1 Corinto 2:1-16
2 Salit mga kabugtoan, han kinada ako ha iyo ha pagpahayag han sagrado nga tinago han Dios, waray ako gumamit hin higlarom nga pulong o pagparayaw han kinaadman.
2 Kay gintuyo ko nga an akon la pabug-atan ha iyo amo an mahitungod kan Jesu-Kristo, ngan an pagraysanga ha iya ha kahoy.
3 Han kinada ako ha iyo, maluya ako, nahahadlok, ngan nangungurog gud.
4 Ngan an akon ginyakan pati an akon iginsangyaw diri pinaagi han makakombinse nga mga pulong han kinaadman kondi pinaagi ha pagpakita han espiritu ngan gahum,
5 basi an iyo pagtoo igbasar, diri ha kinaadman han mga tawo, kondi ha gahum han Dios.
6 Yana ginhihisgotan naton an kinaadman ha butnga han mga hamtong, kondi diri an kinaadman hini nga sistema o han mga magmarando hini, nga hirani na wad-on.
7 Kondi ginhihisgotan naton an kinaadman han Dios ha sagrado nga tinago, an nakatago nga kinaadman nga itinanda han Dios antes pa hini nga sistema para ha aton himaya.
8 Diri maaram hini nga kinaadman an bisan usa han mga magmarando hini nga sistema, kay kon maaram hira, waray unta nira igraysang ha kahoy an mahimayaon nga Ginoo.
9 Sugad la han iginsurat: “An mga butang nga gin-andam han Dios para ha mga nahigugma ha iya waray makita han mata, waray mabatii han talinga, ngan waray matugkad han kasingkasing han tawo.”
10 Kay iginpahayag ito ha aton han Dios pinaagi han iya espiritu, kay gin-uusisa han espiritu an ngatanan nga butang, bisan an hilarom nga mga butang han Dios.
11 Hin-o ha mga tawo an maaram han mga butang han tawo labot la han espiritu nga aada ha iya? Sugad man, waray maaram han mga butang han Dios labot la han espiritu han Dios.
12 Ginkarawat naton yana, diri an espiritu han kalibotan, kondi an espiritu tikang ha Dios, basi hibaroan naton an mga butang nga mahigugmaon nga iginhatag ha aton han Dios.
13 Ginhihisgotan liwat naton ini nga mga butang, diri pinaagi han mga pulong nga hinbaroan naton tikang ha kinaadman han tawo, kondi pinaagi han hinbaroan naton tikang ha espiritu, samtang gin-iesplikar naton an espirituwal nga mga butang pinaagi han espirituwal nga mga pulong.
14 Kondi an pisikal nga tawo diri nakarawat han mga butang han espiritu han Dios, kay para ha iya kalurongan la ito; ngan diri hiya mahibabaro hito, kay gin-uusisa ito ha espirituwal nga paagi.
15 Pero an espirituwal nga tawo nag-uusisa gud han ngatanan nga butang, kondi diri hiya gin-uusisa han bisan hin-o nga tawo.
16 Kay “hin-o an maaram han panhunahuna ni Jehova, basi niya matutdoan hiya?” Pero an aton panhunahuna pariho han panhunahuna han Kristo.
