Mpase u Hen Yohane 6:1-17
-
Waniyôngo bugh akav ataratar a hiihii la (1-17)
6 Tsô m nenge Waniyôngo+ bugh ikyav i hiihii ken akav a ataankarahar la,+ maa m ungwa môm ken akaauma a anyiin la+ ôr kwagh kume er ka idyuran nahan, ér: “Va!”
2 M kenger yô, nenge! nyinya u pupuu lu,+ man un u tema sha mi la lu a ada; i na un idyer i tor,+ tsô a due lu hemban ityav, shi lu u una hemba mbi gburu gburu.+
3 Bughun ikyav i sha uhar la yô, m ungwa kwaghuma u sha uhar la+ kaa ér: “Va!”
4 Tsô nyinya ugen due, lu nyian, i na un u tema sha mi la ian i tôôn bem sha tar kera sha u ior ve̱ wua ayol a ve yô, i na un zege sanker.+
5 Bughun ikyav i sha utar la yô,+ m ungwa kwaghuma u sha utar la+ kaa ér: “Va!” M kenger yô, nenge! nyinya u il lu, man un u tema sha mi la lu a iyôgh ki karen myohom a mi* ken uwe.
6 Tsô m ungwa kwagh er ka imo nahan, hen atô u akaauma a anyiin la, kaa ér: “Gbande u alakema* ka denariu*+ môm, agbande a barli atar ka denariu môm; mkurem ma olev man wain yô, de saan ve ishe ga.”+
7 Bughun ikyav i sha unyiin la yô, m ungwa imo i kwaghuma u sha unyiin la,+ a kaa ér: “Va!”
8 M kenger yô, nenge! nyinya u fuee lu, un u tema sha mi la iti na ér Ku. Uwar* lu zan a na ityô. I na ve tahav sha vegher môm ken avegher a tar a anyiin la, ér ve̱ wua ior sha sanker u lihen man sha ijen+ man sha bouange kua sha inyamkyume i shin tar.+
9 Bughun ikyav i sha utaan la yô, m nenge a uuma* mba ior+ mba yange i sôngo ve sha ci u loho u Aôndo man sha ci u shiada u ve er la,+ shin ityô i atse a nan nagh la.+
10 Ve lu ngoron taver taver, kaan ér: “Ter u Hemban Cii, u wang man u mimi,+ u tamber a kuma shighe nan man u ôr ijir, u or iyev i awambe a ase sha mba ve tem sha tar laa?”+
11 Nahan i na hanmô ve ikyondo i elemeen i pupuu,+ shi i kaa a ve ér ve̱ mem sha anshighe kpuaa, zan zan iyenge i anmgbianev vev mba ve lu ikpan a ve imôngo la i̱ kar ivin, ka mba lu u ica a gba ga tsô a wua ve, er ve mbara kpa yange i wua ve nahan la je la.+
12 Tsô m nenge a bugh ikyav i sha ataratar la, maa tar tenger sha utaha tsung; iyange hingir dimii er ka ikyondo i huan zungwen i sha aive* nahan, shi uwer jimin cii hingir er ka awambe nahan,+
13 asan a sha osough haa shin tar, er ahumbe a taver ka a tenger kon u tur, atam a kô a ndoor a haa inya nahan.
14 Maa usha kar kera er ka ihyurenruamabera u i lu huren un nahan,+ shi hanma uwo man hanma icile cii, kar hen ajiir a ve kera.+
15 Tsô utor mba sha tar man mbatomov mba tagher tagher man ukurmbautyaav man mbanyarev man mbaageev man hanma kpan kua hanma or u nan lu kpan ga cii, za yer ken ubar kua ken avande a sha iwo.+
16 Ve zer kaan a iwo man avande la ér: “Gba kighir nen se, yisa nen se,+ Un u a tem sha ikyônough ki torough la a̱ de nengen a vese ga,+ shi kura nen se sha iyugh i Waniyôngo la,+
17 sha ci u iyange i vesen i iyugh ve la va,+ man ka an nana fatyô u waren i̱?”*+
Ngeren mba shin kpe
^ Ka sikeel je la.
^ Gbande alakema môm yange a yuhwa i nôngo u kuman kilogeram môm (0.7kg).
^ Denariu môm lu gbenger azurufa u Mbaroma môm, u lu injar i tom u iyange i môm yô.
^ Shin “Hade,” ka uwar u uumace je la. Nenge Ngeren u Pasen Asember.
^ A shi nan kpa mba ôron ka kwagh u awambe a ve a i haa sha atse a nan nagh la. Nenge Ngeren u Pasen Asember.
^ A̱ shi nan kpa a lu aive a ivo.
^ Shin “u tagher ishigh a i̱?”
