Mpase u Hen Yohane 22:1-21
22 Shi a tesem ifi u mngerem ma uma,+ engem er ka krista yô, lu duen ken ikyônough ki torough ki Aôndo man ki Waniyôngo, kuan+
2 senen hen atô atô u gbenda u vesen u ken gar la. Ikyon i uma lu sha akpe a ifi la keen man keen, lu umen atam kwa 12, i lu umen hanma uwer. Man ikya i ikyon shon lu sha ci u been akuraior angev.+
3 Shi mayange ifyan ia kera lu ga. Kpa ikyônough ki torough ki Aôndo man ki Waniyôngo+ kia lu ken gar la, shi ikpan na ia lu eren un icighantom;
4 nahan vea nenge a ishigh nagh,+ shi a nger iti na sha atsul a ve.+
5 Shi tugh mbua kera lu ga,+ nahan kwagh a kera gba ve a iwanger i imenger shin iwanger i iyange ga, gadia Yehova* Aôndo una ta iwanger sha a ve,+ vea tema tor zan zan gbem sha won.+
6 A kaa a mo ér: “Mkaanem man kuma u nan ma jighjigh, shi ka ma mimi;+ Yehova* Aôndo u ka a mgbegha uprofeti nav ve ôr kwagh la,+ tindi ortyom na ér a tese ikpan na akaa a a sôôn eren keng la.
7 Nenge! M ngu van fefa.+ Saan or u nan lu dondon akaaôron a profeti a ken ihyurenruamabera ne la iyol.”+
8 Ka mo Yohane yange m lu ungwan shi nengen akaa ne ye. Er m ungwa shi m nenge a akaa ne yô, m gba inya shin angahar a ortyom u lu tesen mo a la, mer me civir un.
9 Kpa a kaa a mo ér: “Wa ikyo! De eren kwagh la ga! Mo kpa m ngu kpan er we man anmgbianev ou mba ve lu uprofeti la kua mba ve lu dondon mkaanem ma ken ihyurenruamabera ne la nahan. Civir Aôndo!”+
10 Shi a kaa a mo ér: “De yeren mkaanem ma profeti ma ihyurenruamabera ne ga, gadia shighe u i ver la zurum.
11 Or u eren akaabo nana̱ za hemen u eren akaabo, shi or u eren akaa a ndôhôrshima nana̱ za hemen u eren akaa a ndôhôrshima; kpa orperapera yô, nana̱ za hemen u eren perapera, shi icighanor nana̱ za hemen u lun icighanor.
12 “‘Nenge! M ngu van fefa, shi injar i m nan la ngi a mo, sha u me kimbi hanma or er tom u nan u lu la.+
13 M ngu Alefa man Omega,*+ u hiihii man u masetyô, mhii man mkur.
14 Saan mba ve kire akondo a ve la iyol,+ vea zua a ian i zan hen ikyon i uma la,+ shi vea nyôr ken gar la sha ihinda na.+
15 Ken won yô, ka aniwaav* ve lu ye, kua mba eren kwagh a ujijingi mba bov man mbadyarev* man mbawuanior, man mbacivirakombo man hanma or u aie a doo nan ishima shi eren un cii.’+
16 “‘Mo Yesu, m tindi ortyom wam mer a er shiada hen a ven sha akaa ne sha ci u atôônanongo. M ngu mise u Davidi, shi m ngu wan na,+ shi m ngu ishan i mondon pepe.’”+
17 Nahan jijingi man kwasehe+ mba kaan her zan zan ér, “Va!” Or u nan lu ungwan cii nana̱ kaa ér, “Va!” Shi or u imura i ker nan cii nana̱ va.+ Or u nan soo cii nana̱ ma mngerem ma uma gbilin.+
18 “M ngu eren shiada hen hanma or u nana ungwa akaaôron a profeti a ihyurenruamabera ne cii mer: Aluer or seer kwagh sha akaa ne yô,+ Aôndo una seer nan atsan a i nger ken ihyurenruamabera ne la;+
19 shi aluer or pande ma kwagh ken akaaôron a ihyurenruamabera u kwaghôron u profeti ne yô, Aôndo una kar a kwar u nan u ikyon i nan uma la kera,+ kua u ken icighangar la kpaa,+ akaa a i nger kwagh u a ken ihyurenruamabera ne la.
20 “Un u a lu eren shiada u akaa ne la, ngu kaan ér: ‘M ngu van fefa.’”+
“Amen! Va, Ter Yesu.”
21 Ter Yesu a̱ za hemen u tesen uicighanmbaiorov erdoo u hemban la.
Ngeren mba shin kpe
^ Nenge Ngeren u Seer u A5 la.
^ Nenge Ngeren u Seer u A5 la.
^ Shin “M ngu A man Z.” Alefa ka ishangebaacaa i hiihii ken zwa Grika, Omega di gema ka i masetyô.
^ Ka mba aeren a ve a ndôhôr Aôndo ishima je la.
^ Nenge Ngeren u Pasen Asember, “Idya.”
