Mpase u Hen Yohane 19:1-21
19 Kwagh ne eren kera yô, m ungwa amo, er ka a zegeikpelaior i sha nahan, lu kaan genger genger ér: “Wuese nen Yehova!*+ Myom man icivir kua tahav cii ka mba Aôndo wase,
2 sha ci u ôron ajir sha mimi man sha perapera.+ Gadia a tsaha zege-gbagakwase u a vihi tar sha idya na la, shi a or iyev i awambe a ikpan na, a a lu sha ave a* kwase shon la.”+
3 Her je shi ve ôr sha kwa har ér: “Wuese nen Yehova!*+ Mnyim ma kwase la ma duen kôndon sha gbem sha won.”+
4 Tsô mbatamen mba 24 mbara+ kua akaauma a anyiin la+ gba inya civir Aôndo, un u a tem sha ikyônough ki torough la, ve kaa ér: “Amen! Wuese nen Yehova!”*+
5 Shi imo due hen ikyônough ki torough kira kaa ér: “Wuese nen Aôndo wase, ne ikpan na cii,+ ne mba ne cie un la, mbakiriki man mbavesen.”+
6 Shi m ungwa imo er ka i zegeikpelaior nahan, man er ka ihyuran i ukungwambamngerev yô, man shi er ka idyuran i taver nahan. I lu kaan ér: “Wuese nen Yehova,*+ sha ci u Yehova* Aôndo wase, un u a lu Uhembanagee Cii la,+ tema tor!+
7 Se ember nen shi i̱ saan se iyol tsung shi se na un nen icivir, sha ci u ivese i Waniyôngo kuma, kwase na kpa wa iyol bee.
8 I na kwase la ian a hua ikyondo i dedoo; i̱ engem shi ngi wang—gadia ikyondo i dedoo la tile sha ityough ki aeren a perapera a uicighanmbaiorov.”+
9 Tsô a kaa a mo ér, “Nger wer: Saan mba i lehe ve iniongo i aikighe i ivese i Waniyôngo la iyol.”+ Shi a kaa a mo ér: “Akaa ne ka akaaôron a mimi a Aôndo.”
10 Ôron nahan yô, m gba inya hen angahar a na mer me civir un. Kpa a kaa a mo ér: “Wa ikyo! De eren kwagh la ga!+ Mo kpa m ngu kpan er we nahan, man er anmgbianev ou mba ve lu a tom u eren shiada sha kwagh u Yesu la nahan.+ Civir Aôndo!+ Gadia awashima u kwaghôron u profeti yô, ka u eren shiada sha kwagh u Yesu.”+
11 Tsô m nenge i bugh sha, yô nenge! nyinya u pupuu lu.+ Man un u tema sha mi la iti na ér Jighjigh+ man Mimi,+ ôron ijir shi nôngon ityav sha perapera.+
12 Ashe a na nga er nomborusu nahan,+ shi ngu a ader a tor sha ityo kpishi. I nger iti na, i orgen môm nan fe ga, i lu un tseegh a fe yô,
13 shi a haa ikyondo iyol, ngi a* awambe sha mi, shi ka i yila iti na ér Imo+ i Aôndo.
14 Shi akumautya a sha lu dondon un ijime sha anyinya a pupuu, hanmô ve haa ikyondo i dedoo, i pupuu i lun wang iyol.
15 Shi gôgô sanker u esen tsor tsor lu ken zwa na, lihe due ken won,+ ka u una gber akuraior a mi, shi una hemen ve sha gbough ku iyôôgh.+ Heela tseegh ga, una shoghor wain shin ihyungwa i shoghor wain i iyugh i cieryol i Aôndo u Hemban Agee Cii la.+
16 I nger iti sha ikyondo na i hua la, hen namegh nagh, ér: Tor u utor man Ter u uter.+
17 Shi m nenge ortyom tile sha iyange, lu yilan inyon i purugh sha aôndo* genger genger, kaan ér: “Va nen heen, kohol nen imôngo hen zege iniongo i aikighe i Aôndo,+
18 sha er ne ya inyam* i utor man inyam i ukurmbautyaav man inyam i mba taver iyol yô,+ kua inyam i anyinya man mba ve tem sha a la,+ man inyam i hanma or, i mba ve lu ikpan ga man i ikpan, man i mbakiriki kua mbavesen cii.”
19 Tsô m nenge a inyamkyume la kua utor mba sha tar kua ushoja vev, ve kohol imôngo sha u vea nôngo ityav a un u a tem sha nyinya la man a ikyumutya na.+
20 Tsô i kôr inyamkyume la man profeti u aiegh+ u yange eren uivande sha ishigh ki i̱ sha u tsughun mba ve lu a ikyav i inyamkyume shon+ kua mba ve civir eev mbu i̱ la.+ Er ve lu uma la je, i ker ve ve za gba ken ber u usu, u sulfur a lu yeghen usu shimi la.+
21 Kpa i wua mbagenev cii sha gôgô sanker u due ken zwa u un u a tema sha nyinya la.+ Nahan inyon cii ide sha inyam ve.+
Ngeren mba shin kpe
^ Zwa Grika, “Haleluya!” Ken zwa Grika yô, i nger iti i Yehova ne heen tiônôô.
^ Zwa Grika, “a a hee inya sha uwegh ku.”
^ Zwa Grika, “Haleluya!” Ken zwa Grika yô, i nger iti i Yehova ne heen tiônôô.
^ Zwa Grika, “Haleluya!” Ken zwa Grika yô, i nger iti i Yehova ne heen tiônôô.
^ Zwa Grika, “Haleluya!” Ken zwa Grika yô, i nger iti i Yehova ne heen tiônôô.
^ Nenge Ngeren u Seer u A5 la.
^ Shin a fatyô u kaan ér, “i mishi.”
^ Shin “sha ahumbe.”
^ Shin “ikyom.”
