1 Corinto 10:1-33
10 Mga kabugtoan, karuyag ko hibaroan niyo nga an ngatanan nga kaapoy-apoyan naton ginlandongan hin dampog ngan hira ngatanan nakatabok ha dagat.
2 Ngan hira ngatanan nabawtismohan sugad nga sumurunod ni Moises pinaagi han dampog ngan han dagat.
3 Ngan an ngatanan kinaon hin pariho nga espirituwal nga pagkaon
4 ngan an ngatanan ininom hin pariho nga espirituwal nga irimnon. Kay ininom hira hadto tikang ha espirituwal nga daku nga bato nga sinunod ha ira, ngan ito nga daku nga bato amo an Kristo.
5 Bisan pa hito, an Dios waray malipay ha kadam-an ha ira, kay ha pagkamatuod ginpamatay hira ha kamingawan.
6 Ito nga mga panhitabo nagin ehemplo para ha aton, basi diri kita maghingyap han nakakadaot nga mga butang, sugad han ira paghingyap hito.
7 Diri kita magin parasingba ha dios-dios, sugad han iba ha ira. Sugad la han ginsiring han Kasuratan: “An katawohan nangalingkod basi mangaon ngan manginom, ngan nagkabuhat hira basi magkalipay.”
8 Diri liwat kita magbuhat hin imoralidad,* sugad han iba ha ira nga nagbuhat hin imoralidad, salit 23,000 ha ira an ginpatay ha usa ka adlaw.
9 Diri liwat naton sarihan hi Jehova, sugad han ginbuhat han iba ha ira nga ginsarihan hiya, salit nagkamatay hira pinaagi han mga halas.
10 Diri liwat kita magin reklamador, sugad han iba ha ira nga nagreklamo, salit ginpatay hira han parapamatay.
11 An mga nahitabo ha ira nagin mga ehemplo, ngan iginsurat ito basi pahamangnoan kita nga nabubuhi ha kataposan hini nga sistema.
12 Tungod hito, an naghuhunahuna nga natindog hiya magbantay nga diri hiya matumba.
13 Waray pagsulay nga naabot ha iyo nga diri naieksperyensyahan han iba. Kondi an Dios matinumanon, ngan diri niya itutugot nga sulayon kamo labaw han iyo maiilob, pero kon umabot an pagsulay maghihimo liwat hiya hin paagi nga makagawas kamo basi makailob hito.
14 Salit mga hinigugma ko, maglikay kamo ha idolatriya.
15 Nagyayakan ako sugad han akon pakiistorya ha mga tawo nga may pagsabot; kamo an paghukom han akon ginyayakan.
16 An kopa han bendisyon nga aton gin-aampoan, diri ba pakigbahin ito ha dugo han Kristo? An tinapay nga aton gintitipik-tipik, diri ba pakigbahin ito ha lawas han Kristo?
17 Tungod kay usa la an tinapay, usa la kita nga lawas bisan kon damu kita, kay kita ngatanan nakikigbahin hito nga usa la nga tinapay.
18 Kitaa niyo an natural nga Israel: Diri ba an mga nakaon han mga halad mga nakikiangbit ha halaran?
19 Ano an akon karuyag sidngon? Nga importante an iginhahalad ha dios-dios, o nga importante an dios-dios?
20 Diri. An akon karuyag sidngon nga an mga butang nga iginhahalad han mga nasud iginhahalad nira ha mga demonyo, diri ha Dios; ngan diri ko karuyag nga makiangbit kamo ha mga demonyo.
21 Diri kamo puydi uminom ha kopa ni Jehova ngan ha kopa han mga demonyo; diri kamo puydi kumaon ha “lamesa ni Jehova” ngan ha lamesa han mga demonyo.
22 O “gin-aaghat ba naton hi Jehova nga mangabugho”? Diri kita mas makusog kay ha iya, diri ba?
23 An ngatanan nga butang igintutugot han balaud, pero diri ngatanan nga butang mapulsanon. An ngatanan nga butang igintutugot han balaud, pero diri ngatanan nga butang makaparig-on.
24 An kada tagsa padayon nga mangalimbasog para ha kaopayan han iba, diri para ha iya kalugaringon.
25 Puydi kamo magpadayon pagkaon hin bisan ano nga iginbabaligya ha baraligyaan hin karne, ngan ayaw pagpinakiana tungod han iyo konsensya;
26 kay “kan Jehova an tuna ngan an aada hito.”
27 Kon imbitaron kamo han usa han mga diri-tumuroo ngan karuyag niyo kumadto, kaona an bisan ano nga igserbi ha iyo, ngan ayaw pagpinakiana tungod han iyo konsensya.
28 Pero kon may magsiring ha iyo: “Iginhalad ini ha mga dios-dios,” ayaw pagkaon tungod han nagsumat hito ngan tungod han konsensya.
29 Karuyag ko sidngon, diri an iyo konsensya, kondi an konsensya han iba nga tawo. Kay ano nga an akon kagawasan huhukman han konsensya han iba nga tawo?
30 Bisan kon nakaon ako ngan nagpapasalamat ha Dios tungod hito, tama ba nga buhaton ko ito kon pakakarauton ako han iba tungod hito?
31 Salit nakaon man kamo, nainom, o nagbubuhat hin bisan ano, buhata an ngatanan para ha kadayawan han Dios.
32 Likyi nga magin hiparakdolan kamo han mga Judio sugad man han mga Griego ngan han kongregasyon han Dios,
33 sugad la nga ginpapalipay ko an ngatanan nga tawo ha ngatanan nga butang, nga diri ko ginhuhunahuna an akon kalugaringon nga kaopayan kondi an kaopayan han damu, basi man hira matalwas.
Mga footnote
^ Kitaa an footnote ha Mat 5:32.
