Mpase u Hen Yohane 10:1-11
10 Tsô m nenge ortyom u taver iyol ugen due sha lu senen, a cir ibyeenegh iyol, ikyume lu un sha ityo, shi ishigh nagh lu er ka iyange nahan,+ angahar a na lu er mtôm nahan, mtôm ma shon lu er ka usu nahan,
2 shi lu a ihyurenruamabera u cuku ken uwe, i samber un. Tsô a penda nguhar nagh ku iyanegh sha zegemnger, ku imesegh sha tar,
3 maa a ngor genger genger, hura er begha ka una taan kume nahan.+ Ngoron yô, m ungwa amo a idyuran itiankarihiar.+
4 M ungwan amo a idyuran i itiankarihiar la yô, m wa iyol u ngeren kwagh shon, kpa m ungwa imo due sha,+ kaa ér: “Yer* akaa a idyuran i itiankarihiar la i ôr la, shi de ngeren a inya ga.”
5 Ortyom u m nenge tile sha zegemnger man tar la, kende uwegh nagh ku iyanegh sha,
6 a bum Un u a lu uma gbem sha won,+ u a gbe sha kua akaa a a lu ker, man tar kua akaa a a lu ken u, man zegemnger kua akaa a a lu shimi la, a kaa ér:+ “A kera timbir mayange ga.
7 Kpa sha ayange a ortyom u sha utaankaruhar la+ una nguren wan iyol u tôngon busa na la,+ icighan kwaghmyer+ u a lu loho u dedoo u Aôndo yange yôô hen ikpan na, i i lu uprofeti la,+ una kure.”
8 Tsô shi m ungwa imo due sha+ lu kaan a mo ér: “Za ngohol ihyurenruamabera u i samber un, u ortyom u a til sha zegemnger man tar la a lu a mi ken uwe la.”+
9 Nahan m za hen ortyom la m za kaa a na mer a nam ihyurenruamabera u cuku la. Tsô a kaa a mo ér: “Ngohol, ya,+ una yua u shin uya,* kpa una gema a nyoho u ken zwa er iyough nahan.”
10 Tsô m ngohol ihyurenruamabera u cuku la sha uwegh nagh, m ye yô,+ a nyohom ken zwa er iyough nahan,+ kpa a gema a yuam shin uya.*
11 Maa ve kaa a mo ér: “Gba keng u shi u ôr kwaghôron u profeti sha kwagh u akuraior man nongoior man ijô kua utor kpishi.”
