1 Corinto 15:1-58
15 Mga kabugtoan, ginpapahinumdom ko kamo yana mahitungod han maopay nga sumat nga akon iginpahayag ha iyo, nga ginkarawat niyo ngan padayon nga ginsusunod liwat niyo.
2 Matatalwas liwat kamo kon marig-on nga tipigan niyo an maopay nga sumat nga iginpahayag ko ha iyo. Kay kon diri, nagin mga tumuroo kamo nga waray la katuyoan.
3 An pinakaimportante nga butang nga akon nahibaroan igintutdo ko liwat ha iyo, nga an Kristo namatay tungod ha aton mga sala sumala ha Kasuratan,
4 nga hiya iginlubong, nga hiya ginbanhaw ha ikatulo ka adlaw sumala ha Kasuratan,
5 nga nagpakita hiya kan Cefas, ngan katapos ha 12 nga apostol.
6 Katapos hito, ha usa nga higayon nagpakita hiya ha sobra 500 nga kabugtoan, nga an kadam-an ha ira kaupod pa gihapon naton, pero an iba nangaturog na ha kamatayon.
7 Sunod, nagpakita hiya kan Santiago, katapos ha ngatanan nga apostol;
8 pero katapos hito ngatanan, nagpakita hiya ha akon nga sugad hin igin-anak ako nga diri pa panahon.
9 Kay ako an pinakaubos ha mga apostol, ngan diri ako angay tawagon nga apostol, kay gintimaraot ko an kongregasyon han Dios.
10 Pero pinaagi han diri-matupngan nga pagkabuotan han Dios nagkaada ako hini nga pribilehiyo. Ngan an iya diri-matupngan nga pagkabuotan ha akon waray makarag, kay mas damu an akon ginbuhat kay ha iba nga mga apostol, pero diri pinaagi ha akon kondi pinaagi han diri-matupngan nga pagkabuotan han Dios nga aadi ha akon.
11 Pero ako man o hira, ini an amon iginsasangyaw ngan pinaagi hini tinoo kamo.
12 Yana kon iginsasangyaw nga an Kristo ginbanhaw, kay ano nga an iba ha iyo nasiring nga waray pagkabanhaw han mga patay?
13 Kon totoo nga waray pagkabanhaw, kon sugad bisan an Kristo waray mabanhaw.
14 Pero kon waray banhawa an Kristo, waray gud pulos an aton pagsangyaw, ngan waray pulos an aton pagtoo.
15 Labot pa, kon an mga patay diri gud babanhawon, kon sugad waray banhawa han Dios an Kristo, salit nagigin buwaon kita nga mga testigo mahitungod han Dios kay nasiring kita nga ginbanhaw niya an Kristo.
16 Kay kon an mga patay diri babanhawon, waray liwat mabanhaw an Kristo.
17 Labot pa, kon waray banhawa an Kristo, waray pulos an iyo pagtoo. Aada la gihapon ha iyo an iyo mga sala.
18 Ha pagkamatuod, an mga nangaturog ha kamatayon nga kahiusa han Kristo nawara liwat ha kadayonan.
19 Kon tubtob la hini nga kinabuhi an aton paglaom ha Kristo, mas makalolooy kita kay ha bisan hin-o.
20 Kondi ha pagkamatuod, ginbanhaw an Kristo, an una nga bunga han mga nangaturog ha kamatayon.
21 Tungod kay nagkaada kamatayon pinaagi han usa ka tawo, nagkakaada liwat pagkabanhaw han mga patay pinaagi han usa ka tawo.
22 Kay sugad la nga tungod kan Adan an ngatanan namamatay, sugad man an ngatanan mabubuhi pinaagi han Kristo.
23 Pero an kada tagsa mabubuhi uyon ha husto nga pagkasunod-sunod: an Kristo amo an una nga bunga, katapos an mga kan Kristo ha panahon han iya presensya.*
24 Sunod, an kataposan, kon ihatag na niya an Ginhadian ha iya Dios ngan Amay katapos niya wad-on an ngatanan nga gobyerno ngan an ngatanan nga awtoridad ngan gahum.
25 Kay kinahanglan maghadi hiya tubtob nga ibutang han Dios an ngatanan nga kaaway ha ilarom han iya mga tiil.
26 Sugad nga kataposan nga kaaway, an kamatayon wawad-on.
27 “An ngatanan nga butang iginpasakop” han Dios “ha ilarom han iya mga tiil.” Pero han pagsiring niya nga ‘iginpasakop an ngatanan nga butang,’ klaro nga diri hini upod an Dios nga amo an nagpasakop han ngatanan nga butang kan Kristo.
28 Pero kon igpasakop na ha iya an ngatanan nga butang, an Anak mismo magpapasakop liwat ha Dios nga amo an nagpasakop han ngatanan nga butang ha iya, basi an Dios gud la an magmando han ngatanan.
29 Kay kon diri, ano an mapapahimulsan han mga ginbabawtismohan kon mamamatay la hira? Kon an mga patay diri gud babanhawon, kay ano nga ginbabawtismohan pa hira kon mamamatay man la hira?
