1 Corinto 3:1-23
3 Salit mga kabugtoan, waray ako makahimo pakiistorya ha iyo sugad han akon pakiistorya ha espirituwal nga mga tawo, kondi sugad ha kalibotanon nga mga tawo, sugad ha mga bata pa ha pagin Kristiano.
2 Gintagan ko kamo hin gatas, diri hin matig-a nga pagkaon, kay diri pa kamo makusog. Ha pagkamatuod, bisan yana diri pa kamo makusog,
3 kay kalibotanon pa kamo. Tungod kay may pangabugho ngan araway ha butnga niyo, diri ba kalibotanon kamo ngan diri ba nanggagawi kamo sugad han panggawi han mga tawo?
4 Kon may nasiring: “Ako kan Pablo,” pero an usa nasiring: “Ako kan Apolos,” diri ba pariho la kamo han mga tawo ha kalibotan?
5 Hin-o ba hi Apolos? Ngan hin-o hi Pablo? Mga ministro hira nga pinaagi ha ira nagin tumuroo kamo, sugad la han iginhatag han Ginoo nga oportunidad ha kada tagsa.
6 Ako an nagtanom, hi Apolos an nagsaribo, kondi an Dios an padayon nga nagpapatubo hito,
7 salit diri an nagtatanom o an nagsasaribo an sadang dayawon kondi an Dios nga nagpapatubo hito.
8 An nagtatanom ngan an nagsasaribo nagkakaurosa, pero an tagsa nga tawo makarawat han balos uyon ha iya ginbubuhat.
9 Kay kami an mga igkasi-magburuhat han Dios. Kamo an uma nga ginkukultibar han Dios, an balay han Dios.
10 Uyon ha diri-matupngan nga pagkabuotan han Dios nga iginhatag ha akon, sugad nga eksperto nga panday ginhimo ko an pundasyon, pero iba an nagtitindog hin balay dida hito. Kondi padayon nga magbantay an kada tagsa kon paonan-o hiya nagtitindog dida hito.
11 Waray tawo nga makakahimo hin iba nga pundasyon labot han aada na, nga amo hi Jesu-Kristo.
12 Kon an bisan hin-o magtindog dida ha pundasyon gamit an bulawan, silber, marahalon nga mga bato, materyales nga kahoy, magkalain-lain nga banwa, o dagami,
13 an buhat han kada tagsa makikita pag-abot han adlaw han pagsari, kay ibubuhayhag ito pinaagi han kalayo; ngan an kalayo mismo an magpapamatuod kon ano nga klase an gintindog han kada tagsa.
14 Kon diri masunog an gintindog han bisan hin-o dida hito, makarawat hiya hin balos;
15 pero kon masunog an iya gintindog, daku an mawawara ha iya, pero matatalwas hiya. Magigin pariho hiya hin tawo nga nakapalagiw ha kalayo.
16 Diri ba kamo maaram nga kamo an templo han Dios, ngan an espiritu han Dios aada ha iyo?
17 Kon may magbungkag han templo han Dios, bubungkagon hiya han Dios, kay baraan an templo han Dios, ngan kamo ito nga templo.
18 Diri limbongan han bisan hin-o an iya kalugaringon: Kon an bisan hin-o ha iyo naghuhunahuna nga maaramon hiya hini nga sistema, magin lurong hiya, basi magin maaramon hiya.
19 Kay an kinaadman hini nga kalibotan gintatagad han Dios nga kalurongan, kay an Kasuratan nasiring: “Iya gindadakop an mga maaramon ha ira kalugaringon nga mga limbong.”
20 Ngan nasiring liwat ito: “Maaram hi Jehova nga waray pulos an mga pangatadongan han mga maaramon.”
21 Salit diri sadang ighambog han bisan hin-o an mga tawo; kay an ngatanan nga butang iyo,
22 bisan hi Pablo o hi Apolos o hi Cefas o an kalibotan o an kinabuhi o an kamatayon o an mga butang nga aanhi yana o an mga butang nga tiarabot, ito ngatanan iyo;
23 pero kamo kan Kristo, ngan an Kristo kanan Dios.
