1 Corinto 4:1-21
4 Hinaot tagdon kami han tawo sugad nga mga kabulig* han Kristo ngan mga tinaporan han sagrado nga mga tinago han Dios.
2 Ngan an mga tinaporan ginlalaoman nga magigin matinumanon.
3 Diri gud importante ha akon nga usisahon ako niyo o han korte. Ha pagkamatuod, diri ko gin-uusisa an akon kalugaringon.
4 Kay limpyo an akon konsensya. Pero diri ini nagpapamatuod nga matadong ako, kay hi Jehova an nag-uusisa ha akon.
5 Salit ayaw paghukmi an bisan ano antes han itinanda nga panahon, tubtob nga umabot an Ginoo. Iya dadad-on ha kalamrag an tinago nga mga butang ha kasisidman ngan ibubuhayhag an katuyoan han mga kasingkasing, ngan an kada tagsa makarawat hin pagdayaw tikang ha Dios.
6 Mga kabugtoan, gin-iistorya ko ha iyo ini nga mga butang, nga ginagamit sugad nga ehemplo an akon kalugaringon ngan hi Apolos para ha iyo kaopayan, basi hibaroan niyo ini nga prinsipyo: “Ayaw niyo pasobrahi an mga butang nga nahisurat,” basi diri ighambog han tagsa ha iyo an usa kontra ha iba.
7 Kay hin-o ba an naghimo ha imo nga magin labaw ha iba? Ano gud ba an aada ha imo nga waray mo karawata? Yana kon ginkarawat mo ito, kay ano nga naghahambog ka nga baga hin waray mo ito karawata?
8 Busog na ba kamo? Riko na ba kamo? Naghahadi na ba kamo nga waray kami? Naghihingyap gud ako nga unta naghahadi na kamo, basi kami liwat maghadi kaupod niyo.
9 Kay para ha akon, kami nga mga apostol an urhi nga igin-gawas han Dios sugad hin mga tawo nga ginsentensyahan hin kamatayon, kay sugad hin aada kami ha teatro nga nagin kiritaon han kalibotan, han mga anghel ngan han mga tawo.
10 Mga lurong kami tungod han Kristo, pero maaramon kamo kay kahiusa kamo han Kristo; magluya kami, pero magkusog kamo; maopay an iyo reputasyon, pero kami diri ginrirespeto.
11 Tubtob hini nga oras nagugutom kami, nauuhaw, haros waray na iginbabado, ginsusuntok, waray balay,
12 ngan maduruto nga nagbubuhat. Kon gin-iinsulto, nagdadayaw kami. Kon gintitimaraot, nagpapailob kami.
13 Kon ginpapakaraot, malumo* kami nga nabaton. Nagin sugad kami hin basura han kalibotan, an diri naruruyagan ha ngatanan nga butang, tubtob yana.
14 Iginsusurat ko ini, diri basi pakaalohan kamo, kondi basi sagdonan kamo sugad nga akon hinigugma nga mga anak.
15 Kay bisan kon bangin may 10,000 kamo nga parapanalipod* nga disipulo han Kristo, sigurado nga diri damu an iyo amay, kay kan Kristo Jesus nagin sugad ako hin amay niyo pinaagi han maopay nga sumat.
16 Salit gin-aaghat ko kamo nga magsubad ha akon.
17 Tungod hito ginsusugo ko ha iyo hi Timoteo, kay hiya an akon hinigugma ngan matinumanon nga anak ha Ginoo, ngan ipapahinumdom niya ha iyo an akon pamaagi ha pag-alagad kan Kristo Jesus, sugad la han akon pagtutdo ha tagsa nga kongregasyon ha bisan diin.
18 An iba naghahambog kay naghuhunahuna hira nga diri gud ako makada ha iyo.
19 Pero kon kaburut-on ni Jehova, makada dayon ako ha iyo, ngan hibabaroan ko, diri an ginsisiring han mga mapahitas-on, kondi an ira gahum.
20 Kay an Ginhadian han Dios iginpapakita, diri pinaagi han mga pulong, kondi pinaagi han gahum han Dios.
21 Ano an karuyag niyo? Makada ba ako ha iyo nga may panlatob, o may gugma ngan malumo nga espiritu?
