Éfeso 2:1-22

  • Maromak fó ona moris ba ita hamutuk ho Kristu (1-10)

  • Harahun tiha moru neʼebé haketak sira (11-22)

2  Liután neʼe, Maromak fó ona moris ba imi, maski uluk imi mate ona tanba imi-nia hahalok kontra no sala sira.+  Uluk imi laʼo tuir mundu* neʼe,+ tuir ukun-naʼin neʼebé iha podér atu ukun anin,+ katak hanoin*+ neʼebé agora book ema kontradór sira-nia neon.  Sin, iha sira-nia leet mak uluk ita hotu halaʼo ita-nia moris tuir hakarak isin nian,+ hodi kumpre ita-nia hakarak no hanoin rasik,+ no husi moris kedas ita merese simu Maromak nia hirus+ hanesan sira seluk.  Maibé Maromak neʼebé riku ho laran-sadiʼa,+ tanba ninia domin boot ba ita,+  nia fó ona moris ba ita hamutuk ho Kristu maski ita mate tanba ita-nia sala.+ Tuir loloos imi hetan salvasaun liuhusi ninia laran-diʼak neʼebé boot.  Liután neʼe, Maromak fó moris fali ba ita no fó fatin ba ita atu tuur iha lalehan, tanba Maromak halo ita ida deʼit ho Kristu Jesus,+  atu nuneʼe iha tempu* neʼebé atu mai, nia sei hatudu ninia laran-diʼak boot neʼebé kmanek tebes hodi hatudu laran-luak ba* ita neʼebé ida deʼit ho Kristu Jesus.  Liuhusi imi-nia fiar mak imi hetan ona salvasaun tanba ninia laran-diʼak neʼebé boot,+ no neʼe laʼós tanba imi-nia hakaʼas an rasik, maibé ida-neʼe mak prezente husi Maromak.  Salvasaun neʼe laʼós liuhusi imi-nia hahalok,+ atu nuneʼe ema ida la iha razaun atu gaba an. 10  Ita mak Maromak nia kriasaun,* no nia kria+ ita ida deʼit ho Kristu Jesus,+ hodi halo serbisu diʼak sira neʼebé Maromak deside nanis ona ba ita atu halo. 11  Tan neʼe, hanoin-hetan bá katak imi neʼebé husi nasaun seluk tuir isin, uluk ema sira neʼebé “hetan sirkunsizaun”* bolu imi nuʼudar “ema neʼebé la hetan sirkunsizaun”, sirkunsizaun neʼebé ema nia liman mak halo ba isin. 12  Iha tempu neʼebá imi la hatene Kristu, imi ketak husi nasaun Izraél, imi la sai parte iha aliansa sira neʼebé tuir promesa,+ imi la iha esperansa no la hatene Maromak iha mundu neʼe.+ 13  Maibé agora imi sai ida deʼit ho Kristu Jesus, imi neʼebé uluk dook husi Maromak agora hakbesik ona ba nia liuhusi Kristu nia raan. 14  Tanba nia mak ita-nia dame,+ nia mak halo grupu rua sai ida deʼit+ no harahun tiha moru neʼebé haketak sira.+ 15  Liuhusi ninia isin, nia halakon buat neʼebé hamosu odi malu, neʼe mak Ukun-Fuan neʼebé inklui mandamentu no lei sira, atu nuneʼe nia bele halo grupu rua neʼe sai ema foun ida+ hodi sai ida deʼit ho nia no iha dame, 16  no ajuda grupu rua neʼe nuʼudar isin-lolon ida atu sira hadame malu fali ho Maromak liuhusi ai-riin terus nian,*+ tanba liuhusi ninia an rasik nia oho tiha ona buat neʼebé hamosu odi malu.+ 17  Nia mai no fó sai liafuan diʼak kona-ba dame ba imi neʼebé dook husi Maromak no ba sira neʼebé besik Nia, 18  tanba liuhusi nia mak ita neʼebé husi grupu rua neʼe bele livre atu hakbesik ba Aman liuhusi espíritu santu neʼebé hanesan. 19  Tan neʼe, imi laʼós tan ema oin-foun ka ema estranjeiru,+ maibé imi mak sidadaun+ hanesan ho ema santu* sira seluk no sai parte ba Maromak nia umakain.+ 20  No hanesan uma ida, apóstolu no profeta sira+ mak uma nia fundasaun no imi harii tiha ona iha fundasaun neʼe nia leten, maibé Kristu Jesus rasik mak fatuk prinsipál* iha fundasaun neʼe.+ 21  Uma tomak neʼe ida deʼit ho nia no parte hotu tutan hamutuk ho didiʼak,+ no uma neʼe sai boot ba daudaun toʼo sai templu santu ida ba Jeová.*+ 22  Tanba imi sai ida deʼit ho Kristu, Maromak harii daudaun imi hamutuk ho sira seluk hodi sai uma ida neʼebé nia hela bá liuhusi ninia espíritu.+

Nota-rodapé

Ka “sistema”. Haree Glosáriu.
Ka “sistema”. Haree Glosáriu.
Ka “hodi simu”.
Ka “Ita mak rezultadu husi Ninia serbisu”.
Ka “fatuk neʼebé tau iha uma nia lidun”. Haree “Fatuk prinsipál” iha Glosáriu.
Haree Ap. A5.