Mpase u Hen Yohane 7:1-17
7 Kwagh ne eren kera yô, m nenge mbatyomov unyiin tile sha azongo* a tar a anyiin la, ve kôr ahumbe a ken avegher a tar a anyiin la gbang gbang, sha u a̱ de te sha tar shin sha zegemnger shin sha ma kon ga yô.
2 Tsô m nenge ortyom ugen mough vegher u iyangeduen* lu kôndon sha, lu a ikyav i Aôndo u uma; a gba yilan mbatyomov mba unyiin mba i na ve ian i vihin tar kua zegemnger la genger genger,
3 kaan ér: “De vihin nen inya* shin zegemnger shin ikyon ga, zan zan se kar veren ikpan i Aôndo wase ikyav+ sha atsul a ve been.”+
4 Nahan m ungwa iyenge i mba i ver ve ikyav la, lu iorov 144,000;+ i ver ve ikyav ken hanma ipyaven u ônov mba Iserael cii.+
5 Ken ipyaven u Yuda, i ver iorov 12,000 ikyav;ken ipyaven u Ruben lu iorov 12,000;ken ipyaven u Gadi lu iorov 12,000;
6 ken ipyaven u Asher lu iorov 12,000;ken ipyaven u Nafetali lu iorov 12,000;ken ipyaven u Manase+ lu iorov 12,000;
7 ken ipyaven u Shimion lu iorov 12,000;ken ipyaven u Levi lu iorov 12,000;ken ipyaven u Isakar lu iorov 12,000;
8 ken ipyaven u Sebulon lu iorov 12,000;ken ipyaven u Yosev lu iorov 12,000;ken ipyaven u Benyamin, i ver iorov 12,000 ikyav.
9 Kwagh ne eren kera, m kenger yô, nenge! zegeikpelaior, i̱ ma or fatyô u ôron iyenge ve ga, i̱ mba ve due ken hanma ikyurior man hanma ipyaven man hanma nongoior man hanma zwa yô,+ tile sha ishigh ki ikyônough ki torough kira kua sha ishigh ki Waniyôngo, ve hua akondo a pupuu a elemeen;+ shi ve kôr andar a ivilegh ken ave.+
10 Ve lu ôron genger genger ér: “Myom ka hen Aôndo wase a dugh ye, un u a tem sha ikyônough ki torough la,+ kua hen Waniyôngo.”+
11 Mbatyomov cii tile kase ikyônough ki torough kira kua mbatamen mbara+ man akaauma a anyiin la, ve gba ve cir ishigh inya hen ishigh ki ikyônough ki torough kira, ve gba civir Aôndo,
12 kaan ér: “Amen! Iwuese man iengem man kwaghfan man ishughun man icivir man tahav man agee cii, ve̱ lu mba Aôndo wase zan zan gbem sha won.+ Amen.”
13 Tsô môm ken mbatamen mbara gema pinem ér: “Mba ve hua akondo a pupuu a elemeen ne+ ka unô, man ve due hana?”
14 Maa her je m kaa a na mer: “Terem, ka we u fe ye.” Tsô a kaa a mo ér: “Mban ka mba ve due ken zegecan kera yô,+ ve ôô akondo a ve sha awambe a Waniyôngo la, a hingir pupuu.+
15 Ka nahan man ve til sha ishigh ki ikyônough ki torough ki Aôndo ye, mba eren un icighantom ken tempel na atetan man tugh; nahan Un u a tem sha ikyônough ki torough la+ una samber tenti na sha a ve.+
16 Ijen shin imura a kera kôr ve ga, oo ua kera ta ve ga, shi a kera tsee ve iyol kpaa ga,+
17 sha ci u Waniyôngo,+ un u a lu hen atô u* ikyônough ki torough la, una kura ve+ shi una hemen ve a za a ve hen ambor a* mngerem ma umam.+ Aôndo una ese ve mliam cii sha ashe kera.”+
