Mpase u Hen Yohane 9:1-21
9 Ortyom u sha utaan la tôngo busa na.+ Tsô m nenge a ishan i yange i osough sha i va gba shin tar yô, i na un* akii a sha zwa u ihyungwa+ i i ze kweng la.
2 A bugh zwa u ihyungwa i i ze kweng la, maa mnyim gba duen hen zwa shon kôndon sha, er ka mnyim ma ken atse a vesen nahan, maa iyange hingir dimii,+ kua ahumbe kpaa, sha mnyim ma hen zwa shon la.
3 Shi ikyomon* due ken mnyim mara samber sha tar;+ i na i tahav, ka imba utaha i ayese a sha tar a lu a mi la vough.
4 I kaa a i ér i̱ de eren ma imendenegh ki sha tar shin ma toho shin ma kon kwagh ga, saa ior mba ve lu a ikyav i Aôndo sha atsul a ve ga la tseegh.+
5 I na ikyomon la tahav, lu sha u i wua ve ga, kpa i er ve ican iwer itian, man ican ve la lu er ican i iyese+ ka ia ta or ve nan ya la nahan.
6 Sha ayange la, ior vea tôm ku, kpa mayange vea zua a mi ga, a sar ve tsung u kpen, kpa ku ua yevese ve.
7 Mluashe u ikyomon la lu er ka anyinya a i ser a iyol u zan ityav nahan;+ i lu a kwagh sha ityo er ka ader a tor a sha zanaria nahan, i lu ishiv er ka ishiv mbi uumace yô,
8 i gema i lu a ice sha ityo er ka ice i ukase nahan. Anyi a i lu er ka anyi a ubegha yô,+
9 shi i lu a urigambautyaav iyol er ka urigambautyaav mba iyôôgh nahan. Akper a i lu huran er ka ihyuran i akekeautya a anyinya a lu kpelan a sha ayem yemen ken utya nahan.+
10 Shi hanmô ve lu a tsa, soho lu sha mi er ka u iyese nahan, shi i lu a tahav mbu eren ior ican sha ica i i la, zan zan iwer itian.+
11 I lu a tor u hemen i, ka ortyom u ihyungwa i i ze kweng la.+ Iti na ken zwa Heberu ér, Abadon,* kpa iti na ken zwa Grika ér Apolion.*
12 Kwaghtseren u môm la kar kera ve. Nenge! Akaa ne aa eren kera yô, akaatseren ahar+ aa mase van.
13 Ortyom u sha ataratar la+ tôngo busa na.+ Tsô m ungwa imo ken akor a atse a nan nagh a sha zanaria,+ a a lu sha ishigh ki Aôndo la,
14 i kaa a ortyom u sha ataratar, u lu a busa la ér: “Sagh mbatyomov mba unyiin mba ve lu uikyangen hen zegeifi u Uferati la.”+
15 Tsô i sagh mbatyomov mba unyiin mba ve wa iyol sha ci u ihwa la man iyange la man uwer la kua inyom shon la, sha u ve̱ wua ior sha tar i̱ ngee i̱ kuma vegher môm ken avegher a u a atar la cii.
16 Ingyegh ki ushoja mba nôngon ityav sha anyinya lu dubu ikyundu kwa dubu pue;* i yila ingyegh ve m ungwa.
17 Man kape anyinya a m nenge a mi ken mpase man ior mba ve tema sha a la lu je ne: Ve lu a urigambautyaav iyol, mba lun kala nyian er ka usu nahan, man mba lun buluu-buluu, man mba lun a kala u ayarkyure, er sulfur nahan. Mtom ma anyinya la lu er ka mtom ma ubegha nahan,+ usu man mnyim kua sulfur due ken ijô i a.
18 Atsan a atar ne wua ior sha tar ngee kuma vegher môm ken avegher a u a atar cii, sha usu man mnyim kua sulfur u due ken ijô i a la.
19 Gadia tahav mbu anyinya la mbu ken ijô i a man ken ica i a, gadia ica i a ngi er iyô nahan, ngi a ityouv sha mi, shi ka sha akaa ne a eren ior ican ye.
20 Kpa ior mbagenev mba atsan ne wua ve ga la cii, gema ishima sha ityom i ave a ve ga; ve de u civir azôv man ieev mbi sha zanaria man mbi sha azurufa man mbi sha togula man mbi sha awen man mbi i gbe sha ikyon la ga, akaa a a nengen ga, shi a ungwan ga, shi a zenden kpaa ga la.+
21 Ve gema ishima ve de iwoor-or man akombo a sôron man idya* kua iv kpaa ga.
