Fetela kwa tshedimosetsong

A Jesu O ne A Nyetse? A Jesu O ne A na Le Bomonnawe?

A Jesu O ne A Nyetse? A Jesu O ne A na Le Bomonnawe?

Karabo ya Baebele

Le fa Baebele e sa bue ka tlhamalalo gore a Jesu o ne a nyetse kgotsa nnyaa, go phepafetse mo Baebeleng gore Jesu o ne a sa nyala. * Akanya ka se se latelang.

  1. Gantsi Baebele e bua ka lelapa la gaabo Jesu, ka basadi ba ba neng ba tsamaya le ene mo bodireding le ka ba ba neng ba le teng fa a bapolwa mme ga e bue sepe ka ga gore a o ne a na le mosadi. (Mathaio 12:46, 47; Mareko 3:31, 32; 15:40; Luke 8:2, 3, 19, 20; Johane 19:25) Lebaka le le utlwalang la go bo Baebele e sa bue sepe ka kgang eno ke ka gonne o ne a sa nyala.

  2. Fa Jesu a bua ka ba ba sa batleng go tsena mo lenyalong gore ba dire mo go oketsegileng mo tirelong ya Modimo, o ne a raya barutwa ba gagwe a re: “A yo o ka go tsholang [go sa tsene mo lenyalong] a go tshole.” (Mathaio 19:10-12) O ne a tlhomela ba ba sa batleng go tsena mo lenyalong sekao sa gore ba ineele ka botlalo mo Modimong.—Johane 13:15; 1 Bakorintha 7:32-38.

  3. Pele ga Jesu a swa, o ne a rulaganya gore mmaagwe a tlhokomelwe. (Johane 19:25-27) Fa Jesu a ka bo a nyetse kgotsa a nnile le bana, a ka bo a tlhomamisitse gore le bone ba a tlhokomelwa.

  4. Baebele e bontsha gore Jesu ke sekao se banna ba ka se latelang mme ga e bue sepe ka tsela e a neng a tshwara molekane wa lenyalo ka yone. Go na le moo, ya re: “Banna, tswelelang lo rate basadi ba lona, fela jaaka Keresete le ene a ne a rata phuthego a ba a ineela ka ntlha ya yone.” (Baefeso 5:25) Fa Jesu a ka bo a nyetse fa a ne a le mo lefatsheng, a temana eno e ka bo e sa bue ka sekao sa gagwe se se molemolemo sa monna yo o nyetseng?

A Jesu o ne a na le bomonnawe?

Ee, Jesu o ne a na le bomonnawe ba ka nna barataro, e bong Jakobe, Josefa, Simone, Judase le bokgaitsadie ba babedi. (Mathaio 13:54-56; Mareko 6:3) E ne e le bana ba ba tshotsweng ke mmaagwe Jesu, Marea, le monna wa gagwe e bong Josefa. Baebele ya re Jesu ke “leitibolo” la ga Marea, se se kayang gore Marea o ne a na le bana ba bangwe.—Luke 2:7.

Dilo tse di seng boammaaruri ka bomorwarraagwe Jesu

Bangwe ba re Marea o feditse botshelo jotlhe jwa gagwe e le kgarebane, ka jalo ba re lefoko “bomorwarre” le na le bokao jo bo farologaneng. Ka sekai, bangwe ba akanya gore bomorwarraagwe Jesu e ne le bomorwa Josefa pele ga a nyala Marea. Le fa go ntse jalo, Baebele e bontsha gore Jesu o ile a newa tshwanelo ya semolao ya bogosi jo bo solofeditsweng Dafide. (2 Samuele 7:12, 13; Luke 1:32) Fa e ne e le gore Josefa o ne a na le bana ba bagolo mo go Jesu, yo o mogolo mo go bone botlhe a ka bo a nnile moruaboswa wa semolao wa ga Josefa.

A polelwana eo e ka tswa e lebisitswe kwa barutweng ba ga Jesu, kgotsa bakaulengwe? Kgopolo eno ga e dumalane le Dikwalo ka gonne Baebele e bua ka nako e ‘totatota, bomorwarraagwe ba neng ba sa supe tumelo mo go ene.’ (Johane 7:5) Baebele e farologanya bomorwarraagwe Jesu le barutwa ba gagwe.—Johane 2:12.

Go ya ka kgopolo e nngwe, bomorwarraagwe Jesu totatota e ne e le bontsalae. Le fa go ntse jalo, Dikwalo Tsa Segerika di dirisa mafoko a a rileng fa di bua ka ‘morwarre,’ ‘wa losika’ le ‘ntsalake.’ (Luke 21:16; Bakolosa 4:10) Bakanoki ba le bantsi ba Baebele ba lemogile gore bomorwarraagwe Jesu le bokgaitsadie e ne e le bana ba ga Marea le Josefa. Ka sekai, The Expositor’s Bible Commentary ya re: “Tsela e e utlwalang sentle ya go tlhaloganya lefoko ‘bomorwarre’ . . . ke gore le kaya bomorwa Marea le Josefa mme ka jalo ke bomorwarraagwe Jesu ka mmaagwe.” *

^ ser. 3 Baebele ya re Keresete ke monyadi mme ditemana tse di dikologileng dipego tseno di bontsha fa monyadi a dirisitswe ka tsela ya tshwantshetso.—Johane 3:28, 29; 2 Bakorintha 11:2.

^ ser. 13 Bona le The Gospel According to St. Mark, Kgatiso ya Bobedi, e e kwadilweng ke Vincent Taylor, tsebe 249 le A Marginal Jew—Rethinking the Historical Jesus, e e kwadilweng ke John P. Meier, Bolumo 1, tsebe 331-332.