1 Corinto 13:1-13
13 Bisan kon makayakan ako hin iba-iba nga pinulongan han mga tawo ngan han mga anghel pero waray ako gugma, sugad la ako hin nagtitinagungtong nga gong o nagtitinagingting nga simbal.
2 Ngan bisan kon ginregalohan ako hin abilidad ha panagna ngan maaram ako han ngatanan nga sagrado nga tinago ngan han ngatanan nga kahibaro, ngan bisan kon may marig-on nga pagtoo ako basi makabalhin hin mga bukid, pero waray ako gugma, waray ako pulos.
3 Ngan bisan kon ihatag ko an ngatanan nga akon panag-iya basi mapakaon an iba, ngan bisan kon ihatag ko an akon lawas sugad nga halad basi maghambog ako, pero waray ako gugma, waray gud ito pulos.
4 An gugma nagpapasensya* ngan buotan. An gugma diri nangangabugho, diri naghahambog, diri nagpapahitaas,
5 diri nagawi hin diri desente, diri naghuhunahuna han kalugaringon la nga kaopayan, ngan diri madali masina. Diri ito nag-iihap han karat-an.
6 Diri ito nalilipay ha pagkadiri-matadong, pero nalilipay ha kamatuoran.
7 Nag-aantos ito han ngatanan nga butang, natuod han ngatanan nga butang, naglalaom han ngatanan nga butang, ngan nagpapailob han ngatanan nga butang.
8 An gugma diri gud napapakyas. Kon may mga regalo nga abilidad ha panagna, mawawara ini; kon may iba-iba nga pinulongan, mawawara ini; kon may kahibaro, mawawara ini.
9 Diri kompleto an aton kahibaro, ngan diri kompleto an aton panagna;
10 pero kon umabot na an kompleto, mawawara na an diri kompleto.
11 Han bata pa ako, nagyayakan ako sugad hin bata, naghuhunahuna sugad hin bata, nangangatadongan sugad hin bata; kondi yana nga daku na ako, ginwara ko na an mga kinaiya han usa nga bata.
12 Kay yana diri klaro an aton nakikita pinaagi han metal nga espiho, pero ha tidaraon makikita naton ito hin klaro nga sugad hin magkaatubang. Yana, diri kompleto an akon hinbabaroan, pero katapos hito eksakto gud nga mahibabaroan ko ito sugad la han pagkakilala ha akon han Dios.
13 Pero yana, an pagtoo, paglaom, ngan gugma magpapadayon. Kondi an pinakaimportante hini nga tulo amo an gugma.
Mga footnote
^ O “hilawig an pagpailob.”
