1 Corinto 12:1-31
12 Mga kabugtoan, diri ko karuyag nga waray kamo hinbabaroan mahitungod han espirituwal nga mga regalo.
2 Maaram kamo nga han mga tawo han mga nasud* pa kamo, iginsimang kamo ngadto ha diri nakakayakan nga mga dios-dios, ngan nasunod kamo bisan ngain kamo nira dad-on.
3 Salit karuyag ko hibaroan niyo nga waray nagyayakan pinaagi han espiritu han Dios an nasiring: “Ginpanhimaraot hi Jesus!” ngan waray makakasiring: “Hi Jesus an Ginoo!” kon diri pinaagi han baraan nga espiritu.
4 Damu nga klase an mga regalo, pero usa la nga espiritu an naghahatag;
5 damu nga klase an sagrado nga buruhaton, pero usa la an Ginoo;
6 ngan damu nga klase an buruhaton, pero usa la nga Dios an nagpapabuhat hito ngatanan ha tagsa nga tawo.
7 Nakikita gud ha kada tagsa an bulig han espiritu para ha mapulsanon nga katuyoan.
8 Pananglitan, ha usa iginhatag an kinaadman ha pagyakan pinaagi han espiritu, ha iba an kahibaro ha pagyakan pinaagi ha amo gihapon nga espiritu,
9 ha iba iginhatag an pagtoo pinaagi liwat hito nga espiritu, ngan ha iba an mga regalo ha pagtambal pinaagi hito nga usa nga espiritu,
10 ha iba an paghimo hin gamhanan nga mga buhat, ha iba an panagna, ha iba an pagsabot han giniyahan nga mga kapahayagan, ha iba an pagyakan hin iba-iba nga pinulongan, ngan ha iba pa an pag-interpretar han mga pinulongan.
11 Pero ini ngatanan nga buruhaton ginbubuhat han amo gihapon nga espiritu. Iginhahatag ini ha kada tagsa uyon ha kaburut-on hito.
12 Kay sugad la nga an lawas uusa pero damu an bahin, ngan an ngatanan nga bahin hito nga lawas, bisan kon damu, uusa la nga lawas, sugad man an lawas han Kristo.
13 Pinaagi han usa la nga espiritu ginbawtismohan kita ngatanan basi magin usa nga lawas, Judio man o Griego, uripon man o diri, ngan kita ngatanan ginpainom hin usa la nga espiritu.
14 Kay damu an bahin han lawas, diri usa la.
15 Kon an tiil magsiring: “Tungod kay diri ako kamot, diri ako bahin han lawas,” diri ini hinungdan nga diri ito magin bahin han lawas.
16 Ngan kon an talinga magsiring: “Tungod kay diri ako mata, diri ako bahin han lawas,” diri ini hinungdan nga diri ito magin bahin han lawas.
17 Kon an bug-os nga lawas mata, diin man an pagpamati? Kon an bug-os nga lawas para ha pagpamati, diin man an pagsimhot?
18 Lugod, an tagsa nga bahin han lawas iginpahamutang han Dios uyon ha iya karuyag.
19 Kon an ngatanan nga bahin parapriho la, magigin lawas ba ito?
20 Pero damu an bahin, kondi usa la nga lawas.
21 An mata diri makakasiring ha kamot: “Diri ko ikaw kinahanglan,” o an ulo diri liwat makakasiring ha mga tiil: “Diri ko kamo kinahanglan.”
22 Kondi an mga bahin han lawas nga baga hin maluya, ha pagkamatuod, kinahanglanon.
23 Ngan an mga bahin han lawas nga ginhuhunahuna naton nga diri sugad kadungganon mas ginpapasidunggan naton, salit an aton mga bahin nga baga hin diri maopay mas gintatagan hin dignidad,
24 pero an aton mag-opay nga bahin diri na nanginginahanglan hito. Kondi han ginhimo han Dios an lawas, mas gintagan niya hin dungog an bahin nga kulang hin dungog,
25 basi waray pagkabahin-bahin ha lawas, lugod an mga bahin hito sadang magminangnoay.
26 Kon an usa nga bahin nag-aantos, an ngatanan nga bahin nag-aantos liwat; o kon an usa nga bahin gindadayaw, an ngatanan nga bahin nalilipay liwat.
27 Kamo an lawas han Kristo, ngan an tagsa ha iyo mga bahin hito.
28 Ngan gintagan han Dios hin toka an mga membro han kongregasyon, siyahan, mga apostol; ikaduha, mga propeta; ikatulo, mga magturutdo; sunod, gamhanan nga mga buhat;* katapos, mga regalo ha pagtambal; pagbulig ha iba, mga abilidad ha pagpanguna, ngan pagyakan hin iba-iba nga pinulongan.
29 Diri ngatanan apostol, diri ba? Diri ngatanan propeta, diri ba? Diri ngatanan magturutdo, diri ba? Diri ngatanan naghihimo hin gamhanan nga mga buhat, diri ba?
30 Diri ngatanan may mga regalo ha pagtambal, diri ba? Diri ngatanan nagyayakan hin iba-iba nga pinulongan, diri ba? Diri ngatanan parahubad, diri ba?
31 Pero padayon nga pangalimbasugi niyo nga magkaada han gimaopayi nga mga regalo. Ngan katapos, ipapakita ko ha iyo an pinakamaopay nga paagi.
