1. Oinsá mak ita haree kona-ba fiar?

FIAR mak hahalok neʼebé folin-boot tebes. Laʼós ema hotu iha fiar. (2 Tesalónika 3:2) Maibé Jeová fó fiar ba ninia atan ida-idak neʼebé adora nia. (Roma 12:3; Galásia 5:22) Ita agradese tebes tanba Jeová fó fiar ba ita.

2, 3. (a) Fiar lori diʼak saida ba ita? (b) Ita sei koʼalia kona-ba pergunta saida deʼit?

² Liuhusi fiar ba Jesus Kristu mak Jeová fó perdua ba ita-nia sala. No neʼe mós loke dalan ba ema atu bele iha relasaun neʼebé diʼak ho Jeová ba nafatin. (João 6:44, 65; Roma 6:23) Jeová hatudu laran-diʼak tebes ba ita, tanba maski ita hotu sala-naʼin no merese atu mate, maibé Jeová haree katak ita iha kbiit atu halo buat neʼebé diʼak. (Salmo [Mazmur] 103:10) Tan neʼe nia ajuda ita atu aprende liafuan diʼak kona-ba Jesus nia sakrifísiu. Hodi tau fiar ba Jesus nia sakrifísiu no tuir Jesus, ita iha esperansa atu moris ba nafatin iha futuru.—Lee 1 João 4:9, 10.

 ³ Maibé, saida mak fiar? Hatene deʼit katak Maromak sei fó bensaun ba ita iha futuru, neʼe mak fiar ka lae? Ita presiza halo tan saida atu hatudu katak ita iha fiar?

4. Se ita iha fiar, ita sei halo saida?

⁴ Hatene deʼit kona-ba Jeová nia planu ba futuru la dehan katak iha ona fiar. Tanba ema neʼebé iha fiar, nia sei moris tuir dalan neʼebé Jeová no Jesus hakarak nia atu moris, no nia mós sei ajuda fali ema seluk atu hatene kona-ba Jeová no Jesus. Tan neʼe mak apóstolu Paulo dehan: “Se iha ema nia oin ó fó sai ‘liafuan neʼe iha ó-nia ibun’, katak Jesus mak Naʼi, no ó hatudu fiar iha ó-nia laran katak Maromak halo nia moris fali husi mate, ó sei hetan salvasaun. Tanba ho laran mak ema hatudu fiar hodi sai ema loos, maibé ho ibun mak ema fó sai iha ema barak nia oin hodi hetan salvasaun.”—Roma 10:9, 10; 2 Korinto 4:13.

5. Tanbasá mak importante tebes atu iha fiar, no oinsá mak ita bele hametin ita-nia fiar? Fó toʼok ezemplu.

⁵ Ita tenkesér iha fiar no hametin fiar neʼe se ita hakarak atu moris ba nafatin iha Maromak nia mundu foun. Fiar hanesan ho ai-horis. Ita tenkesér rega beibeik hodi ai neʼe bele moris no sai boot. Selae, ai neʼe bele sai namlaek no mate. Hanesan neʼe mós ho fiar, ita tenke halo fiar neʼe buras nafatin hodi nia bele sai boot liután.—Tito 2:2; 2 Tesalónika 1:3; Lucas 22:32; Ebreu 3:12.

6. Iha dalan rua saida mak Ebreu 11:1 esplika kona-ba fiar?

⁶ Atu komprende fiar mak saida, haree Ebreu 11:1. (Lee.) Eskritura neʼe esplika katak, se ita iha fiar, (1) ita sei “laran-metin katak ita-nia esperansa sei sai loos”. Ita-nia esperansa neʼe inklui mós buat sira neʼebé Jeová promete kona-ba futuru. Porezemplu, ita fiar katak iha futuru buat aat hotu sei la iha tan no Jeová sei lori mundu foun. (2) Ita mós sei “la duvida katak buat neʼebé ita fiar mak loos, maski neʼe la bele haree”. Buat neʼebé ita la bele haree mak kona-ba Maromak Jeová, Jesus Kristu, anju, no Maromak nia Ukun iha lalehan, maibé ita fiar katak sira iha. (Ebreu 11:3) Oinsá mak ita hatudu katak ita iha fiar ba Maromak nia promesa no ba buat sira neʼebé ita-nia matan la bele haree? Liuhusi dalan neʼebé ita moris no liuhusi ita-nia koʼalia no hahalok.

