1 Corinto 5:1-13

5  Ha pagkamatuod, may-ada sumat nga may imoralidad* dida ha iyo, kay may lalaki nga gin-uuroasawa an asawa han iya amay. Ini nga klase hin imoralidad diri ngani nahitatabo ha mga diri tumuroo.* 2  Iginhahambog ba niyo ito? Diri ba sadang lugod kamo masubo ngan paiwason tikang ha iyo an tawo nga nagbuhat hito? 3  Bisan kon waray ako dida, aada ha iyo an akon hunahuna,* ngan ginhukman ko na an tawo nga nagbuhat hito, nga baga hin aada ako ha iyo. 4  Kon nagkakatirok kamo ha ngaran han aton Ginoo nga hi Jesus, ngan kaupod ako niyo ha espiritu upod an gahum han aton Ginoo nga hi Jesus, 5  sadang niyo itubyan ito nga tawo kan Satanas para ha kabungkagan han unod,* basi an espiritu* matipigan ha adlaw han Ginoo. 6  Diri maopay an hinungdan han iyo paghambog. Diri ba kamo maaram nga an gutiay nga libadura nakakapatubo han bug-os nga minasa? 7  Kuhaa an daan nga minasa nga may libadura basi kamo magin bag-o nga minasa, kay waray na gud ipaturubo dida ha iyo. Ha pagkamatuod, an Kristo nga aton Paskua* iginhalad na. 8  Salit iselebrar naton an piyesta, nga diri nagamit hin daan nga minasa nga may libadura, o hin libadura han karaotan ngan pagkamakasasala, kondi hin waray libadura nga tinapay han pagkasinsero ngan kamatuoran. 9  Nagsurat ako ha iyo nga diri na kamo makig-upod ha mga imoral,* 10  diri karuyag sidngon nga bug-os nga diri kamo makig-upod ha mga imoral hini nga kalibotan o ha mga hakog o ha mga kawatan o ha mga parasingba ha dios-dios. Kay kon amo, kinahanglan gumawas kamo ha kalibotan. 11  Kondi yana nagsusurat ako ha iyo nga diri na kamo makig-upod ha bisan hin-o nga tinatawag nga bugto nga imoral o hakog o parasingba ha dios-dios o parapakaraot o parahubog o kawatan, bisan ha pakig-upod ha pagkaon ha sugad nga tawo. 12  Diri ako an naghuhukom ha mga aadto ha gawas. Diri ba kamo an naghuhukom han mga aada ha sulod, 13  samtang an Dios an naghuhukom han mga aadto ha gawas? “Paiwasa tikang ha iyo an maraot nga tawo.”

Mga footnote

^ Kitaa an footnote ha Mat 5:32.
^ O “mga tawo han pagano nga mga nasud.”
^ Ha literal, “espiritu.”
^ O “kabungkagan han maraot nga impluwensya.”
^ Karuyag sidngon, “an disposisyon han kongregasyon.”
^ Kitaa an “Paskua” ha Glossary.
^ Nagbubuhat han ngatanan nga klase hin seksuwal nga relasyon nga supak ha balaud han Dios. Kitaa an Apendise 4.