1 Corinto 14:1-40
14 Pangalimbasugi nga ipakita an gugma, ngan tinguhaa gud an espirituwal nga mga regalo, labi na an regalo nga abilidad ha panagna.
2 Kay an nagyayakan hin iba nga pinulongan nagyayakan, diri ha mga tawo, kondi ha Dios. Bisan kon nagyayakan hiya han sagrado nga mga tinago pinaagi han espiritu, waray nakakasabot han iya ginyayakan.
3 Kondi hiya nga nananagna nagpaparig-on, nagdadasig, ngan nagliliaw han mga tawo pinaagi han iya mga pulong.
4 Hiya nga nagyayakan hin iba nga pinulongan nagpaparig-on han iya kalugaringon, pero hiya nga nananagna nagpaparig-on han kongregasyon.
5 Karuyag ko nga kamo ngatanan magyakan hin iba-iba nga pinulongan, pero mas karuyag ko nga managna kamo. Ha pagkamatuod, hiya nga nananagna mas maopay kay ha nagyayakan hin iba-iba nga pinulongan, gawas gud la kon naghuhubad hiya, basi an kongregasyon maparig-on.
6 Kondi yana mga kabugtoan, kon kumada ako ngan magyakan ha iyo hin iba-iba nga pinulongan, ano nga kapulsanan an maihahatag ko ha iyo labot la kon magyakan ako ha iyo pinaagi hin kapahayagan o pinaagi hin kahibaro o pinaagi hin tagna o pinaagi hin katutdoan?
7 Pariho la ito han mga butang nga waray kinabuhi nga nagtutunog, plawta man ito o arpa. Kon diri ito patunugon ha iba-iba nga tono, paonan-o mahibabaroan kon ano an ginpapatunog ha plawta o ha arpa?
8 Kay kon diri klaro an tunog han trumpeta, hin-o an mag-aandam para ha girra?
9 Ha pariho nga paagi, kon diri masayon masabtan an iyo ginyayakan nga pinulongan, paonan-o mahibabaro an bisan hin-o kon ano an ginsisiring? Sugad gud la kamo hin nakikiistorya ha hangin.
10 Bangin damu nga klase an linggwahe ha kalibotan, pero ito ngatanan diri kay waray kahulogan.
11 Kon sugad, kon diri ko nasasabtan an kahulogan han linggwahe, an akon kaistorya diri makakasabot ha akon ngan diri ko liwat hiya masasabtan.
12 Salit kamo, tungod kay naghihingyap gud kamo han mga regalo pinaagi han espiritu, pangalimbasog nga mapuno kamo han mga regalo nga magpaparig-on han kongregasyon.
13 Salit hiya nga nagyayakan hin iba nga pinulongan mag-ampo nga makahubad hiya.
14 Kay kon nag-aampo ako ha iba nga pinulongan, an regalo ha akon han espiritu an nag-aampo, pero diri ito nasasabtan han akon hunahuna.
15 Kon sugad, ano an kinahanglan buhaton? Mag-aampo ako pinaagi han regalo han espiritu, ngan mag-aampo liwat ako nga nasasabtan ko. Magkakanta ako hin pagdayaw ha Dios pinaagi han regalo han espiritu, ngan magkakanta liwat ako ha Dios hin kanta nga nasasabtan ko.
16 Kay kon diri, kon magdadayaw ka pinaagi han regalo han espiritu, paonan-o an ordinaryo nga tawo nga aada ha butnga niyo makakasiring hin “Amen” ha imo mga pagpasalamat, kay diri man niya nasasabtan an imo ginyayakan?
17 Oo, maopay an imo mga pagpasalamat, pero diri napaparig-on an iba.
18 Nagpapasalamat ako ha Dios nga nakakayakan ako hin mas damu nga pinulongan kay ha iyo ngatanan.
19 Pero ha kongregasyon, mas karuyag ko pa magyakan hin lima nga pulong nga nasasabtan, basi matutdoan ko an iba, kay ha 10,000 nga pulong ha iba nga pinulongan.
