Mpase u Hen Yohane 1:1-20
1 Mpase u Yesu Kristu;* mpase ne due hen Aôndo+ sha u Yesu a̱ tese ikpan na+ akaa a ica ia gba ga tsô aa er keng yô. Nahan un gema tindi ortyom na va tese kpan na Yohane akaa shon sha akav,+
2 un di a er shiada sha kwagh u Aôndo yange ôr, kua sha kwagh u shiada u Yesu Kristu yange er, man jighilii yô, sha akaa a yange nenge la cica cii.
3 Saan or u nan ôron mkaanem man genger genger la iyol, kua mba ve lu ungwan kwaghôron u profeti ne shi ve lu eren sha kwagh u i nger ker la kpaa,+ gadia shighe u i ver la zurum.
4 Mo Yohane m ngu ngeren hen atôônanongo* a ataankarahar+ a a lu hen kpentar u Ashia la:
“Un u a lu, u vande lun, shi a lu van la,” a̱ tese ne erdoo u hemban shi a̱ na ne bem,+ shi ujijingi utaankaruhar+ mba ve lu sha ikyônough nagh ki torough la kpaa ve er nahan,
5 kua Yesu Kristu, u a lu “Orshiada u Jighjigh,”+ shi a lu “waniunda sha kwagh u mnder u shin ku,”*+ kua “Orhemen u utor mba shin tar” la.+
Un u se doo un ishima+ shi a paa se sha awambe a na se kera lu sha ikyev i asorabo a ase ga la+—
6 a er se se hingir tartor+ man upristi+ sha ci u Aôndo na man Ter na kpaa—icivir i lu i na kua agee gbem sha won. Amen.
7 Nenge! Ngu van ken abeen,+ nahan hanma ishe ia nenge a na, kua mba yange ve kuma un iwange la kpaa; shi akuraior a sha tar cii aa zungwe sha kwagh na je, aa kera saan ga.+ I̱ lu nahan. Amen.
8 Yehova* Aôndo kaa ér: “M ngu Alefa man Omega,*+ Mo u m lu, u ngise m lu, shi m lu van la, m ngu Uhembanagee Cii.”+
9 Mo Yohane, anmgbian wen, u m lu yan ican+ shi wan ishima er ne nahan,+ shi m lu a kwar ken tartor a ven imôngo,+ ken mzough vea Yesu ne,+ yange m lu ken icile i i yer ér Patemo la, sha ci u m lu ôron kwagh u Aôndo shi eren shiada sha kwagh u Yesu.
10 Yange jijingi erem m lu ken iyange i Ter, tsô m ungwa imo ken ijime yam taver taver, er ka imo i busa nahan,
11 i lu kaan ér: “Nger kwagh u u nenge a mi la ken ihyurenruamabera tindi a mi hen atôônanongo a ataankarahar ne: hen tiônnongo u ken Efese+ man u ken Semuna+ man u ken Pegamu+ man u ken Tiatira+ man u ken Sadisu+ man u ken Filadefia+ kua u ken Laodishia.”+
12 Tsô m gema sha u me nenge or u nan lamen a mo la, m gem yô, m nenge a udaarmbaamengerev utaankaruhar mba i er sha zanaria yô,+
13 shi or lu hen atô u udaarmbaamengerev mbara er ka wan u or nahan,+ nan haa ikyondo i elemeen iyol sen tume shin inya, shi nan tsule tsar u zanaria sha vanger.
14 Shi ityough ki or shon man ice na kungu er ka ikyondo i sha aive a pupuu nahan, man er senou nahan, shi ashe a na lu er nomborusu yô,+
15 shi ikpande-angahar a na lu er togula u wang+ u i we ken atse, a lu mondon nahan, shi ikyenge na lu er ihyuran i ukungwambamngerev nahan.
16 Shi lu a asan ataankarahar ken uwegh nagh ku iyanegh,+ shi gôgô sanker u esen akur ahar lu ken zwa na,+ lihe due ken won; ishigh nagh lu er iyange ka ia nyande ve i lu nahan.+
17 M nengen a na yô, m gba hen angahar a na er m kpe nahan.
Tsô a penda uwegh nagh ku iyanegh sha a mo, a kaa ér: “De cie ga. M ngu u Hiihii+ man u Masetyô,+
18 shi m ngu u uma,+ yange m kpe,+ kpa nenge! m ngu lun uma zan zan gbem sha won,+ shi m ngu a akii a bughun hunda u kuugh man u Uwaregh.*+
19 Nahan nger akaa a u nenge la, man akaa a a lu la, kua akaa a aa er zum u akaa ne aa kar kera yô.
20 Kpa asan a ataankarahar a u nenge a mi ken uwegh agh ku iyanegh kua udaarmbaamengerev mba utaankaruhar mba sha zanaria la ka icighan kwaghmyer: Asan a ataankarahar la tile sha ityough ki mbatyomov mba atôônanongo a ataankarahar la, udaarmbaamenger mba utaankaruhar mbara di tile sha ityough ki atôônanongo a ataankarahar la.+
Ngeren mba shin kpe
^ Shin “Kwaghmyer u Yesu Kristu pase yô.”
^ Nenge Ngeren u Pasen Asember, “Nongo; Tiônnongo.”
^ Shin “shi a lu u i hii nderen shin ku la.”
^ Nenge Ngeren u Seer u A5 la.
^ Shin “A man Z.” Alefa ka ishangaabaacaa i ken zwa Grika i hiihii, Omega di ka i masetyô.
^ Shin “Hade,” ka uwar u uumace je la. Nenge Ngeren u Pasen Asember.
