1 Corinto 9:1-27

9  Diri ba may kagawasan ako? Diri ba usa ako nga apostol? Diri ba nakita ko hi Jesus nga aton Ginoo? Diri ba kamo an bunga han akon buruhaton ha Ginoo? 2  Bisan kon diri ako apostol ha iba, apostol gud ako ha iyo, kay kamo an selyo nga nagpapamatuod nga apostol ako han Ginoo. 3  Sugad nga depensa, ini an akon baton ha mga nag-iimbistigar: 4  May katungod kami nga kumaon ngan uminom, diri ba? 5  May katungod kami nga updan hin tumuroo* nga asawa, pariho han iba nga mga apostol ngan han kabugtoan han Ginoo ngan kan Cefas, diri ba? 6  O kami la ba ni Bernabe an waray katungod ha pagbaya ha sekular nga trabaho? 7  Hin-o nga sundalo an nagsiserbisyo nga hiya mismo an nagasto? Hin-o nga nagtatanom ha urubasan an diri nakaon han bunga hito? O hin-o nga nag-aataman hin panon an diri nainom han gatas han panon? 8  Diri ko ini ginyayakan sumala ha opinyon han tawo, diri ba? O diri ba ini liwat an ginsisiring han Balaud? 9  Kay ha balaud ni Moises ini an iginsurat: “Diri mo takpan an baba han lalakí nga baka kon naggigiok ito han mga uhay.” Ha mga baka nga lalakí ba nababaraka an Dios? 10  O para ba ha aton mismo kaopayan ito nga iya ginsiring? Ha pagkamatuod, iginsurat ito para ha aton kaopayan, kay an tawo nga nag-aarado ngan an tawo nga naggigiok nagbubuhat hito kay naglalaom nga babahínan hiya. 11  Kon nagsasabwag kami hin espirituwal nga mga butang ha iyo, sayop ba kon mag-ani kami hin materyal nga suporta tikang ha iyo? 12  Kon an iba nga tawo may katungod nga suportahan niyo, diri ba mas may katungod kami? Pero waray namon gamita ini nga katungod, lugod gin-iilob namon an ngatanan basi ha anoman nga paagi diri kami makaulang han maopay nga sumat mahitungod han Kristo. 13  Diri ba kamo maaram nga an kalalakin-an nga nagbubuhat han sagrado nga buruhaton nakaon han karaunon ha templo, ngan an pirme nag-aasikaso han mga buruhaton ha halaran may bahín tikang ha halaran? 14  Hini liwat nga paagi, nagsugo an Ginoo nga an mga nagpapasamwak han maopay nga sumat mabuhi pinaagi han maopay nga sumat. 15  Pero waray ko pahimulusi an bisan usa hito nga mga probisyon. Ha pagkamatuod, waray ko ini igsurat basi makarawat ko ito, kay mas maopay pa nga mamatay ako kay ha pabay-an ko nga kuhaon han iba an akon mga hinungdan ha paghambog! 16  Kon iginpapasamwak ko an maopay nga sumat yana, diri ito rason nga maghambog ako, kay kinahanglan ko ito buhaton. Ha pagkamatuod, kairo ko kon diri ko ipasamwak an maopay nga sumat! 17  Kon kinaburut-on nga buhaton ko ito, may balos ha akon; pero bisan pa kon mapiritan la ako pagbuhat hito, igintapod la gihapon ha akon an pagkatinaporan. 18  Kon sugad, ano an balos ha akon? Nga diri ako nakarawat hin bayad samtang iginpapasamwak ko an maopay nga sumat, basi diri ko abusuhon an akon awtoridad ha maopay nga sumat. 19  Bisan kon waray ako obligasyon ha ngatanan nga tawo, nagpapauripon ako ha ngatanan, basi makakabig ako hin damu gud nga tawo tubtob nga mahihimo. 20  Salit ha mga Judio nagin sugad ako hin Judio, basi makabig ko an mga Judio. Ha mga sakop han balaud nagin sugad ako hin sakop han balaud, bisan kon ako mismo diri sakop han balaud, basi makabig ko adton sakop han balaud. 21  Ha mga waray balaud nagin sugad ako hin waray balaud, bisan kon ginsusunod ko an balaud han Dios ngan sakop ako han balaud han Kristo, basi makabig ko an mga waray balaud. 22  Ha magluya nagin sugad ako hin maluya, basi makabig ko an magluya. Nakiangay ako ha ngatanan nga klase hin tawo, basi matalwas ko an iba ha anoman nga paagi kon posible. 23  Ginbubuhat ko an ngatanan para ha maopay nga sumat, basi maisangyaw ko ito ha iba. 24  Diri ba kamo maaram nga an mga paradalagan ha rumba ngatanan nadalagan, pero usa la an nakarawat han premyo? Dalagan kamo ha paagi nga magdadaog kamo. 25  Ngan an tagsa nga tawo nga naapi ha kompetisyon may pagpugong ha kalugaringon ha ngatanan nga butang. Oo, ginbubuhat nira ito basi makakarawat hin korona nga nadudunot, pero kita, korona nga diri-nadudunot. 26  Salit an akon pagdalagan diri kay waray direksyon; an akon mga suntok diri kay pagsuntok ha hangin. 27  Pero ginsusuntok ko an akon lawas ngan gin-uuripon ito, basi katapos ko magsangyaw ha iba, diri ako isalikway.

Mga footnote

^ Ha literal, “bugto nga babaye.”