30 Kay ano nga namimeligro liwat kita kada oras?
31 Kada adlaw naatubang ako ha kamatayon. Sigurado ini sugad la han akon daku nga kalipay tungod ha iyo, mga kabugtoan, nga nakarawat ko kan Kristo Jesus nga aton Ginoo.
32 Kon nakig-away ako ha mapintas nga mga hayop ha Efeso pariho han iba nga kalalakin-an, ano an kaopayan hito para ha akon? Kon an mga patay diri babanhawon, kon sugad “pangaon ngan panginom kita kay buwas mamamatay kita.”
33 Ayaw kamo palimbong. An maraot nga mga kaupod nakakadaot han maopay nga pamatasan.
34 Pamurubuot kamo ha matadong nga paagi ngan ayaw kamo pagbuhat hin sala, kay an iba waray kahibaro mahitungod ha Dios. Ginsisiring ko ini basi maawod kamo.
35 Kondi may masiring: “Paonan-o babanhawon an mga patay? Ano nga klase an ira lawas kon banhawon hira?”
36 Ikaw nga ignorante nga tawo! An imo iginsabwag diri mabubuhi kon diri anay ito mamatay;
37 ngan mahitungod han imo iginsasabwag, diri an lawas nga magtutubo an imo iginsasabwag, pero an liso la, trigo man ito o iba nga klase.
38 Kondi an Dios naghahatag hito hin lawas uyon ha iya nalilipayan, ngan an tagsa nga binhi iya gintatagan hin kalugaringon nga lawas.
39 Diri ngatanan nga lawas parapriho. Iba an lawas han tawo, iba an lawas han baka, iba an lawas han katamsihan, ngan iba an lawas han isda.
40 Ngan may langitnon nga mga lawas, ngan tunan-on nga mga lawas; pero iba an himaya han langitnon nga mga lawas, ngan iba liwat an himaya han tunan-on nga mga lawas.
41 Iba an himaya han adlaw, iba an himaya han bulan, ngan iba liwat an himaya han mga bitoon; ha pagkamatuod, iba-iba an himaya han tagsa nga bitoon.
42 Sugad liwat hito an pagkabanhaw han mga patay. Iginsasabwag ito nga nadudunot, ginbabanhaw ito nga diri-nadudunot.
43 Iginsasabwag ito nga waray dungog, ginbabanhaw ito nga may himaya. Iginsasabwag ito nga may kaluyahan, ginbabanhaw ito nga may gahum.
44 Iginsasabwag ito nga pisikal nga lawas, ginbabanhaw ito nga espirituwal nga lawas. Kon may pisikal nga lawas, may espirituwal nga lawas liwat.
45 Ini an iginsurat: “An siyahan nga tawo nga hi Adan nagin buhi nga kalag.” An kataposan nga Adan nagin espiritu nga naghahatag hin kinabuhi.
46 Pero diri nahiuuna an espirituwal nga lawas lugod an pisikal, ngan katapos an espirituwal nga lawas.
47 An siyahan nga tawo tikang ha tuna ngan ginhimo tikang ha tapotapo; an ikaduha nga tawo tikang ha langit.
48 An mga ginhimo tikang ha tapotapo pariho ha iya nga ginhimo tikang ha tapotapo; ngan an mga langitnon pariho liwat ha iya nga langitnon.
49 Ngan sugad la nga an aton dagway pariho ha iya nga ginhimo tikang ha tapotapo, magigin pariho liwat kita ha dagway niya nga langitnon.
50 Pero ini an akon masisiring mga kabugtoan, nga an unod ngan dugo diri makakapanunod han Ginhadian han Dios, ngan an pagin nadudunot diri liwat makakapanunod han pagin diri-nadudunot.
51 Pamati! Susumatan ko kamo hin sagrado nga tinago: Diri kita ngatanan makaturog ha kamatayon, pero mababag-o kita ngatanan,
52 sugad la kadagmit ha pagpirok han mata, ha panahon han pagtunog han ultimo nga trumpeta. Kay an trumpeta magtutunog, ngan an mga patay babanhawon nga diri na madudunot, ngan mababag-o kita.
53 Kay ini nga nadudunot kinahanglan magin diri nadudunot, ngan ini nga mortal kinahanglan magin imortal.
54 Pero kon ini nga nadudunot magin diri nadudunot ngan ini nga mortal magin imortal, matutuman ini nga iginsurat: “An kamatayon mawawara na ha kadayonan.”
55 “Kamatayon, hain an imo kadaogan? Kamatayon, hain an imo sugod?”
56 An sugod nga nakakamatay amo an sala, ngan an gahum han sala tikang ha Balaud.
57 Pero salamat ha Dios, kay gintatagan kita niya hin kadaogan pinaagi han aton Ginoo nga hi Jesu-Kristo!
58 Salit hinigugma ko nga kabugtoan, magmarig-on kamo, diri nababantad, nga pirme damu an ginbubuhat ha buruhaton han Ginoo, kay maaram kamo nga an iyo pag-alagad ha Ginoo diri nakakarag.
Mga footnote
^ Kitaa an Apendise 5.