7. Oinsá mak Noé nia ezemplu bele ajuda ita komprende kona-ba fiar? (Haree dezeñu iha pájina 26.)

⁷ Ebreu 11:7 hatete katak tanba fiar mak “Noé hatudu hamtaʼuk ba Maromak no halo ró hodi salva nia umakain bainhira simu tiha avizu kona-ba buat neʼebé seidauk haree”. Noé iha duni fiar ba buat neʼebé Jeová hatete, tan neʼe mak nia harii ró boot ida. Karik ninia viziñu sira husu tansá mak nia harii ró neʼe. Ita bele fiar katak Noé la nonook deʼit, tanba Bíblia bolu Noé nuʼudar “haklaken-naʼin kona-ba buat loos”. (2 Pedro 2:5) Nia fó avizu ba ema katak Maromak atu halo rai-nabeen hodi halakon ema aat. Karik nia mós koʼalia tuir liafuan sira neʼebé Maromak fó sai ba nia: “Haʼu deside ona atu halakon kriatura moris hotu, tanba ema halo rai neʼe nakonu ho violénsia . . . Haʼu sei halo rai-nabeen iha rai  hodi halakon kriatura moris hotu iha lalehan nia okos. No buat hotu iha rai sei lakon.” Ita mós bele fiar katak Noé esplika fali Maromak nia mandamentu ba sira kona-ba oinsá atu bele hetan salvasaun. Jeová nia mandamentu mak: “Ó tenke tama ba ró laran.”—Gênesis (Kejadian) 6:13, 17, 18.

8. Tiago hatete saida kona-ba fiar?

⁸ Tiago mós koʼalia kona-ba fiar iha ninia karta. Karik apóstolu Paulo hakerek tiha ninia karta lakleur mak Tiago foin hakerek ninian. Nia dehan: “Hatudu ó-nia fiar mai haʼu la ho hahalok, no haʼu sei hatudu ba ó haʼu-nia fiar liuhusi hahalok.” (Tiago 2:18) Tiago esplika katak iha deʼit fiar la hanesan ho hatudu ita-nia fiar. Porezemplu, anju aat sira fiar katak Maromak iha duni, maibé sira la hatudu fiar ba nia. Aat liután mak sira kontra fali Maromak. (Tiago 2:19, 20) Tan neʼe mak, se ema ida iha fiar, nia sei halo buat neʼebé Maromak gosta ka iha hahalok diʼak hanesan Abraão nian. Tiago dehan: “Maromak haree ita-nia aman Abraão nuʼudar ema loos liuhusi hahalok kuandu nia hasaʼe tiha nia oan Isaac iha altár, loos ka lae? Entaun, imi haree katak ninia  fiar laʼo hamutuk ho hahalok no ninia fiar sai kompletu liuhusi hahalok.” Tuirmai Tiago hatete katak fiar neʼebé la hatudu liuhusi hahalok, neʼe laiha folin. Nia dehan: “Hanesan isin la hamutuk ho iis mate, nuneʼe mós fiar la hamutuk ho hahalok mate.”—Tiago 2:21-23, 26.

9, 10. Hatudu fiar ba Oan-Mane katak sá?

⁹ Tinan 30 liutiha mak apóstolu João foin hakerek Evanjellu João ho karta tolu tan. Hanesan Bíblia nia hakerek-naʼin sira seluk, nia mós komprende kona-ba saida loos mak fiar, tanba bainhira nia hakerek, dala barak nia uza liafuan gregu neʼebé dala ruma tradús fali nuʼudar “hatudu fiar”.

¹⁰ Porezemplu, apóstolu João hatete: “Ema neʼebé hatudu fiar ba Oan-Mane hetan moris rohan-laek; no ema neʼebé lakohi halo tuir Oan-Mane sei la haree moris, maibé Maromak nia hirus hela iha nia.” (João 3:36) Liafuan “hatudu fiar ba Oan-Mane” katak ita tenke halo tuir Jesus. Dala barak João hakerek liafuan sira neʼebé Jesus rasik hatete katak tenke hatudu beibeik fiar.—João 3:16; 6:29, 40; 11:25, 26; 14:1, 12.

11. Oinsá mak ita bele hatudu katak ita agradese ba Jeová tanba ajuda ita komprende kona-ba lia-loos?

¹¹ Liuhusi espíritu santu mak Jeová ajuda ita atu komprende kona-ba lia-loos no haburas ita-nia fiar. (Lee Lucas 10:21.) Neʼe duni, ita tenke fó agradese beibeik ba Jeová, tanba nia fó oportunidade ba ita atu iha relasaun neʼebé diʼak no hakbesik ba nia liuhusi Jesus, “Ida neʼebé halo kompletu ita-nia fiar no ita-nia Naʼi-Ulun ba fiar”. (Ebreu 12:2) Ita presiza halo orasaun no estuda beibeik Bíblia hodi hametin liután ita-nia fiar.—Éfeso 6:18; 1 Pedro 2:2.

12. Iha dalan saida deʼit mak ita bele hatudu ita-nia fiar?

¹² Ita presiza hatudu nafatin katak ita iha fiar ba Jeová nia promesa sira liuhusi ita-nia hahalok. Porezemplu, tenke haklaken beibeik kona-ba Maromak nia Ukun no ajuda ema sai Jesus nia dixípulu. Ita tenke halo beibeik “buat neʼebé diʼak ba ema hotu, maibé liuliu ba ita-nia maluk fiar-naʼin”. (Galásia 6:10) Ita mós tenkesér hakaʼas an atu “hasai tiha ema tuan nian hamutuk ho ninia hahalok sira” hodi proteje ita-nia relasaun diʼak ho Jeová.—Koloso 3:5, 8-10.