20 Mga kabugtoan, diri kamo magin sugad hin gudtiay nga kabataan ha abilidad ha pagsabot, lugod magin sugad kamo hin gudtiay nga kabataan may kalabotan ha karaotan; kondi magin adulto kamo ha abilidad ha pagsabot.
21 Ini an nahisurat ha Balaud: “ ‘Pinaagi han mga pinulongan han mga taga-iba nga lugar ngan pinaagi han mga im-im han mga estranghero magyayakan ako hini nga mga tawo, ngan bisan pa hito, diri hira mamamati ha akon,’ nasiring hi Jehova.”
22 Salit an mga pinulongan diri tigaman para ha mga tumuroo kondi para ha mga diri-tumuroo, pero an tagna diri para ha mga diri-tumuroo kondi para ha mga tumuroo.
23 Kon sugad, kon nagkakatirok an bug-os nga kongregasyon ha usa nga lugar ngan nagyayakan hira hin iba-iba nga pinulongan, ngan nagkasulod an ordinaryo nga mga tawo o an mga diri-tumuroo, diri ba masiring hira nga nalulurong kamo?
24 Pero kon nananagna kamo ngatanan ngan may sumulod nga diri-tumuroo o ordinaryo nga tawo, huhunahunaon niya nga ginsasaway hiya ngan gin-uusisa gud han ngatanan.
25 Salit an mga sekreto han iya kasingkasing mabubuhayhag. Tungod hito mayukbo hiya ngan magsisingba ha Dios, ngan magpapahayag: “An Dios aada gud ha iyo.”
26 Kon sugad, mga kabugtoan, ano an angay buhaton? Kon nagkakatirok kamo, an usa may salmo, an iba may katutdoan, an iba may kapahayagan, an iba nagyayakan hin iba nga pinulongan, ngan an iba nag-iinterpretar. Buhata niyo an ngatanan para ha pagparig-on.
27 Ngan kon may nagyayakan hin iba nga pinulongan, limitahan ito ha duha o an pinakadamu, tulo, ngan magsurosaliwan hira; ngan may usa liwat nga sadang maghubad.
28 Pero kon waray parahubad, angay hiya humilom ha kongregasyon ngan magyakan ha iya kalugaringon ngan ha Dios.
29 Ngan payakna an duha o tulo nga propeta, ngan sabuton han iba an kahulogan.
30 Kondi kon may usa pa nga nakakarawat hin kapahayagan samtang nalingkod didto, pahiloma an una nga mamumulong.
31 Kay kamo ngatanan usa-usa nga makakapanagna, basi mahibaro ngan madasig an ngatanan.
32 Ngan an mga regalo han espiritu ha mga propeta sadang nira gamiton hin husto.
33 Kay an Dios diri Dios han kasamokan, kondi han kamurayawan.
Sugad han kahimtang ha ngatanan nga kongregasyon han mga baraan,
34 an kababayin-an sadang maghilom ha mga kongregasyon, kay diri hira gintutugotan nga magyakan. Lugod, magpasakop hira, sugad han ginsisiring liwat han Balaud.
35 Kon may karuyag hira mahibaroan, pakianhan nira ha balay an ira bana, kay makaarawod nga an babaye magyakan ha kongregasyon.
36 Ha iyo ba nagtikang an pulong han Dios, o tubtob la ha iyo ito nakaabot?
37 Kon may naghuhunahuna nga propeta hiya o gintagan hin regalo han espiritu, sadang niya kilalahon nga sugo han Ginoo an mga iginsusurat ko ha iyo.
38 Pero kon an usa diri nakakasabot, magpapadayon hiya nga ignorante.
39 Salit mga kabugtoan, padayon nga mangalimbasog kamo ha panagna, ngan ayaw niyo igdiri an pagyakan hin iba-iba nga pinulongan.
40 Buhata niyo an ngatanan ha desente ngan organisado nga paagi.
