1 Corinto 8:1-13
8 Mahitungod han pagkaon nga iginhalad ha mga dios-dios: maaram kita nga kita ngatanan may kahibaro mahitungod hito. An kahibaro nag-aaghat hin paghambog, pero an gugma nagpaparig-on.
2 Bisan kon an usa naghuhunahuna nga maaram hiya han usa nga butang, diri pa hiya maaram han angay niya hibaroan mahitungod hito.
3 Pero kon an usa nahigugma ha Dios, kilala hiya niya.
4 Mahitungod han pagkaon han mga iginhalad ha mga dios-dios, maaram kita nga an dios-dios ha kalibotan waray pulos, ngan usa la an Dios.
5 Kay bisan kon may gintatawag nga “mga dios,” ha langit man o ha tuna, sugad la nga damu an “mga dios” ngan damu an “mga ginoo,”
6 ha pagkamatuod, usa la an aton Dios nga Amay, nga ha iya nagtikang an ngatanan nga butang, ngan nabubuhi kita para ha iya; ngan usa la an Ginoo, hi Jesu-Kristo, nga pinaagi ha iya nahimo an ngatanan nga butang, ngan nahimo kita pinaagi ha iya.
7 Pero diri ngatanan may-ada hini nga kahibaro. Tungod kay an iba nagsisingba hadto ha dios-dios, kon nakaon hira han pagkaon ngan ginhuhunahuna nga iginhalad ito ha dios-dios, nahuhugawan an ira maluya nga konsensya.
8 Kondi an karaunon diri makakapahirani ha aton ha Dios. Kon diri kita kumaon, waray nawawara ha aton, ngan kon kumaon kita, waray nahidudugang ha aton.
9 Pero pagbantay pirme nga an iyo katungod ha pagpili diri magin hiparakdolan* han magluya.
10 Kon ikaw nga may kahibaro makit-an nga nalingkod ha pangaon ha templo hin dios-dios, diri ba ito nga tawo nga maluya an konsensya maaaghat nga kumaon han mga iginhalad ha mga dios-dios?
11 Salit tungod han imo kahibaro, nadadaot an tawo nga maluya, an imo bugto, nga para ha iya namatay an Kristo.
12 Kon sugad, kon makasala kamo ha iyo kabugtoan ngan makasamad han ira maluya nga konsensya, nakakasala kamo ha Kristo.
13 Salit kon an pagkaon nakakapakdol ha akon bugto, diri na gud ako makaon utro hin karne, basi diri ako makapakdol ha akon bugto.
Mga footnote
^ O “hinungdan ha pagluya han pagtoo.” Kitaa an “Kahipakdol” ha Glossary.
