1 Corinto 11:1-34
11 Hinaot subaron niyo ako, sugad la nga nagsusubad ako kan Kristo.
2 Yana gindadayaw ko kamo, kay ha ngatanan nga butang nahinunumdoman niyo ako ngan ginsusunod gud niyo an mga tradisyon sugad la han akon igintutdo ha iyo.
3 Pero karuyag ko hibaroan niyo nga an ulo han tagsa nga lalaki amo an Kristo; an ulo han babaye amo an lalaki; ngan an ulo han Kristo amo an Dios.
4 An tagsa nga lalaki nga nag-aampo o nagtatagna nga may pudong nagpapakaalo ha iya ulo;
5 kondi an tagsa nga babaye nga nag-aampo o nagtatagna nga diri nagpupudong nagpapakaalo ha iya ulo, kay pariho hiya hin babaye nga gin-ahitan an ulo.
6 Kay kon an babaye diri nagpupudong, magpaarot hiya hin halipot; pero kon makaarawod ha babaye nga magpaarot hin halipot o magpaahit, magpudong hiya.
7 An lalaki diri angay magpudong, kay hiya an dagway ngan himaya han Dios; kondi an babaye an himaya han lalaki.
8 Kay an lalaki diri tikang ha babaye, lugod an babaye tikang ha lalaki;
9 ngan an lalaki waray himoa para ha babaye, kondi an babaye ginhimo para ha lalaki.
10 Salit an babaye angay magkaada tigaman han pagpasakop ha iya ulo tungod han mga anghel.
11 Labot pa, mahitungod ha mga sumurunod han Ginoo, an babaye diri bulag ha lalaki ngan an lalaki diri bulag ha babaye.
12 Kay sugad la nga an babaye tikang ha lalaki, sugad man an lalaki pinaagi han babaye, kondi an ngatanan tikang ha Dios.
13 Turotimbanga niyo ini: Angay ba mag-ampo ha Dios an usa nga babaye nga diri nakapudong?
14 Diri ba kamo maaram nga kon hilaba an buhok han lalaki natural la nga hunahunaon nga kaalohan ito niya?
15 Pero kon hilaba an buhok han babaye, diri ba kadungganan ito niya? Oo, kay gintagan hiya hin buhok imbes nga pudong.
16 Pero bisan kon may maruyag makigdiskusyon dapig ha iba nga kustomre, maaram kita nga waray kita iba nga kustomre, sugad man an mga kongregasyon han Dios.
17 Pero samtang iginhahatag ko ini nga mga instruksyon, diri ko kamo gindadayaw, kay an iyo mga katirok nakakadaot imbes nga makaopay ha iyo.
18 Kay una ha ngatanan, nabatian ko nga kon nagkakatirok kamo ha kongregasyon nagkakabahinbahin kamo, ngan medyo natuod ako hito.
19 Sigurado nga magkakaada liwat mga sekta dida ha iyo, basi makita kon hin-o ha iyo an mga inuuyonan han Dios.
20 Salit kon nagkakatirok kamo, diri na posible nga kumaon kamo han panihapon han Ginoo.
21 Kay kon panahon na ha pagkaon hito, an iba ha iyo tapos na manihapon antes pa hito, salit an iba gutom ngan an iba hubog.
22 Sigurado nga may mga balay kamo nga didto nakaon ngan nainom kamo, diri ba? O gintatamay ba niyo an kongregasyon han Dios ngan ginpapakaalohan an mga waray kinakaon? Ano ba an akon isisiring ha iyo? Dadayawon ko ba kamo? Tungod hini, diri ko kamo gindadayaw.
23 An nakarawat ko tikang ha Ginoo igintutdo ko ha iyo, nga ha gab-i han tatraydoran na an Ginoo nga hi Jesus, kinuha hiya hin tinapay,
24 ngan katapos magpasalamat, iya gintipik-tipik ito ngan nagsiring: “Nagsisimbolo ini han akon lawas nga ihahatag para ha iyo. Padayon nga buhata niyo ini sugad nga hinumdoman ha akon.”
25 Sugad liwat hito an iya ginbuhat ha kopa, katapos niya manihapon, nagsiring hiya: “Ini nga kopa nagsisimbolo han bag-o nga kasabotan nga ginhimo pinaagi han akon dugo. Padayon nga buhata niyo ini sugad nga hinumdoman ha akon, ha kada panahon nga nainom kamo hito.”
26 Kay ha kada panahon nga nakaon kamo hini nga tinapay ngan nainom hini nga kopa, padayon nga iginpapasamwak niyo an kamatayon han Ginoo, tubtob ha iya pag-abot.
27 Salit an bisan hin-o nga nakaon han tinapay ngan nainom ha kopa han Ginoo bisan kon diri takos hito magigin salaan ha lawas ngan dugo han Ginoo.
28 Sadang usisahon anay han usa nga tawo an iya kalugaringon ngan siguruhon kon angay hiya kumaon han tinapay ngan uminom ha kopa.
29 Kay an nakaon ngan nainom, naghuhukom ha iya kalugaringon kon diri niya nasasabtan an ginrirepresentaran han lawas.
30 Salit damu ha iyo an maluya ngan may sakit, ngan an iba nangangaturog ha kamatayon.*
31 Pero kon usisahon naton hin maopay kon ano gud kita, diri kita huhukman.
32 Kondi kon ginhuhukman kita, gindidisiplina kita ni Jehova basi diri kita masirotan upod han kalibotan.
33 Salit mga kabugtoan ko, kon magkatirok kamo basi kumaon han panihapon, paghulatay kamo.
34 Kon nagugutom an bisan hin-o, sadang hiya kumaon ha balay, basi kon magkatirok kamo, diri kamo paghukman. Kondi an iba pa nga butang akon tutuhayon pagkada ko.
Mga footnote
^ Nagtutudlok ini ha espirituwal nga kahimtang han mga taga-Corinto. An pagkaturog ginagamit sugad nga simbolo han espirituwal nga kamatayon.
