Mpase u Hen Yohane 17:1-18
17 Nahan u môm ken mbatyomov mba utaankaruhar mba ve lu a agbande a ataankarahar la+ va kaa a mo ér: “Va, m̱ tese u ijirôron i i lu van sha zege-gbagakwase u a tem sha mngerem ma kpishim,+
2 un u utor mba tar ne ve er idya a na,+ shi ior mba ve tem sha tar ve hunde wain u idya* na la.”+
3 Maa a tôôm sha tahav mbu jijingi, a yem a mo ken taaikyôngo. Tsô m nenge a kwase tema sha inyamkyume i̱ nyian bong, i̱ lu a ati a lahan Aôndo iyol kpulughuu, shi i̱ lu a mtom mtaankarmhar man akor pue.
4 Kwase la haa ikyondo i nyian dindee+ man i nyian bong iyol, shi wuha iyol sha zanaria man awen a injaa man utagbede,+ shi lu a kôôpu u sha zanaria sha uwe, akaa a ndôhôrshima man a hôngorough a idya* na la iv shimi poo.
5 I nger un iti sha icul, i ior ve fe inja i i ga yô, ér: “Zegebabilon, ngô u mbaagbaga+ man u akaa a ndôhôrshima a sha tar.”+
6 Tsô m nenge kwase la ma awambe a uicighanmbaiorov man a mbashiada mba Yesu je hunde.+
M nengen a na yô, kpiligh mo iyol kpishi.
7 Nahan ortyom la kaa a mo ér: “Ka nyi man shen i kpiligh we iyolo? De m ôr u kwagh u kwase la u ior ve fe ga yô,+ man u inyamkyume i̱ a tem sha i̱, i̱ lu a ityouv itiankarihiar man akor pue la:+
8 Inyamkyume i̱ u nenge a mi la, yange i̱ lu, kpa kera ngi ga, nahan kpa i̱ sôôn duen shin ihyungwa i i ze kweng la,+ shi ka u i̱a yem ken mtim. Man ior mba ve tem sha tar—mba hii shighe u i lu gban tar la je, i nger ati a ve ken ihyurenruamabera u uma ga yô+—a kpiligh ve iyol u nengen er inyamkyume ne yange i̱ lu, kpa i̱ kera lu ga, kpa shi i̱a va lu yô.
9 “Saa or a lu tsev tsev* ve nana kav kwagh ne ye: Mtom ma mtaankarmhar la+ tile sha ityough ki iwo itiankarihiar, i kwase la a tem sha mi yô.
10 Shi utor mba utaankaruhar: Mba utaan ve gba, u môm ngu her, ugen la ngu a va ga; kpa zum u una va yô, una lu sha anshighe kpuaa tsô.
11 Nahan inyamkyume i̱ yange i̱ lu, kpa i̱ kera lu ga la,+ shi ngi tor u sha anigheni kpaa, kpa i̱ due ka ken mba utaankaruhar mbara, shi ngi zan ken mtim.
12 “Akor pue a u nenge a mi la tile sha ityough ki ator pue aa a lu a zua a tartor ga yô, kpa aa va zua a tahav mbu teman tor ihwa i môm vea inyamkyume la.
13 Ve mban ne mhen ve ngu kwaghmôm, nahan vea na inyamkyume la agee a ve man tahav vev.
14 Vea nôngo ityav a Waniyôngo,+ kpa er Waniyôngo a lu Ter u uter man Tor u utor yô,+ una hemba ve ityav.+ Shi mba ve lu vea na imôngo, ve mba i yila ve shi i tsough ve, ve lu mbajighjigh la kpa vea hemba ve ityav.”+
15 Tsô a kaa a mo ér: “Mngerem ma u nenge a mi, ma gbagakwase la a tem sha mi la, tile sha ityough ki iniongoior man zegeikpelaior man akuraior kua ijô.+
16 Man akor pue+ a u nenge a mi la kua inyamkyume la,+ vea kôr gbagakwase la ihyom+ shi vea ngohol un akaa cica cii, una hingir idyelegh, shi vea ya inyam na shi vea nande un sha usu una hia vindi vindi.+
17 Gadia Aôndo wa ken asema a ve sha u ve̱ er sha awashima na,+ inja na yô, ve̱ dondo mhen ve u a lu kwaghmôm la, ve̱ na inyamkyume la tahav sha tartor ve,+ zan zan mkaanem ma Aôndo ma kar kuren sha mi.
18 Man kwase+ u u nenge a na la tile sha ityough ki zegegar u tartor na u lu hemen utor mba sha tar cii yô.”
Ngeren mba shin kpe
^ Zwa Grika, porneia (ponia). Nenge Ngeren u Pasen Asember.
^ Zwa Grika, porneia (ponia). Nenge Ngeren u Pasen Asember.
^ Shin “or a lu a ishima i fan kwagh.”