13. (a) Tanbasá mak importante atu “fiar iha Maromak”? (b) Bíblia kompara fiar hanesan saida, tanbasá?

¹³ Bíblia hatete katak: “Se fiar la iha, ita la bele halo Maromak nia laran kontente. Basá ema neʼebé hakbesik ba Maromak tenke fiar katak Maromak iha, no fiar mós katak Maromak sei fó kolen ba sira neʼebé buka nia ho laran.” (Ebreu 11:6) Bíblia kompara fiar hanesan parte ida husi uma nia hun tanba atu sai ema kristaun neʼebé loos, importante tebes atu iha fiar. (Ebreu 6:1) Maibé ema kristaun mós tenkesér haburas hahalok importante seluk tan hodi bele “hela nafatin iha Maromak nia domin”.—Lee 2 Pedro 1:5-7; Judas 20, 21.

14, 15. Tanbasá mak importante tebes atu iha domin, laʼós deʼit fiar?

¹⁴ Eskritura husi Mateus toʼo Apokalipse temi beibeik kona-ba hahalok fiar,  barak liu fali hahalok seluk. Se nuneʼe, bele dehan katak fiar mak hahalok neʼebé importante liu hotu ka lae?

¹⁵ Bainhira apóstolu Paulo kompara fiar ho domin, nia dehan: “Se haʼu iha fiar boot hodi muda foho, maibé la iha domin, haʼu la vale buat ida.” (1 Korinto 13:2) Jesus hatete katak “iha Moisés nia Ukun-Fuan”, mandamentu ida neʼebé boot liu” mak hadomi Maromak. (Mateus 22:35-40) Domin mak ajuda ita atu iha hahalok diʼak seluk tan neʼebé Jeová gosta. Porezemplu, Bíblia hatete katak domin “fiar buat hotu”. Loos duni, domin mak ajuda ita atu tau fiar ba buat hotu neʼebé Maromak hatete iha Bíblia.—1 Korinto 13:4, 7.

16, 17. Bíblia hatete saida kona-ba fiar no domin? Husi hahalok rua neʼe, ida-neʼebé mak importante liu, no tanbasá?

¹⁶ Fiar no domin mak hahalok neʼebé importante tebes, tan neʼe mak dala barak eskritura sira temi hahalok rua neʼe hamutuk. Porezemplu, apóstolu Paulo fó laran-manas ba maluk sira atu ‘tau fiar no domin nuʼudar hatais funu nian atu proteje sira-nia hirus-matan’. (1 Tesalónika 5:8) Apóstolu Pedro dehan: “Maski imi la haree Kristu, maibé imi hadomi nia. Maski imi la hateke ba nia agora daudaun, maibé imi hatudu fiar ba nia.” (1 Pedro 1:8) Tiago husu pergunta ba ema kose-mina: “Maromak hili sira neʼebé kiak tuir mundu nia haree atu sai riku iha fiar no atu simu ninia ukun neʼebé nia promete ona ba sira neʼebé hadomi nia, loos ka lae?” (Tiago 2:5) Apóstolu João hatete katak: “Ita iha fiar ba [Maromak nia] Oan Jesus Kristu nia naran no . . . hadomi malu.”—1 João 3:23.

¹⁷ Maibé apóstolu Paulo mós dehan: “Buat tolu neʼebé hela mak fiar, esperansa, no domin; maibé ida neʼebé boot liu mak domin.” (1 Korinto 13:13) Tanbasá mak Paulo hatete hanesan neʼe? Tanba iha futuru, ita la presiza tan atu iha fiar ba Maromak nia promesa kona-ba mundu foun, tanba promesa sira-neʼe sai loos ona. Ita sei simu buat furak hotu neʼebé Jeová atu fó ba ita iha mundu foun. Maibé iha tempu neʼebá ita sei presiza nafatin atu haburas domin ba Jeová no ba ita-nia maluk sira.

18, 19. Ohin loron, saida mak hatudu katak Maromak nia povu iha fiar, no sé mak merese simu hahiʼi?

¹⁸ Ohin loron, Jeová nia povu iha mundu tomak tau fiar no fó apoiu ba ninia Ukun. Sira iha domin ba malu no sira husik Maromak nia espíritu santu mak dirije dalan neʼebé sira moris. (Galásia 5:22, 23) Tan neʼe mak maski ita iha irmaun-irmán naʼin juta ualu resin iha mundu tomak, ita bele iha dame no unidade nafatin. Neʼe hatudu duni fiar ho domin nia kbiit!

¹⁹ Se la liuhusi Maromak nia ajuda, ita la bele iha unidade, tan neʼe mak nia merese simu ita-nia hahiʼi. (Isaías [Yesaya] 55:13) Ita agradese tebes ba Jeová tanba ho ninia ajuda mak ita “hetan salvasaun liuhusi fiar”. (Éfeso 2:8) Jeová sei kontinua atu ajuda ema barak tan atu iha fiar ba nia toʼo mundu tomak nakonu ho ema neʼebé perfeitu, laran-loos, no kontente. Neʼe duni, mai ita kontinua hatudu fiar ba Jeová nia promesa hotu!