diri kamo makulangan hin bisan ano nga regalo samtang ginpapamulat gud niyo nga igpahayag an aton Ginoo nga hi Jesu-Kristo.
8 Paririg-unon liwat kamo niya tubtob ha kataposan basi waray maiakusar ha iyo ha adlaw han aton Ginoo nga hi Jesu-Kristo.
9 Matinumanon an Dios nga nagtawag ha iyo basi makaupod kamo han iya Anak nga hi Jesu-Kristo nga aton Ginoo.
10 Gin-aaghat ko kamo mga kabugtoan, ha ngaran han aton Ginoo nga hi Jesu-Kristo, nga kamo ngatanan magyakan nga may pagkauruyon ngan diri magkabahinbahin, kondi bug-os nga magkaurosa ha pariho nga hunahuna ngan opinyon.
11 Kay ginsumatan ako han iba ha panimalay ni Cloe nga nagkakabahinbahin kamo, mga kabugtoan.
12 Karuyag ko sidngon nga an kada usa ha iyo nasiring: “Ako kan Pablo,” “Pero ako kan Apolos,” “Kondi ako kan Cefas,” “Pero ako kan Kristo.”
13 Kon amo ito, an kongregasyon han Kristo nagkakabahinbahin. Hi Pablo waray igraysang para ha iyo, diri ba? O ginbawtismohan ba kamo ha ngaran ni Pablo?
14 Nagpapasalamat ako nga waray ako ginbawtismohan ha iyo labot la kan Crispo ngan kan Gayo,
15 salit waray makakasiring nga ginbawtismohan kamo ha akon ngaran.
16 Oo, ginbawtismohan ko liwat an mga sulod-balay ni Estefanas. Pero diri ako nahinunumdom kon may iba pa ako nga ginbawtismohan.
17 Ginsugo ako han Kristo, diri ha pagbawtismo, kondi ha pagpahayag han maopay nga sumat, ngan diri pinaagi han kinaadman ha pagyakan, basi diri magin waray pulos an pasakitan nga kahoy* han Kristo.
18 Kay an mensahe mahitungod han pasakitan nga kahoy kalurongan para ha mga mabubungkag, pero kapahayagan ito han gahum han Dios para ha aton nga gintatalwas.
19 Kay an Kasuratan nasiring: “Akon wawad-on an kinaadman han mga maaramon, ngan akon igbabalewaray an kahibaro han mga may hibaro.”
20 Hain an maaramon? Hain an eskriba?* Hain an paradebate hini nga sistema? Diri ba ginhimo han Dios nga kalurongan an kinaadman han kalibotan?
21 Tungod kay an kalibotan sinarig ha kinaadman hito, waray hito makilala an Dios. Kondi uyon ha kinaadman han Dios, nalipay hiya nga talwason an mga natoo pinaagi han mensahe nga iginsasangyaw nga ginhuhunahuna han iba nga kalurongan.
22 An mga Judio nangangaro hin mga tigaman ngan an mga Griego namimiling hin kinaadman.
23 Pero iginsasangyaw naton nga an Kristo iginraysang ha kahoy, nga hiparakdolan para ha mga Judio ngan kalurongan para ha mga nasud.
24 Kondi para ha mga gintawag, nga mga Judio ngan mga Griego, an Kristo amo an kapahayagan han gahum ngan kinaadman han Dios.
25 Kay an ginhuhunahuna han Dios nga kalurongan mas maaramon kay ha mga tawo, ngan an ginhuhunahuna han Dios nga kaluyahan mas makusog kay ha mga tawo.
26 Kay nakikita niyo mga kabugtoan, nga ha iyo nga gintawag niya, diri damu an maaramon ha paghunahuna han tawo, diri damu an gamhanan, diri damu an dungganon.
27 Kondi ginpili han Dios an mga lurong ha paghunahuna han kalibotan basi pakaalohan an mga maaramon, ngan ginpili han Dios an mga maluya ha paghunahuna han kalibotan basi pakaalohan an mga makusog.
28 Ngan ginpili han Dios an mga butang nga ubos, gintatamay, ngan waray pulos ha kalibotan basi wad-on an importante ha ira pagkita,
29 basi waray tawo nga makapanhambog ha atubangan han Dios.
30 Tungod ha Dios kahiusa kamo ni Kristo Jesus nga nagpapahayag han kinaadman ngan katadongan han Dios. Pinaagi ha iya mahimo magin baraan an mga tawo ngan matalwas pinaagi han lukat,
31 basi magin sugad han iginsurat: “An naghahambog, ighambog niya hi Jehova.”
