Mpase u Hen Yohane 8:1-13
8 Bughun+ ikyav i sha utaankaruhar la yô,+ huan sha ving kuma er tiôn ihwa nahan.
2 Tsô m nenge mbatyomov utaankaruhar+ tile sha ishigh ki Aôndo, i na ve ibusa itiankarihiar.
3 Tsô ortyom ugen kôr ikyagh ki sha zanaria ki nanden insensi shimi, va nyôr tile hen atse a nan nagh,+ maa i na un insensi kpishi+ ér a nande hen atse a nan nagh a sha zanaria,+ a a lu sha ishigh ki ikyônough ki torough la, hen shighe u mbamsen mba uicighanmbaiorov lu kôndon sha la.
4 Mnyim ma insensi u ortyom la kôr ken uwe la lu duen kôndon sha vea mbamsen+ mba uicighanmbaiorov imôngo, sha ishigh ki Aôndo.
5 Kpa her je, ortyom la dugh usu sha atse a nan nagh la haa shin ikyagh ki insensi kira poo, gema tsenda shin tar. Tsô m ungwa idyuran man amo, inyiar kpa swamen,+ shi tar tenger.
6 Tsô mbatyomov mba utaankaruhar mba ve lu a ibusa la+ wa iyol u tôngon i.
7 U hiihii la tôngo busa na. Maa i nungwa awombo man usu sha awambe, i tsenda shin tar;+ nahan tar hia kuma vegher môm ken avegher a u a atar cii, shi ikyon hia kuma vegher môm ken avegher a atar a ikyon cii, shi imendenev mbi lun shough shough cii hia kera.+
8 Ortyom u sha uhar la tôngo busa na. Maa i ker kwagh u lun er ka zegewo u a gbe usu nahan, va gba shin zegemnger.+ Nahan zegemnger hingir awambe kuma vegher môm ken avegher a atar a zegemnger cii;+
9 shi akaauma a shin zegemnger kpe ngee kuma vegher môm ken avegher a atar a akaauma a shin zegemnger cii,+ shi utso mba vesen ur ngee kuma vegher môm ken avegher a atar a utso mba vesen cii.
10 Ortyom u sha utar la tôngo busa na. Maa zegeshan u lu yeghen er ka imenger nahan yô, osough sha va gba sha vegher môm ken avegher a atar a uifi kua amboramnger* cii.+
11 Iti i ishan la ér Kon u Yuan. Tsô mngerem yua kuma vegher môm ken avegher a atar a mngerem cii, shi ior kpishi kpe sha mngerem mara, sha ci u ma yua.+
12 Ortyom u sha unyiin tôngo busa na. Maa i pir vegher môm ken avegher a atar a iyange jimin cii,+ man vegher môm ken avegher a atar a uwer jimin cii, kua vegher môm ken avegher a atar a asan cii, sha er vegher môm ken avegher a atar a hanmô ve cii una wa ime,+ shi sev mbua kera lu a iwanger ga a kuma vegher môm ken avegher a atar a sev cii, shi tugh kpa nahan yô.
13 Tsô m nenge, shi m ungwa igyuve lu purugh sha aôndo, ôron genger genger ér: “Kwagh a tser ne, kwagh a tser ne, kwagh a tser ne+ mba ne tem sha tar la, sha ci u amo a ibusa i masetyô, i mbatyomov mba utar mba ve sôôn tôngon ibusa ve la!”+
Ngeren mba shin kpe
^ Shin “azôr.”
