Kilalang-kilala ang mga Saksi ni Jehova sa kanilang gawaing pagsasalin. Pagsapit ng Nobyembre 2014, naisalin na namin ang Bibliya sa 125 wika at ang mga literaturang batay sa Bibliya naman sa 742 wika. Nagsasalin din kami ng mga video. Noong Enero 2015, ang video na Ano’ng Mayroon sa Kingdom Hall? ay available na sa 398 wika, at ang video na Bakit Magandang Mag-aral ng Bibliya? naman sa 569 na wika. Bakit at paano ito ginagawa?

Noong Marso 2014, ang Lupong Tagapamahala ng mga Saksi ni Jehova ay nagbigay ng tagubilin sa mga tanggapang pansangay sa buong mundo na maghanda ng audio sa pinakamaraming wikang posible para sa mga video na nagtatampok ng pag-aaral sa Bibliya.

Maraming hakbang ang kailangan sa pagsasalin ng isang video. Una, isasalin ng lokal na translation team ang iskrip. Sumunod, pipiliin ang mga tagabasang gaganap sa bawat boses sa video. Pagkatapos, irerekord ng audio/video team ang mga boses, ie-edit ang recording, at gagawin ang mga on-screen text, o mga salitang lilitaw sa video. Panghuli, pagsasama-samahin ang audio, text, at video para makabuo ng file na ia-upload sa website.

Sa ilang sangay, may mga recording studio at personnel na sinanay para sa gawaing ito. Pero paano naman ang mga wikang sinasalita at isinasalin sa malalayong lugar?

Ang mga audio technician na may dalang portable recording system ay naglakbay sa iba’t ibang panig ng mundo para sa gawaing ito. Gamit ang isang mikropono at isang laptop computer na may software para sa audio recording, ang technician ay magse-set up ng pansamantalang recording studio sa isang opisina, Kingdom Hall, o pribadong tahanan. Magsisilbing mga tagabasa, coach, at checker ang mga taong lumaking nagsasalita ng wikang iyon. Kapag natapos na ang recording at naaprobahan, ililigpit na ng audio technician ang kaniyang mga gamit at lilipat sa susunod na lokasyon.

Sa ganitong paraan, nakagawa ng mga video sa tatlong ulit na mas maraming wika kaysa sa dati.

Napakaganda ng pagtanggap sa mga video na ito. Para sa marami, ang aming mga video ang kauna-unahang napanood nila sa kanilang sariling wika.

Isa sa mga wikang inirekord ay ang Pitjantjatjara, na sinasalita ng mahigit 2,500 katao sa Australia. Inirekord ito sa Alice Springs sa Northern Territory. “Talagang maganda ang naging pagtanggap sa mga video,” ang sabi ni Callan Thomas, na tumulong sa audio recording. “Titig na titig ang mga tagaroon sa tablet at itinatanong nila kung saan sila puwedeng makakuha ng ganitong mga video. Bihira ang babasahin sa wikang ito. Kapag naririnig nila ito—at lalo na kapag napapanood nila ito—namamangha sila.”

Dalawang Saksi sa Cameroon ang naglalakbay sa isang ilog sakay ng bangka. Tumigil sila sa isang nayon ng mga Pygmy at kinausap ang pinuno roon, na isa ring guro sa paaralan. Nang malaman ng mga brother na ang pinuno ay nagsasalita ng Bassa, gumamit sila ng isang tablet at ipinapanood sa kaniya ang video na Bakit Magandang Mag-aral ng Bibliya? sa kaniyang sariling wika. Humanga ang pinuno at humingi ng ilang literatura.

Sa isang nayon sa Indonesia, isang lider ng relihiyon ang galít sa mga Saksi ni Jehova, kung kaya sinunog niya ang lahat ng literaturang naipamahagi sa mga tagaroon. Nagbanta naman ang ibang tagaroon na susunugin nila ang Kingdom Hall. Nang maglaon, apat na pulis ang pumunta sa bahay ng isang babaeng Saksi at pinagtatanong siya at ang pamilya niya. Gusto nilang malaman kung ano ang nangyayari sa loob ng Kingdom Hall, kaya ipinapanood niya sa kanila ang video na Ano’ng Mayroon sa Kingdom Hall? sa wikang Indonesian.

Pagkatapos mapanood ang video, sinabi ng isa sa mga pulis: “Alam ko na ngayon na mali ang pagkakilala sa inyo ng mga tao at wala talaga silang alam tungkol sa inyo.” Nagtanong naman ang isang pulis: “Puwede ba akong humingi ng kopya ng video na ito para maipakita ko rin sa iba? Tama ang impormasyon sa video na ito tungkol sa inyo.” Ngayon, maganda na ang tingin ng mga pulis sa mga Saksi at pinoprotektahan na nila ang mga ito.

Napanood mo na ba ang mga video na ito? Kung hindi pa, bakit hindi mo ito panoorin sa sarili mong wika?